Məlum olduğu kimi, 2023-2024-cü tədris ilindən başlayaraq yalnız yeni məktəbli formalarından istifadə olunacaq. Xatırladaq ki, ötən ilin mart ayında Baş nazir Əli Əsədov “Dövlət ümumi təhsil müəssisəsi təhsilalanlarının geyim formalarının təsvirlərinin təsdiq edilməsi” haqqında qərar imzalayıb.
Bu Qərar 2022/2023-cü tədris ilindən tətbiq edilir. Nazirlər Kabinetinin qərarında da bildirilib ki, ötən il istifadə olunan geyim növbəti il üçün tətbiq edilməyəcək.
Qeyd edək ki, formalar boz ətək, şalvar, jaket və mavi köynəkdən, 2-ci komplekt isə göy şalvar, jaket və ağ köynəkdən ibarət olacaq. "Bakı Tikiş Evi" (BTE) ASC-nin yaydığı məlumatda qeyd edilir ki, ətək və şalvarlar yun tərkibli parçalardan ibarətdir və qiyməti 25 manatdır. Köynəklər qısaqol və uzunqol 15 manatdır. Yerli istehsal olan jaketlər 25, Türkiyədən aldıqlarımız isə 30 manatdır.
Qeyd etdiyimiz kimi, yeni tədris ilində köhnə məktəbli formalarından istifadə olunmayacaq, ancaq yeni forma olmalıdır. Bu qərar isə valideynlərin narazılığına səbəb olur.
“Hər il eyni formanı almaq, dəyişmək və yaxud tikdirmək, sözsüz ki, həm şagirdi, həm valideyni çıxılmaz vəziyyətə salır və maddi sıxıntı yaradır”
Təhsil eksperti Elçin Əfəndi bildirdi ki, hər yeni tədris ili üçün məktəbli formaları Nazirlər Kabinetinin müvafiq göstərişi əsasında hazırlanır. Valideyinlər də həmin formanı istənilən halda almalıdır. Bu qərar qeyri- qanuni yox, Nazirlər Kabinetinin göstərişinə əsasəndir: “Nazirlər Kabineti tərəfindən sonuncu verilən qərara əsaslansaq, orada 3 ildən bir formaların dəyişilməsi nəzərdə tutulur. Xarici ölkələrlə müqayisə aparsaq, orada da məktəbli formalar ya hər il, ya da 3-5 ildən bir dəyişir. Düşünürəm ki, hər il məktəbli formaları dəyişilməkdənsə, 3 ildən bir dəyişilməsi daha məqsədəuyğundur. Artıq bu yöndə yekun qərar verilməlidir. Vahid məktəbli forması müəyyənləşdirilməli, ondan kənara çıxılmamalıdır”.
Ekspert hesab edir ki, bu zaman mütləq valideynlərin maddi vəziyyətləri nəzərə alınmalıdır: “Hər il eyni formanı almaq, dəyişmək və yaxud tikdirmək, sözsüz ki, həm şagirdi, həm valideyni çıxılmaz vəziyyətə salır və maddi sıxıntı yaradır. Hər il geyim dəyişdikcə valideyn məcbur olub yeni forma alır. Qiymətlər də minimum 80 manat civarında olur, bəzən ondan da baha başa gəlir. Amma bu standart olsa, valideyn əvvəldən tədbirini görər. Yəni övladının hər il müəyyən qədər boy artımını nəzərə alar. Ümumiyyətlə, şagirdlərə geyim məsələsində bir qədər sərbəstlik verilməlidir”.
Günel CƏLİLOVA
