Bildiyimiz kimi, təhsil - öyrənmək, bilik, bacarıqlar, dəyərlər, inanclar və vərdişlər prosesidir. Təhsil təkcə bu amilləri özündə ehtiva etmir, həm də dövlətçilik işinin əsas göstəricilərindən biri kimi diqqət çəkir. Əbəs yerə deyil ki, ümummilli lider Heydər Əliyev «Təhsil millətin gələcəyidir» demişdir. Bu gün bütün təhsil müəssisələrində bu sahənin inkişafına ciddi fikir verilir, təhsilin monumental-milli dəyər kimi tədqiqi yüksək templə aparılır. Bakı şəhəri 132-134 nömrəli Təhsil Kompleksində də təhsil milli-mənəvi dəyər fonunda təqdir olunur, bu sahəyə xüsusi nəzarət edilir.
Məlumat üçün bildirək ki, dünya şöhrətli şərqşünas alim, filologiya elmləri doktoru, professor Aida İmanquliyeva, general Hakim Abbasov, Xalq artisti Leyla Bədirbəyli və digər tanınmış şəxsiyyətlər 132-134 nömrəli Təhsil Kompleksində təhsil alıblar. Deyildiyi kimi, artıq 160 ildir ki, bu təhsil ocağı sadəcə məktəb deyil, eyni zamanda Bakı şəhərinin “brendi” hesab olunur. Məktəbin tarixinə nəzər salsaq görərik ki, bu tədris müəssisəsi 1863-cü ildə Bakıda ilk dəfə qızlar üçün təlim-tərbiyə müəssisəsi kimi (ilk qızlar məktəbi kimi) təməl qurmuşdur. İllər ötdükcə məktəb öz fəaliyyətini genişləndirmiş, təhsil işində ciddi irəliləyişlər etmişdir.
160 illik tarixi nailiyyətə malik olan 132-134 nömrəli Təhsil Kompleksi Lisey statusuna malikdir, ibtidai və tam orta təhsil, o cümlədən, məktəbəqədər hazırlıq üzrə xidmətlər göstərir, həmçinin, Beynəlxalq Bakalavriat (IB) və 18 illik təcrübə ilə fəaliyyət göstərən Fransız modeli “Ana Məktəb - İcole Maternelle” kimi təhsil proqramları təklif edir.
132-134 nömrəli Təhsil Kompleksi keyfiyyətli və müasir standartlara uyğun tədris prosesi həyata keçirmək üçün milli və beynəlxalq səviyyədə təhsil qurumları ilə qarşılıqlı faydalı əməkdaşlığın inkişafında maraqlıdır.
Yeni tipli təhsil müəssisələrinin yaradılması, səmərəli idarəetmə sisteminin qurulması, müasir standartlara uyğun təhsil prosesinin təşkili, innovasiyaların tətbiqi, istedadlı uşaqların təhsili və inkişafı üçün əlverişli təlim şəraitinin qurulması, eləcə də tarixi ənənənin bərpası məqsədilə Təhsil nazirinin 22.09.2010-cu il tarixli 1257 nömrəli əmrinə əsasən Bakı şəhəri 132 nömrəli məktəbin və Beynəlxalq təhsil kompleksinin (134 nömrəli məktəb və 57 nömrəli uşaq bağçası) bazasında “132-134 nömrəli təhsil kompleksi” yaradılmışdır. 2010-cu ildə adıçəkilən təhsil ocağı Azərbaycan Respublikasının Prezidenti cənab İlham Əliyevin xüsusi tapşırığı ilə əsaslı şəkildə yenidən qurulmuş və 132-134 nömrəli Təhsil Kompleksi adı ilə fəaliyyətini bu gün də uğurla davam etdirir.
