Bir neçə gün əvvəl Şəki rayon Qudula kənd orta məktəbində zəhərlənmə halı qeydə alınıb. Zəhərlənməyə məktəbdə mayın 19-da aparılmış dezinfeksiya işi səbəb olub. Belə ki, mayın 23-də hava temperaturunun yüksək olması səbəbindən məktəbin inzibati binasının zirzəmi qatına səpilmiş dezinfeksiya maddələrinin buxarlanaraq zəhərlənməni yaratdığı ehtimal edilir.
Hadisə zamanı 3 müəllim və 24 şagird olmaqla ümumilikdə 27 nəfər xəsarət alıb. İddia olunur ki, dezinfeksiya şirkətinin qeyri-peşəkar fəaliyyəti nəticəsində məktəbdə zəhərlənmə hadisəsi baş verib. Ümumiyyətlə, dezinfeksiya işləri hansı formada aparılmalıdır ki, insanlar bundan əziyyət görməsin?
Şəki-Zaqatala Regional Təhsil İdarəsi: “Qudula kənd orta məktəbində bir daha əlavə əsaslı təmizlik işləri aparıldıqdan sonra tədris bərpa olunub”
Hadisə ilə bağlı Şəki-Zaqatala Regional Təhsil İdarəsindən “Bakı-Xəbər”ə bildirildi ki, hadisədə zərər çəkmiş bütün şagirdlər və işçi heyət təcili olaraq Şəki şəhər mərkəzi xəstəxanasına çatdırılıb: “Şəki-Zaqatala regional təhsil idarəsinin məsul əməkdaşları xəstəxanada uşaqlara baş çəkib. Şəki rayonunun Qudula kənd orta məktəbində bir daha əlavə əsaslı təmizlik işləri aparıldıqdan sonra tədris bərpa olunub. Mayın 25-dən etibarən sözügedən məktəbdə tədris davam edir”.
Elşən Qafarov: “Şəkidə baş vermiş hadisə sanitar-gigiyenik normaların gözlənilməməsi, bu işə nəzarət edəcək Gigiyena və Epidemiologiya Mərkəzinin mütəxəssislərinin səriştəsizliyinin nəticəsidir”
Təhsil eksperti Elşən Qafarov isə bildirdi ki, konkret olaraq Şəki məktəbində baş vermiş zərəhərlənmə hadisəsində məktəb məsul deyil: “Ümumtəhsil məktəblərinin mühafizə işinin təşkili ilə bağlı Nazirlər Kabinetinin 19 iyun 2020-ci il 209 saylı Qərarı var. Şəkidə baş vermiş hadisə sanitar-gigiyenik normaların gözlənilməməsi, bu işə nəzarət edəcək Gigiyena və Epidemiologiya Mərkəzinin mütəxəssislərinin səriştəsizliyinin nəticəsidir. Tədris prosesi gedə-gedə orada dezinfeksiya işi aparılıb, sanitariya gigiyena qaydaları kobud şəkildə pozulub, nəticədə müəllim və şagirdlər zəhərlənib. Yəni, burada birbaşa təhsillə bağlı hal kimi qəbul etmək olmaz”.
Elmar Nurəliyev: “Bu kimi problemlər əsasən rayon məktəblərində yaşanır, orada təhlükəsizlik məsələlərinə kimin nəzarət etdiyi məlum deyil”
Təhlükəsizlik üzrə ekspert Elmar Nurəliyev bildirdi ki, məktəblərdə təhlükəsizlik məsələsi ciddi yanaşılmalı məsələdir: “Bu sahədə boşluqlar çoxdur. Nəzərə almaq lazımdır ki, buradakı şagirdlərin çoxu azyaşlıdır və onlar hər zaman təhlükələri görə, məntiqli qərar verə bilmirlər. Təhsilalanların sağlamlığına cüzi belə olsa zərər verəcək təhlükə gözardı edilməməlidir. Bu kimi problemlər əsasən rayon məktəblərində yaşanır. Orada bu təhlükəsizlik məsələlərinə kimin nəzarət etdiyi məlum deyil. Yaxşı olardı ki, hər gün dərs bitdikdən sonra məktəb ümumi, hərtərəfli yoxlanışdan keçirilsin”.
Günel CƏLİLOVA
