Bakı şəhərini tikinti bumu bürüyüb. Paytaxtda bir-birindən əzəmətli göydələnlər, çoxmərtəbəli yaşayış evləri, inzibati binalar inşa edilir, lakin çox vaxt tikinti normaları gözlənilmir. Şirkət sahibləri boş ərazi görən kimi həmin yerdə bina inşa etməyə başlayır. Həmin ərazilərin təhlükəli olub-olmaması barədə araşdırma belə aparılmır.
Belə bir hal "Olympus Park" və "Elit Park Kompleksi" tərəfindən inşa olunan binalarda müşahidə edilir. Belə ki, bu şirkətlər Bakıda dəmiryolu relslərinin üzərində çoxmərtəbəli binalar inşa edib.
"Olympus Park" şirkəti tərəfindən inşa edilən binalar Bakı şəhəri, 7-ci mikrorayon, “Dərnəgül” metrostansiyası yaxınlığından keçən dəmiryolu relslərinin 5 metrliyində tikilib. Ərazidə yaşayan sakinlər deyir ki, sözügedən ərazidən keçən dəmiryolu relsləri ilə tezalışan və yanan maddələr daşıyan qatar vaqonları hərəkət edir.
"Elit Park Kompleksi" tərəfindən inşa edilən binalar da qeyd edilən ərazidədir. Bu kompleksdə bir neçə çoxmərtəbəli bina tikilərək, sakinlərin istifadəsinə verilib. Kompleksin sakinlərin özləri də etiraf edir ki, yaşadıqları binalar dəmiryolu relslərinin yaxınlığında yerləşir.
Elnur Fərzəliyev: “Dəmiryoluna ən yaxın məsafədə binaların tikilməsi, təbii ki, qadağandır və buna icazə verilməməlidir”
Əmlak məsələləri üzrə ekspert Elnur Fərzəliyev məlum məsələ ilə bağlı bildirdi ki, binalar tikilərkən bəzi qaydalara riayət edilməlidir: “Neft boruları, yüksək gərginlikli elektrik xətləri, dəmir yolu xətləri və digər qırmızı zolaq hesab olunan ərazilərdə binalar tikilərkən neytral məsafə qorunmalıdır. Dəmir yolunun öz neytral məsafəsi var, binalar təqribən 25-30 metr və ya daha uzaq məsafədə tikilməlidir. Çünki dəmir yolundan istifadə orada yaşayan insanlar üçün təhlükəlidir. Qatar yolunun ətrafındakı binalara, yaşayış massivlərinə baxsaq görərik ki, hər biri çat-çatdır. Çünki hər dəfə qatar keçəndə binalarda titrəyiş baş verir. Bu da evləri həm qəzalı vəziyyətə gətirib çıxarır, həm də yaşayış üçün təhlükəlidir. Məlumdur ki, o qatarlarda neft məhsulları aparırlar, əgər orada hər hansı partlayış baş verərsə, ərazi darmadağın olar. Dəmiryoluna ən yaxın məsafədə binaların tikilməsi, təbii ki, qadağandır və buna icazə verilməməlidir”.
Zaur Qasımov: “Dəmiryoluna yaxın ərazidə tikilinin, yaşayış sahəsinin olması təhlükəlidir”
Təhlükəsizlik sahəsi üzrə ekspert Zaur Qasımov da "Bakı-Xəbər" ə açıqlamasında bildirdi ki, dəmiryoluna yaxın ərazidə tikilinin, yaşayış sahəsinin olması təhlükəlidir: “Məlumdur ki, o qatarlar vasitəsilə yanacaq daşınır. Allah eləməmiş, qəza hadisəsi baş versə, nə kimi fəsadlar yaşanacağını təsəvvür etmək belə çətindir. Bu səbəbdən bina tikilərkən tikiliyə rəy verən qurumlar inşaatın nəyin yaxınlığında olmasına diqqət etməlidir. Düz yolda qatarla evlərin, yaşayış sahəsinin arasında ən azı 20-21 metr məsafə olmalıdır. 5 metr məsafənin olması binanın ömrünü qısaldır. Dəmiryoluna yaxın ərazidə bina tikintisə icazə verən qurumlar bu məsələdə məsuliyyət daşıyır”.
"Azərbaycan Dəmir Yolları” QSC-dən “Bakı-Xəbər”in sorğusuna cavab olaraq bildirilib ki, qeyd olunan ünvanda yerləşən dalan yolu “Azərbaycan Dəmir Yolları” QSC-nin balansında deyil və QSC sözügedən dalan yolu, həmçinin onun ətrafında tikintiyə icazə verilməsinə məsuliyyət daşımır: “Məlumat üçün bildirək ki, dalan yolu - əsas dəmiryol xətləri ilə birləşən, ayrı-ayrı təşkilatlara, müəssisələrə və ya idarələrə xidmət üçün nəzərdə tutulan dəmir yol xətlərinə deyilir.
Belə ki, ADY-nin balansında olmayan dalan yollarının saxlanışına, mühafizəsinə, habelə ətraf mühitin təsirlərindən qorunmasına, həmin dalan dəmir yolu üzərində sahiblik və istifadə hüququ olan hüquqi və fiziki şəxslər məsuliyyət daşıyır”.
Günel CƏLİLOVA
