Ölkəmizin orta ümumtəhsil məktəblərinin bəzilərinin rus bölməsində “Azərbaycan tarixi” fənninin dövlət dilində tədris olunmasına başlanıb. Prosesə elm və təhsil naziri Emin Əmrullayevin əmrinə əsasən start verilib.
Belə ki, 2022-2023-cü tədris ilində ölkənin 20 ümumi təhsil müəssisəsinin tədrisi digər dillərdə aparılan bölmələrinin V siniflərində “Azərbaycan tarixi” fənni dövlət dilində tədris edilir. Azərbaycan dilinin milli dövlətçiliyin başlıca rəmzlərindən biri kimi istifadəsi və tətbiqi imkanlarının genişləndirilməsi digər dillərdə təhsil alanların dövlət dili kimi Azərbaycan dilinə, tarixinə, milli-mənəvi dəyərlərə hörmət ruhunda tərbiyə olunmasını təmin etmək məqsədi daşıyır.
Amma nazirliyin bu qərarı birmənalı qarşılanmır. Çünki azərbaycan dilini bilməyən şagirdlər tarix öyrənməkdə çətinlik çəkir.
- Nadir İsrafilov: “Həmin fənlər üzrə rusdilli kontingentlə işləyə biləcək ikidilli peşəkar mütəxəssislərimiz yetərincədirmi?”
Təhsil eksperti Nadir İsrafilovun fikrincə, 5-ci siniflərdə “Azərbaycan tarixi” fənninin dövlət dilində tədrisi Ana dilimizin tətbiq sahəsini və təsir imkanlarını daha da genişləndirir: “Məlumdur ki, ötən ildən etibarən 9-cu siniflər üçün “Zəfər tarixi” dərs vəsaiti dövlət dilində tədris olunur. Rus bölməsində Azərbaycan dilində tədrisin genişləndirilməsinin nə dərəcədə vacib olmasını birmənalı qəbul etsək belə, hansı effekt verəcəyini fərdi mülahizələr və proqnozlar deyil, zaman göstərəcək. Bəllidir ki, ölkəmizdə ingilis, fransız dilli məktəblər var. Çox güman ki, bir müddət sonra bu eksperiment onlara da şamil olunacaq.
Onu da nəzərə almaq lazımdır ki, hər bir xalqın öz dilini, tarixini doğma dildə, vətəndaşı olduğu, yaşadığı ölkənin dövlət dilində bilməsi vətənpərvərlik və milli düşüncə baxımından zəruridir. Ancaq həmin fənlər üzrə rusdilli kontingentilə işləyə biləcək ikidilli peşəkar mütəxəssislərimiz yetərincədirmi?”.
- Təranə Məmmədova: “Bu qərar tək rusdilli məktəblərə deyil, ingilis və fransız dilli məktəblərə də şamil olunmalıdır, Azərbaycan tarixi dövlət dilimizdə tədris olunmalıdır”
Tarix müəllimi Təranə Məmmədova “Bakı-Xəbər”ə açıqlamasnda qeyd etdi ki, ölkəmizin təhsil alan vətəndaşları deyil, coğrafiyamızda digər dillərdə təhsil alanlar da Azərbaycan tarixini bilməlidir: “Bizdə, əsasən, tədris Azərbaycan və rus dilindədir. Rus dilində təhsil alanlara Azərbaycan tarixinin tədrisi zəif idi. Digər dillərdə təhsil alanlar həm Azərbaycan dilini, həm də tarixi öyrənəcəklər. Bu qərar tək rusdilli məktəblərə deyil, ingilis və fransız dilli məktəblərə də şamil olunmalıdır. Azərbaycan tarixi dövlət dilimizdə tədris olunmalıdır”.
Günel CƏLİLOVA
