Vətənin ölməz qəhrəman oğlu – Amid... - FOTO
Dağlar diyarı Lerikdə Vətən Müharibəsi Qəhrəmanı, şəhid mayor Amid Heydərovun doğum günü ilə əlaqədar tədbir keçirilib.
Rayon İcra Hakimiyyətinin başçısı Əkbər Abbasovun, rayonun hüquq-mühafizə orqanlarının, idarə, müəssisə və təşkilat rəhbərlərinin, şəhid ailə üzvləri, şəhidin döyüş yoldaşları və rayon ictimaiyyətinin qatıldığı tədbirdə əvvəlcə şəhidin məzarını və adına olan parkda ucaldılmış büstü ziyarət olunub, əziz xatirəsi ehtiramla yad edilib.
Dövlət Himninin oxunması ilə açıq elan edilən tədbirdə Azərbaycan Respublikasının müstəqilliyi, ərazi bütövlüyü uğrunda döyüşlərdə həlak olmuş şəhidlərin əziz xatirəsi bir dəqiqəlik sükutla anılıb. Şəhidin Amid Heydərovun həyatı və döyüş fəaliyyəti haqqında ətraflı məlumat verilib.
Söz icra başçısı Ə. Abbasov veriləndə o, bildirib ki, torpaqlarımızın işğaldan azad edilməsi uğrunda gedən döyüşlərdə şəhid olmuş qəhrəman Vətən övladlarının əziz xatirəsi həmişə ehtiramla yad edilir, onların keçdiyi döyüş yolu bir nümunə kimi təbliğ olunur. Xalqımız Azərbaycan Respublikasının Prezidenti, Silahlı Qüvvələrin Müzəffər Ali Baş Komandanı cənab İlham Əliyevin rəhbərliyi ilə dəmir yumruq kimi birləşərək Vətən müharibəsinin qalib tərəfi kimi tarix yazıb, işğal altında olan torpaqlarımızın azad edilməsinə nail olub. Vətən müharibəsində Lerik rayonundan olan qəhrəman oğullarımız da hərbi əməliyyatlarda misilsiz rəşadət göstərib və öz qanları bahasına Vətən torpaqlarını azad ediblər. Şəhid mayor Amid Rəbbil oğlu Heydərov da belə qəhrəmanlardandır. Onun döyüş fəaliyyəti, göstərdiyi şücaət dövlət tərəfindən yüksək qiymətləndirilmiş, ona ölümündən sonra “Vətən Müharibəsi Qəhrəmanı” adı verilmiş, “Vətən uğrunda” və “Cəbrayılın azad olunmasına görə” medallarına layiq görülmüşdür.
Digər çıxışçılar - şəhid atası Hüseyverdi Rəhmətov, Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin Lerik rayon şöbəsinin rəisi polkovnik Arif Həsənov, ehtiyatda olan polkovnik Teymur Əliyev ölkəmizin ərazi bütövlüyü uğrunda gedən döyüşlərdə şəhid olmuş qəhrəman Vətən övladlarının xatirələrinə həmişə ehtiram göstərdiyini, doğum günləri münasibətilə tədbirlərin mütəmadi təşkilini, eləcə keçdiyi döyüş yolunun təbliğ edildiyini deyib, şəhid Amid Heydərovun əziz xatirəsinin onu tanıyanların qəlbində daim yaşayacağını, Vətən övladlarının döyüş yolunun gələcək nəsillərə həmişə örnək olacağını söyləyiblər .
Sonda şəhidin atası Rəbbil Heydərov çıxış edərək şəhid ailələrinə göstərilən diqqət və qayğıya görə ölkə rəhbəri cənab İlham Əliyevə minnətdarlığını bildirib.
Zəfər ORUCOĞLU
Azərbaycan Jurnalistlər Birliyinin üzvü
