Məlum olduğu kimi, Prezident İlham Əliyev "Bakı şəhərinin inzibati ərazisində avtomobil nəqliyyatı sahəsində idarəetmənin təkmilləşdirilməsi ilə bağlı əlavə tədbirlər haqqında" Fərman imzalayıb.
Fərman Bakı şəhərinin inzibati ərazisində avtomobil nəqliyyatı, o cümlədən yol hərəkətinin təşkili sahəsində tənzimləmə və idarəetmə mexanizmlərinin təkmilləşdirilməsi, ümumi istifadədə olan avtomobil nəqliyyatı vasitələri ilə müntəzəm sərnişindaşıma və taksi minik avtomobilləri ilə sərnişindaşıma sahəsində rəqabətin, o cümlədən göstərilən xidmətlərin təhlükəsizliyinin və keyfiyyətinin yüksəldilməsi məqsədilə qərara alınıb. Fərmanla Bakı şəhərinin inzibati ərazisində yol hərəkətinin təşkilində iştirak edilməsi, ümumi istifadədə olan nəqliyyat vasitələri ilə müntəzəm sərnişindaşıma və taksi minik avtomobilləri ilə sərnişindaşıma sahəsində tənzimləmənin və nəzarətin həyata keçirilməsi Azərbaycan Respublikasının Rəqəmsal İnkişaf və Nəqliyyat Nazirliyinə həvalə edilib.
Azərbaycan Respublikasının Rəqəmsal İnkişaf və Nəqliyyat Nazirliyinin tabeliyindəki Azərbaycan Yerüstü Nəqliyyat Agentliyi Bakı Şəhər İcra Hakimiyyəti başçısının tabeliyindəki “Bakı Nəqliyyat Agentliyi” publik hüquqi şəxsin ona qoşulması formasında yenidən təşkil edilir. Bakı Şəhər İcra Hakimiyyəti başçısının tabeliyindəki “Bakı Nəqliyyat Agentliyi” publik hüquqi şəxsin balansındakı əmlak Agentliyin balansına verilir.
Bu o anlama gəlir ki, BNA adlı qurum ləğv edilib. Təbiidir ki, belə qərarın verilməsi BNA-ya bəslənən etimadın özünü doğrultmaması səbəbindən baş tutub. Ancaq maraqlıdır ki, qurum hələ də öz adı ilə fəaliyyətini davam etdirir. Hətta ictimai nəqliyyatda gediş haqlarının qalxıb-qalxmayacağına da münasibət açıqlayır.
Bakı Nəqliyyat Agentliyi adından qurumun mətbuat katibi Mais Ağayevin verdiyi açıqlamaya diqqət edək:
“Paytaxtda sərnişindaşıma qiymətlərinin artımı ilə bağlı Tarif Şurasına müraciət etməyib. Bu məsələ hazırda müzakirə mövzusu deyil".
Maraqlıdır ki, son günlər Bakı şəhərində quraşdırılan yeni avtobus dayanacaqlarının da üzərində BNA sözləri yazılıb. Belə olan halda sual ortaya çıxır: qurum ləğv olunubsa, onun adından niyə hələ də istifadə edilir?
Fərhad Eyyubov: “BNA-nın səlahiyyətlərinin hamısı AYNA adlı quruma həvalə olunduğu üçün, belə məsələlərə yeni qurum aydınlıq gətirəcək”
Nəqliyyat məsələləri üzrə ekspert Fərhad Eyyubov “Bakı-Xəbər”ə açıqlamasında bildirdi ki, BNA-nın ləğv edilərək, başqa quruma tabe etdirilməsi ilə bağlı Fərman var: “Ancaq bu proses dərhal baş vermir. Nazirlər Kabinetinə tapşırılır ki, Fərmanın 1-ci və 2-ci hissələri nəzərə alınmaqla, normativ hüquqi aktların təkmilləşdirilməsi ilə bağlı təkliflərini üç ay müddətində hazırlayıb Prezidentə təqdim etsin, Agentliyin nizamnamə fondunun miqdarının artırılması barədə təkliflərini dörd ay müddətində hazırlayıb Prezidentə təqdim etsin, “Bakı Nəqliyyat Agentliyi” publik hüquqi şəxsin balansındakı əmlakın Agentliyin balansına verilməsini üç ay müddətində təmin etsin, Agentliyin maddi-texniki bazasının möhkəmləndirilməsi üçün zəruri tədbirlər görsün və bu Fərmandan irəli gələn digər məsələləri həll etsin.
Rəqəmsal İnkişaf və Nəqliyyat Nazirliyi isə İqtisadiyyat Nazirliyi ilə birlikdə Agentliyin yenidən təşkili, o cümlədən “Bakı Nəqliyyat Agentliyi” publik hüquqi şəxsin fəaliyyətinə xitam verilməsi üçün dövlət qeydiyyatı ilə bağlı zəruri tədbirləri həyata keçirəcək.
Göründüyü kimi, BNA-nın mövcudluğundan gələcəkdə söhbət gedə bilməz. Ancaq onun AYNA adlı qurumun tabeliyinə keçməsi üçün 3 ay vaxt verilir. Sadə dildə buna təhvil-təslim də deyə bilərik. Belə proseslər vaxt apardığı üçün Fərmanda belə vaxt verilir. Bu aralıq müddətdə BNA adı ilə çıxış edə bilirlər. Çünki qurumun səlahiyyəyinə aid çoxlu sahələr var ki, onlar mütləq tənzimləməlidir. Ancaq bu heç də o anlama gəlmir ki, təhvil-təslim üçün nəzərdə tutulan vaxt bitəndən sonra da bu ad qalacaq. BNA-nın səlahiyyətlərinin hamısı AYNA adlı quruma həvalə olunduğu üçün, belə məsələlərə yeni qurum aydınlıq gətirəcək”.
Elməddin Muradlı: “BNA-nın tarixə qovuşduğuna şübhə yeri qalmır”
Digər nəqliyyat eksperti Elməddin Muradlı isə “Bakı-Xəbər”ə bildirdi ku, Prezidentin imzaladığı Fərmanla BNA bir qurumdan alınaraq başqa qurumun tabeliyinə verilib: “Hələ ki, qurum tam ləğv edilməyib. Qurum tam ləğv edilmədiyinə görə onun adından danışılması da mümkündür. Təhvil-təslim prosesi bitən kimi BNA-nın ləğvi ilə bağlı növbəti sərəncam verilə bilər. Yəni BNA-nın tarixə qovuşduğuna şübhə yeri qalmır”.
Məhəmmədəli QƏRİBLİ
