Masallıda Anar Novruzovun adı böyük qürurla, iftixarla çəkilir. 1976-cı ildə rayonun Ərkivan qəsəbəsində dünyaya göz açmış bu Vətən sevdalısı 2020-ci il Tovuz döyüşlərində yağıya qarşı son damla qanına qədər qəhrəmancasına döyüşərək şəhidlik zirvəsinə ucalıb.
Həmin qanlı-qadalı günlərdən üç il ötsə də, masallılılar öz qəhrəman oğlunu heç vaxt unutmur, xatirəsinin əbədiləşdirilməsi üçün müxtəlif tədbirlər görülür.
Elə bu günlər, yəni şəhid mayorun yaşının 47 ilində anım mərasimi keçirilib. Masallı Rayon İcra Hakimiyyətinin başçısı Araz Əhmədovun və aparatı, hüquq mühafizə, idarə-müəssisə, təşkilat rəhbərlərin, ziyalılar, qəsəbə sakinlərin, döyüş yoldaşların, ictimaiyyət və media nümayəndələrin qatıldığı mərasim Azərbaycan Respublikasının ərazi bütövlüyü uğrunda canlarını fəda edən şəhidlərin əziz xatirəsini bir dəqiqəlik sükutla yad edilməsi ilə başlayıb. Şəhidin uyduğu məzara təzə güllərdən çələng hörülüb. Rayonun rəhbəri Araz Əhmədov çıxış edərək Azərbaycan Ordusunun qüdrətindən, şəhid mayor Anar Novruzovun döyüş zamanı göstərdiyi igidlikdən, onun necə bir vətənpərvər oğul olmasından danışıb.
Masallı rayon Gənclər və İdman İdarəsinin rəisi Sabiq Cahangirov söz alıb şəhid mayor Anar Novruzovun anadan olmasının 47-cı ildönümün yad edilməsi məqsədilə Masallı rayon Gənclər və İdman idarəsinin, “Masallı Gənclər evi” sosial xidmət müəssisəsinin birgə təşkilatçılığı sayəsində məktəblər arasında keçirilən “Tir atıcılığı”, eləcə də Uşaq-Gənclər İdman Şahmat Məktəbi ilə birlikdə keçirilən şahmat üzrə rayon turnirinin qaliblərini elan edərək, onlara diplomlar verilib.
Ərkivan qəsəbə 1, 4 və 5 saylı orta məktəb şagirdlərinin ifasında Vətənə, bayrağa, şəhid Anar Novruzova həsr edilən şeirlər tədbirə qəhrəmanlıq ovqatı gətirib.
Şəhidin ailəsi onlara göstərilən diqqət və qayğıya görə ölkə başçısı, Ali Baş Komandan İlham Əliyevə, Azərbaycan xalqına minnətdarlığını bildirib.
Zəfər ORUCOĞLU Azərbaycan Jurnalistlər Birliyinin üzvü