132-134 nömrəli Təhsil Kompleksi 1999-cu ildən YUNESKO-nun Assosiativ Məktəblər Şəbəkəsinin (UNESCO Associated Schools Network) üzvüdür. ADA Universiteti nəzdində fəaliyyət göstərən ADA Məktəbinin baza məktəbidir. 132-134 nömrəli Təhsil Kompleksi bir çox Avropa ölkələri, Türkiyə, Rusiya və digər ölkələrin ümumtəhsil müəssisələri ilə qardaşlaşmış məktəblər layihəsi çərçivəsində əməkdaşlıq edir.
132-134 nömrəli Təhsil Kompleksinə təhsilin dövlətçilik işində ümdə rol oynadığını deyən qayğıkeş, tələbkar, təhsili milli-mənəvi dəyərlər fövqünə qaldıran Əməkdar müəllim Sara xanım Xanlarova rəhbərlik edir. Onun rəhbərliyi altında adıçəkilən təhsil kompleksi müasir standartlara cavab verən təhsil bazasına çevrilib, orada istedadlı şagirdlər, belə deyək, cəmiyyətə layiq əsl vətəndaşlar yetişdirilir.
Sara xanım Xanlarova ümummilli lider Heydər Əliyevin təhsil sahəsindəki diqqət və qayğısını yüksək qiymətləndirir. Vurğulayır ki, ümummilli lider Heydər Əliyev təhsilə daim önəm verib, şərəfli, müqəddəs müəllim əməyini yüksək qiymətləndirib. Dahi rəhbər Heydər Əliyevin ideyaları bu gün Prezident İlham Əliyev tərəfindən qətiyyətlə həyata keçirilir, ölkəmizdə təhsilə və təhsil işçilərinə xüsusi diqqət göstərilir. Müəllimlərin əməkhaqqının artırılması onlara olan qayğının daha bir əyani təzahürüdür. Bu gün təhsilimizin inkişafı istiqamətində uğurlu addımlar atılır. Məktəblərin maddi-texniki bazaları daha da möhkəmləndirilir, müasir tələblərə cavab verən yeni məktəb binaları tikilib istifadəyə verilir, müxtəlif layihələr reallaşdırılır, texnoloji yeniliklər tətbiq edilir.
Sara Xanlarova həmçinin, qeyd edir ki, dövlət başçısının təhsilə dair müvafiq sərəncamları təhsil cameəsində böyük sevinc və ruh yüksəkliyi doğurub və bu, cəmiyyətimizdə əhalinin sosial müdafiəsinin gücləndirilməsinə xidmət edən sənədlərdir. Nə xoş ki, Prezident İlham Əliyev və birinci xanım Mehriban Əliyevanın Azərbaycanın tərəqqisi naminə həyata keçirdikləri tədbirlər xalqımız üçün uğurlu bəhrələrdir və bu da dövlətimizin dünyada nüfuzunun daha da yüksəlməsinə, xüsusi söz sahibi olmasına zəmin yaradır. Bu gün təhsil sahəsində aparılan islahatlar səmərəli nəticələr verir, “Azərbaycan Respublikasında təhsilin inkişafı üzrə Dövlət Strategiyası” öz əhəmiyyəti ilə diqqət çəkir. İnanıram ki, təhsilə göstərilən diqqət bu sahəyə böyük töhfələr verəcək, müəllimlik peşəsinə maraq ilbəil artacaq.
Sara Xanlarova ötən tədris ilində Təhsil Kompleksində qazanılan nailiyyətlər barədə məlumat verərək bildirir ki, 2018-2019-cu tədris ilində Təhsil Kompleksini 76 şagird bitirib, nəticə etibarilə məzunların 98 faizi qəbul imtahanlarında yüksək bal toplayaraq nüfuzlu universitetlərə qəbul olublar. Ali təhsil müəssisələrinə keçirilən qəbul imtahanlarında məzunlarımızdan 10-u 600-dən çox bal toplayıb. Məzunlarımız Azərbaycanla yanaşı, ABŞ, Türkiyə, Böyük Britaniya, Rusiya, İspaniya və Gürcüstanın universitetlərinə qəbul olublar. Onlar müxtəlif ixtisaslar üzrə təhsil alacaq, gələcəkdə ölkəmizin inkişafına töhfə verəcəklər. Xatırladım ki, tədris ilində Təhsil Kompleksinin məzunlarından 3-ü qızıl medala layiq görülüb.
