“Əmək Məcəlləsinə edilən dəyişikliyə görə pensiya yaşı 65-dir. Xüsusilə dövlət büdcəsindən maliyyələşən həkimlər, təhsil işçilərinin həmin yaşda işdən çıxarılması bu sferada ciddi narazılıq yaradır”. Bunu Milli Məclisin ötən iclasında komitə sədri Musa Quliyev Əmək Məcəlləsinə dəyişikliklə bağlı açıqlamasında bildirib.
Təhsil, Səhiyyə sahəsi üzrə peşə sahiblərinin minimim pensiya həddinin olduğunu qeyd edən M.Quliyev bildirib ki, o sahədə işləyən mütəxəssislər işdən çıxandan sonra başqa iş tapa bilmir və bu da sosial vəziyyətlərinə mənfi təsir edir: “Ona görə də hesab edirik, yaş həddi insanların çalışma imkanlarına mane olmamalıdır. Əgər bilik və bacarıqları, sağlamlığı buna imkan verirsə işinə davam etməsi dövlət, milət üçün xeyirli olar. Ona görə də təklif edirik ki, Əmək Məcəlləsində dəyişiklik edilən zaman yaş həddi 65-yaşdan 70 yaşa dəyişdirilsin”.
Ekspertlər də hesab edir ki, əmək qabiliyyətini itirməyən kadrların yaşa görə işdən azad edilməsi düzgün deyil.
Nadir İsrafilov: “Müəllimin peşəkarlıq səviyyəsinə və peşə yararlılığına sertifikasiya vasitəsilə qiymət verilirsə, yaşa konkret məhdudiyyətlərin qoyulmasına ehtiyac yoxdur”
Təhsil eksperti Nadir İsrafilov hesab edir ki, müəllimin peşəkarlıq səviyyəsinə və peşə yararlılığına sertifikasiya vasitəsilə qiymət verilirsə, yaşa konkret məhdudiyyətlərin qoyulmasına ehtiyac yoxdur: “Sertifikasiya hər 5 ildən bir keçirilir və Azərbaycan Respublikası Əmək Məcəlləsinə görə, dövlət büdcəsindən maliyyələşən müəssisələrdə yaş həddi 65-dir. Bu aralıqda yaşlı və kifayət qədər təcrübəyə malik müəllimi narahat etməyə nə lüzum var? 65 yaşına çatmış işçinin çalışma müddəti müvafiq dövlət orqanının rəhbəri tərəfindən hər dəfə 1 ildən çox olmayaraq uzadıla bilər. Hətta bəzi müəssisələrdə təqaüd yaşına çatmış işçilərin çalışma müddəti 1 ildən artıq da uzadılır. Buraya elm, mədəniyyət, səhiyyə və təhsil sahələrinin inkişafında xüsusi xidmətləri olmuş, dövlət büdcəsindən maliyyələşən müəssisələr daxildir.
Belə çıxır ki, müəllim həmin 5 illik müddəti daha 5 il artıq aşa bilər və köhnədən qalma ehtiyat bazası ilə daha iki beşillik müddətində işləyə bilər. Belə müəllimlərimizin sayı o qədər də az deyil. Bu halda yeganə çıxış yolu həmin müəllimləri işdə saxlamaq, lakin sonrakı 5 illikdə əmək haqqlarına diferensial yanaşmaqdır. Belə bir yanaşma 60 yaşdan yuxarı olan şəxslərdə arxayınlıq hissini aradan qaldırar, məsuliyyət hissini isə bir o qədər artırar”.
İlqar Hüseynli: “Həkimə tələbat olduğu halda, yaş senzi tətbiq edib, əmək qabiliyyətini itirməyən həkimlərin işdən azad edilməsi doğru deyil”
Sosioloq İlqar Hüseynli “Bakı-Xəbər”ə açıqlamasında bildirdi ki, inkişaf etmiş ölkələrdə fəaliyyət göstərən məşhur həkimlərin əksəriyyəti 65-70 yaşındadır: “Pensiya yaşının təyin edilməsi o demək deyil ki, yaş tamam olan günün səhəri illərdir fəaliyət göstərən təcrübəli həkimlərin hamısı işdən azad edilsin. Danılmaz faktdır ki, bu gün bölgələrimizdə həkim çatışmazlığı problemi yaşanır. Belə məqamda yaş senzinin tətbiqi isə kadr çatışmazlığı yaradır. Səhiyyə Nazirliyinin saytında yerləşdirilən vakansiyalara baxanda görmək olur ki, 100-ə qədər həkim tələb olunan rayonlar var. Bu qədər həkimə tələbat olduğu halda, yaş senzi tətbiq edib əmək qabiliyyətini itirməyən həkimlərin işdən azad edilməsi doğru deyil. Həkim peşəkardır. Əgər bu və ya digər xəstəlik səbəbindən iş qabiliyyətini itiribsə, bu başqa məsələ. Amma bu məsələdə bir qədər daha geniş düşünmək lazımdır”.
Günel CƏLİLOVA
