Raqim Teymur oğlu Hadıyev İkinci Qarabağ müharibəsində çəkinmədən- qorxmadan odun-alovun içinə atılanda ömrünün 21-ci baharını yaşayırdı.
Bu da ondan irəli gəlirdi ki, Vətən sevgisi lap uşaqlıq illərində Raqimin ürəyinə hakim kəsilmişdi. Bu Vətən sevdalısının ən böyük arzusu döyüş meydanında yağının başını əzib, Vətən torpaqlarını azad görmək idi. Bu amalla könülü müharibəyə gedir. 2020-ci il noyabrın 4-ü torpaq uğrunda can qoymaqla adını tarixə yazır. Şərəfli ölümü xalqına başucalığı olan qəhrəman şəhid Azərbaycanın ərazi bütövlüyünün təmin edilməsi uğrunda döyüş əməliyyatlarına qatıldığı və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə görə Azərbaycan Prezidenti İlham Əliyevin Sərəncamlarına əsasən ölümündən sonra “Vətən uğrunda”, “Cəsur döyüşçü”, Cəbrayılın, Qubadlının azadlığına görə medallarına layiq görülür. Unudulmaz hünər sahibi
Raqim Hadıyev dünyaya göz açdığı Lənkəran rayonunun Alazəpin kəndində orta məktəbi bitirəndə artıq doğma elində yaxşıların sırasında özünə yer etmişdi. Səmimi, saf, məğrur bir gənc kimi tanınırdı. Vətənin müqəddəsliyini hər şeydən əziz tutan Raqim əsgərlik borcunu cəbhə bölgəsində yerinə yetirir. Və mərdliyi, vətənpərvərliyi əsgər yoldaşlarına nümunə olur. “Vətəni qorumaq, məqamı gələndə onun yolunda şəhid olmaq bir övlad kimi bizim şərəfli borcumuzdur” kəlmələri Raqimin dilindən düşmür. Nəhayət ki, İkinci Qarabağ müharibəsində ürəyində yaşatdığı bu müqəddəsliyin yolçusu olur. Şəhidlik zirvəsinə ucalmaqla 30 il düşmənə əsir düşən Vətən torpaqları 44 gün müddətinə azad olunur.
Bəli, 27 sentyabrda başlayan Vətən müharibəsində Raqim Hadıyev əvvəl gündən qəhrəmanlıqla səngərdə vuruşur. And içir ki, Qarabağın hər qarışı uğrunda son damla qanıma qədər düşmənlə vuruşaram. Belə də olur. Cəsur döyüşçü Füzulidə, Cəbrayılda, Hadrutda ağır müharibə meydanında erməni dığalarına qan uddurur. Qubadlı uğrunda gedən haqq savaşımızda da düşmənə sarsıdıcı zərbələr endirir. Nəticədə yağı məğlub olur. Döyüş meydanında şəhidliyi isə torpağı Vətən edir.
Lənkəran elinin igid, cəsur oğlu Raqim çox qısa, lakin qərinələrə bərabər olan bir ömür yaşadı. Vətən naminə şərəfli ölümü onu gələcək nəsillərə örnək olan qəhrəmanlıq zirvəsinə ucaltdı.
Zəfər ORUCOĞLU Azərbaycan Jurnalistlər Birliyinin üzvü
