65 yaşdan yuxarı şəxslərin işdən azad edilməsi ilə bağlı qanuna edilmiş dəyişikliyin ləğvi gözlənilir. Sözügedən dəyişikliyə etiraz edən MM-in Əmək və Sosial siyasət komitəsinin sədri Musa Quliyev “Psixi Sağlamlıq Xidmətlərinin Münaqişədən Sonrakı Dövrdə Koordinasiyası və Transformasiyası” layihəsinin aralıq nəticələrinə dair təqdimat mərasimində deyib ki, yaş insanın əmək fəaliyyətinə mane ola bilməz: "Özünü sağlam hiss edən, sertifikasiyadan keçən adamların işdən azad edilməsi ədalətsizlikdir. Biz çalışacağıq ki, bu məhdudiyyəti aradan qaldıraq".
Millət vəkili qeyd edib ki, bu dəyişiklik Milli Məclis tərəfindən irəli sürülməyib: "Bu dəyişiklik müvafiq icra hakimiyyəti orqanları tərəfindən gəlib və doğru deyil. Bu məsələdə ən çox aqressiv münasibət TƏBİB tərəfindən göstərilir. Yaşı tamam olan şəxsi həmin işdən azad edirlər. Bizə bununla bağlı müraciətlər olur. Lakin TƏBİB və Səhiyyə Nazirliyindən bildirilir ki, yaşı tamam olanlar işdən uzaqlaşdırılmalıdır. Nəzərə alaq ki, həkimlərimizin pensiyaları da o qədər yüksək deyil ki, işdən çıxdıqdan sonra yaşayışlarını normal şərtlər daxilində davam etdirsinlər. Psixoloji sosial sağlamlıqdan danışırıqsa, elə özümüz bu addımı atmaqla onların psixoloji sosial vəziyyətinə zərbə vurmuş olduğumuzu nəzərə almalıyıq”.
Maraqlıdır, dəyişiklik 65 yaşdan yuxarı şəxslərin işdən azad edilməsinə son qoyacaqmı?
“Həkimə tələbat olduğu halda, yaşa görə əmək qabiliyyətini itirməyən həkimlərin işdən azad edilməsi doğru deyil”
Sosioloq Aytəkin Kamranqızı bildirdi ki, iş yerlərində işçi ixtisarları süni şəkildə baş verir: “Ən çox əziyyət çəkilən məsələlərdən biri iş yerlərindən ixtisarlarla bağlıdır. 65 yaşı tamam olan müəllim, həkimlər avtomatik işdən çıxarılır. Halbuki, Avropada həkimləri 70 yaşına qədər saxlayırlar. Həkim 65 yaşından sonra harada işləsin? O yaşda olan şəxsin işləmək potensialı varsa, niyə onun biliyindən, təcrübəsindən yararlanmayaq? İllərlə oturuşmuş kadrlar vəzifəsini tərk edib gedir, sonradan onun acı nəticəsini görürük. 65 yaşla bağlı rayonlarda çox ciddi problemlər yaşanır. Misal üçün, müəllim 65 yaşına çatıb, direktor işdən çıxarmağa məcburdur, amma yerinə təyin etməyə müəllim olmur. Elə rayonlarda səhiyyədə də vəziyyət belədir. Özəl təhsil müəssisəsində 100 yaşında müəllim dərs deyə bilər, amma dövlət müəssisəsində yox. Özəl klinikada yüz yaşında həkim işləyər, amma sığorta ilə maliyyələşən dövlət müəssisəsində yox. Burada məntiq yoxdur. Bu qədər həkimə tələbat olduğu halda, yaş senzi tətbiq edib, əmək qabiliyyətini itirməyən həkimlərin işdən azad edilməsi doğru deyil. Həkim peşəkardır. Əgər bu və ya digər hansısa xəstəlik səbəbindən iş qabiliyyətini itiribsə, bu başqa məsələ. Amma bu məsələdə bir qədər daha geniş düşünmək lazımdır”.
Günel CƏLİLOVA
