Molla rejimi ölkəmizdə öz çirkin siyasətini həyata keçirmək üçün hər vasitəyə əl atır. Casus şəbəkəsi qurur, narkokuryerlər dəstəsi yaradır. Əlbəttə, Azərbaycan polisi, hüquq-mühafizə orqanları əməliyyatlar keçirərək molla rejiminin narkokuryerlər şəbəkəsini də, casuslarını da ifşa edib onları həbsə atır.
İndiyə qədər İranın əli ilə burada fəaliyyət göstərən narkotacirlər, narkokuryerlər saxlanılıb və onlar hamısı təsdiqləyib ki, bu əməli İrandakı "dostlar"ının təhriki ilə edirlər, bunun müqabilində pul qazanırlar və sair.
Son günlər Şirvanda əcnəbi vətəndaşa narkokuryerlik edən qadın saxlanılıb.
Daxili İşlər Nazirliyinin Mətbuat Xidmətinin Şirvan regional qrupundan verilən məlumata görə, Şirvan Şəhər Polis Şöbəsinin əməkdaşları tərəfindən keçirilən əməliyyat tədbirləri nəticəsində narkotik vasitələrin qanunsuz dövriyyəsi ilə məşğul olmaqda şübhəli bilinən şəhər sakini Lamiyə Məmmədova saxlanılıb. Onun üzərinə keçirilən baxış zamanı 3 qramdan artıq narkotik maddə - heroin aşkarlanıb.
Əməliyyat tədbirlərinin davamı olaraq L.Məmmədovanın yaşadığı ünvana keçirilən baxış zamanı oradan 5 ədəd sellofan torbada qablaşdırılmış və ümumi çəkisi 5 kiloqram 120 qram olan heroin, eləcə də bir ədəd elektron tərəzi aşkar olunaraq maddi sübut kimi götürülüb.
Dindirilmə zamanı saxlanılan qadın sosial şəbəkədə tanış olduğu İran Respublikasının vətəndaşına narkokuryerlik etdiyini etiraf edərək, aşkarlanan narkotik vasitəni qabaqcadan təyin olunan yerə çatdırmalı olduğunu bildirib.
Faktla bağlı Şirvan ŞPŞ-nin İstintaq Bölməsində cinayət işi başlanıb, L.Məmmədova barəsində həbs qətimkan tədbiri seçilib. Onun cinayət əlaqələrinin müəyyən edilməsi istiqamətində tədbirlər davam etdirilir.
İranlılar Azərbaycan vətəndaşlarını narkokuryerliyə necə razı sala və ya necə məcbur edə bilir?
“...Çox yüksək nəticələr əldə olunur”
Sabiq polis polkovniki Elbrus Rüstəmov “Bakı-Xəbər”ə şərhində bildirdi ki, İranın məkrli məqsədi məlumdur. “Narkotik vasitələrin satışı ilə məşğul olan şəxslər var, onlara loru dildə “narkobaronlar” deyirlər. Azərbaycan vətəndaşlarını narkokuryerliyə, əsasən “narkobaronlar” vasitəsilə cəlb edirlər. Onlar özləri üzdə olmasalar da, narkotikdən istifadə edən, asılı olan, bu maddəyə möhtac olan şəxsləri ətraflarına yığırlar və onlardan narkokuryer kimi istifadə edirlər, narkotik vasitləri onlarla göndərirlər. Elə də olur ki, danışırlar, tutaq ki, narkotiki sərhəddə atırlar, xəbər verirlər ki, filan yerdədir və gedib götürürlər. Çox yaxşıdır ki, Azərbaycanın Sərhəd Xidməti, Daxili İşlər Nazirliyinin Baş Narkotiklərlə Mübarizə İdarəsi, sərhəd rayonların polis idarələri, şöbələri tərəfindən bu istiqamətdə müvafiq tədbirlər həyata keçirilir. Onlar məlumatlı olurlar. Ona görə də, görürsüz ki, çox yüksək nəticələr əldə olunur. Baxmayaraq ki, İran hələ də öz “istehsalını” davam etdirir”.
E.Rüstəmov qeyd etdi ki, narkokuryerliyə cəlb edilənlər yalnız narkotik asılığından əziyyət çəkən insanlar deyil, onlar arasında narkotik qəbul etməyən, lakin həyat tərzi ağır olan, borcu-xərci olan insanlar da var. E.Rüstəmovun sözlərinə görə, bu cür insanlar da qazanc əldə etmək, maddi ehtiyacını ödəmək üçün bu yola düşür və narkotik ticarəti ilə məşğul olanlar da onlardan istifadə edirlər. E.Rüstəmovun sözlərindən belə qənaətə gəlmək olar ki, İranın təsiri altında olan “narkobaronlar” ərazini araşdırırlar və onların “işinə yarayan” adamları tapıb müxtəlif şirnikləndirici təkliflərlə narkokuryerliyə cəlb edirlər. “Bunu edənlər, təbii ki, qazanc məqsədi ilə ediblər...
İranın məkrli məqsədləri çoxdur. Onlar təkcə Azərbaycana deyil, digər ölkələrə də narkotik göndərirlər. Ümumiyyətlə, İran narkotiklə əlaqədar həmişə məşhur olub. Bu ölkənin iqtisadiyyatının bir hissəsini narkoticarət təşkil edir. Mənə elə gəlir ki, hətta bu, dövlət səviyyəsindədir, rəsmi olmasa da, qeyri-rəsmi olaraq bu məsələ İranın dövlət xadimləri ilə əlaqəlidir”-deyə qeyd edən E.Rüstəmov əlavə etdi ki, İran sərhəd ölkələrinə, o cümlədən də tranzit ölkələrə narkotik göndərir. “Siz özünüz görüsünüz ki, son vaxtlar bizdə kilolarla narkotik vasitə aşkarlanıb. Bu kilolar da yığışıb tona çevirilib”-deyə müsahibimiz vurğuladı.
E.Rüstəmov onu da bildirdi ki, müvafiq qurumlar bu istiqamətdə ciddi mübarizə aparır və bu kimi halların qarşısını çox uğurlu əməliyyatlarla alır, bundan sonra da alacaq.
İradə SARIYEVA
