Son zamanlar “Mətanət A” şirkəti ilə bağlı narazılıqlar artıb. Şirkətdən ayrılmış işçilər hələ də əmək haqlarını ala bilmir. “Mətanət A” şirkətinin keçmiş işçisi Vüqar Məmmədov sosial şəbəkədə yazaraq qeyd edir ki, 2017-2020-ci illərdə əmək müqaviləsi əsasında “Mətanət A” şirkətində satış təmsilçisi vəzifəsində işləyib.
İşlədiyi müddətdə onun maaşından hər ay 10% həddində depozit tutularaq saxlanılıb: “Lakin işdən çıxdığı zaman “Mətanət A” şirkəti həmin məbləği ona ödəməkdən imtina edib. Səbəb kimi isə deyilib ki, işdən çıxdıqdan sonra başqa bir şirkətdə işə düzəlib və bu, işçi ilə imzalanan əmək müqaviləsinin tələblərinə ziddir. Əmək müqaviləsində göstərilir ki, işçi işdən çıxdıqdan sonra 5 il müddətində rəqib şirkətlərlərlə əmək müqaviləsi bağlaya bilməz”. Şirkət hesab edir ki, bu, kommersiya sirrinin yayılmasıdır və buna görə keçmiş işçi cərimə ödəməlidir.
Səslənən iddialara “Mətanət A” şirkətindən münasibət öyrənmək cəhdlərimiz heç bir nəticə vermədi. Şirkətə məxsus olduğu bildirilən (+994 12) 404 14 34 telefon nömrəsinə dəfələrlə zəng etməyimizə baxmayaraq, zənglərimizə cavab verən olmadı.
“Əmək müqaviləsində işçi işdən çıxdıqdan sonra 5 il müddətində rəqib şirkətlərlərlə əmək müqaviləsi bağlaya bilməz tipli nəyinsə yazılması qanunsuzdur”
“Vətəndaşların Əmək Hüquqlarını Müdafiə Liqası”nın sədri Sahib Məmmədov “Bakı-Xəbər”ə açıqlamasında qeyd etdi ki, işdən çıxan işçinin rəqib şirkət tərəfindən işə götürülməməsi qanunsuzdur: “Əmək müqaviləsində işçi işdən çıxdıqdan sonra 5 il müddətində rəqib şirkətlərlərlə əmək müqaviləsi bağlaya bilməz tipli nəyinsə yazılması qanunsuzdur. Bunu edən şəxs qanunun tələblərini pozub”.
Əmək haqlarının verilməməsinə gəlincə, S.Məmmədov qeyd etdi ki, işçilər bununla bağlı məhkəmə, mediasiya şurası və Dövlət Əmək Müfəttişliyinə müraciət edə bilər: “Həmçinin, işçilər əmək haqlarının gecikən hər günü üçün 1 faiz kompensasiya tələb edə bilər. Adam var 1000 manat borcu 1 faizlik kompensasiya sayəsində 3000-ə çevirə bilib. Bunun üçün işçilər aidiyyəti qurumlara müraciət etməlidir”.
Leyla QARAXANLI
