Bələdiyyələrin fəaliyyəti ilə bağlı narazılıqlar günü-gündən artır. Belə ki, bələdiyyələr öz səlahiyyətlərindən istifadə edərək dövlətə məxsus torpaq, hansısa mülk və ya gölü icarəyə verir. Bu səfər Sabirabadın Əliləmbəyli kəndinin ərazisində olan təbii göl başqa şəxslərə icarəyə verilib.
Sosial şəbəkədə yayılan məlumata əsasən, kənd sakinləri “Axmaz” gölünün icarəyə verilməsinə etiraz edirlər. Onlar “Axmaz”ın ümumi istifadəyə qaytarılmasını tələb edirlər. Sakinlər qeyd edir ki, 25 hektar ərazini əhatə edən “Axmaz” gölü rayonun Əliləmbəyli kəndi ərazisində yerləşməsinə baxmayaraq, vaxtilə ondan Bala-Həşimxanlı və Çöl-Ağaməmmədli kəndinin sakinləri də istifadə edib: “Uzun illər həm göldə olan balıqdan tutmuşuq. Həm də yay aylarında su qıtlığı olan zaman ora yığılan sulardan nasoslar vasitəsilə əkin sahələrinin suvarılmasında istifadə etmişik. İndi isə onlar göldən istifadə edə bilmirik. Çünki 25 hektarlıq “Axmaz” bələdiyyə tərəfindən bir vətəndaşa balıqçılıq və quşçuluğun inkişafı məqsədilə icarəyə verilib”.
Sabirabad rayonu Əliləmbəyli kənd bələdiyyəsi: “Torpaq sahəsi bələdiyyə şurasının qərarı ilə 14 dekabr 2021-ci il tarixdə subicarəyə verilib”
Mövzu ilə bağlı kənd bələdiyyəsi ilə əlaqə saxladıq. Bələdiyyədən bildirildi ki, torpaq sahəsi bələdiyyə şurasının qərarı ilə 14 dekabr 2021-ci il tarixdə subicarəyə verilib. Belə olan zaman vətəndaşların tələbi əsassızdır.
Hüseyn Axundov: “Gölün icarəyə verilməsi düzgün deyil, bununla bağlı sakinlər məhkəməyə müraciət etməlidir”
Hüquqşunas Hüseyn Axundov “Bakı-Xəbər”ə açıqlamasında qeyd etdi ki, bələdiyyə torpaqları ilə bağlı şikayətlərin tendensiyaya çevrilməsinin səbəbi bələdiyyə insitutundakı boşluqlarla bağlıdır. Korrupsiyaya, rüşvətxorluğa meyillik, vətəndaşların laqeydliyi onu göstərir ki, bu insitutda boşluqlar var. Buna görə də ona nə vətəndaşlar inanır, nə də dövlət qurumları ciddi yanaşır: “Bələdiyyə torpaqlarının idarə edilməsi haqqında qanuna görə, ümumi istifadədə olan torpaqlar, ərazi bütövlükdə icarəyə verilməməlidir. Torpaqlar xüsusi mülkiyyətə, istifadəyə və icarəyə verilərkən qanunvericiliyə və sosial ədalət prinsiplərinə əməl edilməlidir. Adambaşına düşən orta torpaq norması və torpaq ehtiyatları azlıq təşkil etdiyi hallarda bələdiyyə torpaq sahəsinin ilk növbədə öz ərazisində yaşayan vətəndaşa və sahibkarlıq fəaliyyəti göstərən hüquqi və fiziki şəxsə xüsusi mülkiyyətə verilməsi barədə qərar qəbul edə bilər. Həmçinin gölün icarəyə verilməsi düzgün deyil. Bununla bağlı sakinlər məhkəməyə müraciət etməlidir. İcarə sənədi olsa belə, hüquqi yolla həmin sənəd qüvvədən düşə bilər”.
Günel CƏLİLOVA
