Azərbaycanda taksi xidməti göstərən, eyni zamanda taksi xidmətlərinin təşkili, sifarişlərin idarə olunmasını həyata keçirən əksər şirkətlərin məlumat bazası xarici ölkələrdə yerləşir və bu da “Fərdi məlumatlar haqqında” qanuna ziddir.
Bu barədə Rəqəmsal İnkişaf və Nəqliyyat Nazirliyində taksi şirkətlərinin nümayəndələri ilə keçirilmiş görüşdə bildirilib.
Nazirlik rəsmiləri bəyan edib ki, qanuna əsasən, ölkədə fərdi məlumatların informasiya sistemləri dövlət qeydiyyatından keçməlidir. Yalnız bundan sonra fərdi məlumatların toplanılmasına və işlənilməsinə icazə verilir.
Maraqlıdır, bəzi taksi şirkətlərinin məlumat bazası niyə xaricdə yerləşir? Bu problem necə həll olunmalıdır?
Fərhad Eyyubov: “Taksi fəaliyyəti ilə məşğul olan xarici şirkətlər yenidən attestasiyadan keçməlidir”
Azərbaycan Texniki Universitetinin dosenti, texnika elmləri namizədi, nəqliyyat eksperti Fərhad Eyyubov “Bakı-Xəbər”ə açıqlamasında qeyd etdi ki, istənilən sahədə boşluq olanda sahibkarlar o bazara daxil olmaq istəyir: “Danılmaz faktdır ki, nəqliyyat, taksi sahəsində uzun müddətdi boşluq var idi. Yerli sahibkarlar müəyyən səbəblərdən bu sahəyə daxil ola bilmədi. Belə olan halda bazara xarici şirkətlər gəldi. Vaxtilə taksi sahəsində yaşanan pərakəndəlik, qeyri-qanuni nizamlama sayəsində xarici ölkələrdə olan bəzi şirkətlər ölkəmizə ayaq açdı. Təbii ki, onlar da bizim daxili standartlara uyğun xidmət göstərə bilmir. Bu səbəbdən məlum məsələ xüsusi qayda ilə nizama salınmalıdır".
Ekspert hesab edir ki, taksi fəaliyyəti ilə məşğul olan xarici şirkətlər yenidən attestasiyadan keçməlidir. Uyğun olanı varsa, onlara lisenziya verilə bilər. Məlumdur ki, Bakı Nəqliyyat Agentliyinin səlahiyyətləri AYNA-ya verilib. Yoxlama, təftiş aparılandan sonra taksi sahəsində müəyyən nizam-intizam yaradılmalıdır.
Elxan Əliyev: “Məlumat bazasını gizlədən şirkətlərin fəaliyyəti dayandırılmalıdır”
Sosial sahə üzrə ekspert Elxan Əliyev qəzetimizə açıqlamasında qeyd etdi ki, Azərbaycanda aqreqator şirkətlərin fəaliyyətinə ciddi nəzarət olunmalıdır: “Xarici şirkətlərə elə şərtlər qoyulmalıdır ki, gəlib bazarda öz qaydalarını diqtə etməsinlər, Azərbaycan dövlətinin qayda-qanunlarına uyğun işləsinlər. Bu şirkətlərin fəaliyyəti məhdudlaşdırılmalı, ya da elə şərtlər qoyulmalıdır ki, dövlət üçün faydalı olsun. Eyni zamanda digər şirkətlərin də tənəzzülə uğramasına gətirib çıxarmasın. İctimai və dövlət təşkilatları bu istiqamətdə səmərəli əməkdaşlıq qurub, təbliğat vasitəsilə müəyyən nəticəyə nail ola bilərlər”.
Ekspert onu da əlavə etdi ki, bəzi xarici taksi şirkətlərinin fərdi məlumat sistemləri ölkədə qeydiyyatdan keçməyib. Onlar yalnız öz ölkələrində qeydiyyatdan keçib və məlumat bazası xaricdə saxlanır. Bu isə düzgün deyil. Bizə aid məlumat burda, ölkəmizdə olmalıdır. Məlumat bazasını gizlədən şirkətlərin fəaliyyəti dayandırılmalıdır.
Günel CƏLİLOVA
