Xəzər rayonunun Binə qəsəbəsindən keçən su kanalında antisanitar vəziyyət yaranıb. Mövcud vəziyyətlə bağlı sosial şəbəkələrdə videolar paylaşılıb. Görüntülərdən də aydın olur ki, su kanalı zibilliyə çevrilib və yararsız vəziyyətə düşüb.
Məlumata görə, əvvəllər kanalın suyundan yaxınlıqdakı bağların suvarılmasında istifadə olunub. Ancaq indi həmin ərazidə qeydə alınan antisanitariya vəziyyəti daha da çətinləşdirib.
Maraqlıdır, kanalın bu vəziyyətə düşməsində günahkar vətəndaşlardır, yoxsa qurumlar?
- “Meliorasiya və Su Təsərrüfatı” ASC: “Bələdiyyə və yerli icra hakimiyyəti orqanlarına səslənirik ki, bu ərazilərdə zibil yeşikləri qoyulsun və yeşiklərin sayı artırılsın”
Məsələ ilə bağlı “Meliorasiya və Su Təsərrüfatı” ASC-dən “Bakı-Xəbər”ə bildirildi ki, bu tip problemlər, adətən, yaşayış ərazisinə yaxın kanallarda baş verir: “Bələdiyyə və yerli icra hakimiyyəti orqanlarına səslənirik ki, bu ərazilərdə zibil yeşikləri qoyulsun və yeşiklərin sayı artırılsın. Bu zibillər yığılaraq su təsərrüfatı qurğularını sıradan çıxarır, bəzən isə suyun qarşısı tutulur və kanaldan daşmalar baş verir. Qurumun sahə rəisləri tez-tez nəzarət işləri aparır, həmin kanallar təmizlənir. Lakin həftənin əvvəli təmizlənən kanal həftənin sonu yenidən zibillənmiş olur. Bizim missiyamız kanalı təmizləməkdən ibarət deyil. Müəyyən idarələrimiz nəzarəti həyata keçirir, problemlər olan ərazilərlə bağlı komissiya təşkil olunur, yerli icra hakimiyyəti və bələdiyyələrlə birgə məsələnin həllinə çalışırlar. Təəssüfedici hal budur ki, bununla bağlı cərimə tətbiqi yoxdur. Bu cəriməni isə yerli icra hakimiyyəti orqanları həyata keçirməlidir”.
- Elxan Əliyev: “İcra nümayəndəlikləri onlara həvalə olunan işlərin öhdəsindən gələ bilmir”
Sosial sahə üzrə ekspert Elxan Əliyev “Bakı-Xəbər”ə açıqlamasında qeyd etdi ki, qəsəbələrin idarəçiliyi dəyişməlidir: “Problem ondadır ki, icra nümayəndəlikləri onlara həvalə olunan işlərin öhdəsindən gələ bilmir. Bakıətrafı hansı qəsəbəyə baxırsan, ya zibillər vaxtında aparılmır, ya da yaşayış məntəqələrinin yaxınlığında natəmizlik hökm sürür. Elə yerlər var ki, orada zibil qabları olmadığı üçün sakinlər tullantıları ətrafa atır. Bir növ sözügedən məsələdə bir uyğunsuzluq var. Halbuki, hər il dövlət büdcəsindən məişət tullantılarının daşınması ilə əlaqədar milyonlarla vəsait ayrılır. Problem ondadır ki, bu məqsədlə ayrılan vəsaitlərin müəyyən hissəsi mənimsənilir”.
Günel CƏLİLOVA