Sara xanım Xanlarova dediyimiz kimi, işinə ciddi yanaşan, tələbkar müəllimdir. Rəhbərlik etdiyi təhsil kompleksində də məhz özü kimi istedadlı, təhsilə qayğı ilə yanaşan müəllimlərin fəaliyyət göstərməsini daha məqbul hesab edir və bu prosesə ciddi diqqət ayırır. Adıçəkilən tədris ocağında nəticələrin son dərəcə yüksək, sevindirici olması da elə tələbkarlığın bariz ifadəsidir.
Təəssüflər olsun ki, çox vaxt cəmiyyət işində fəallıq göstərən, işinə ciddi yanaşan, peşəsini canından artıq sevən, dövlətçilik işinə töhfə verən insanlar barədə haqsız, yersiz ifadələr işlədilir, onların uğurlu fəaliyyətinə bilərəkdən kölgə salınır. Sara Xanlarovaya qarşı yönəlmiş qara piyarı - kimlərinsə başlatdığı çirkin kampaniyanı da elə bu prosesin bir istiqaməti kimi qələmə verirəm. Sara xanım kimi nüfuzlu bir müəllimin haqqındakı məqaləni oxuyandan sonra hiddət məni boğdu, düşündüm ki, bu qara qüvvələr nə üçün Allahdan qorxmurlar? Sara Xanlarova kimi bir təhsil işçisinə şər-böhtan atmaq, onun haqqında nalayiq sözlər işlətmək ən azından dövlətçiliyə xəyanətdir...
Mən həm də narahat deyiləm. Çünki ağ vərəq ləkə götürmədiyi kimi, təmiz vicdana da çirkin məqsədlər hopdurmaq mümkün deyil. Əminəm ki, Sara Xanlarova haqqında deyilənlər sadəcə, sabun köpüyü kimi, elə havadaca yox olur. Çünki parlaq nüfuza qarşı qara piyarçılıq etməyi heç Allah da xoşlamır. Bu mənada, bütöv cəmiyyət, mənim timsalımda Sara Xanlarovanı tanıyan hər kəs yaxşı bilir ki, o, vicdanlı müəllim, bacarıqlı kadrdır. Onun milli təhsilimizin əsaslı inkişafında rolu az deyil. Sara Xanlarova adi müəllimlikdən Əməkdar müəllim kürsüsünə qədər çətin, mürəkkəb, lakin çox şərəfli yol keçib, alın təri, əl qabarı və ağır zəhmət hesabına bu kateqoriyaya sahib çıxıb.
Sara Xanlarova haqqında təkcə mən yox, rəhbərlik etdiyi təhsil kompleksində övladları təhsil alan valideynlər, məhz onun kimi bir rəhbərin sayəsində təhsilə daha ürəkdən bağlanan şagirdlər də yüksək fikirlər səsləndirir, ondan son dərəcə razılıq edir, müəllim və rəhbər fəaliyyətindən məmnunluqla danışırlar. Onun təhsilimizin inkişafındakı rolu dövlət və cəmiyyət tərəfindən də yüksək təqdir olunur. Təhsilə töfaə verən insanlar haqda harada uğurlu söz, ifadə işlənirsə, mütləq Sara Xanlarovanın da adı çəkilir, ona ehtiram göstərilir.
Çox sevindirici haldır ki, bu gün cəmiyyətimizdə Sara Xanlarova kimi müəllimlərimiz var.
Eldar Həsənli Azərbaycan Yazıçılar və Jurnalistlər Birliklərinin üzvü, şair-publisist
