Hər kəsə məlumdur ki, Bakıda fəaliyyət göstərən otellərin gecəlik qiymətləri heç də ucuz deyil. Bir gecəlik otellərdə gecələmək üçün ən azı 80-100 manat ödəmək lazım gəlir. Bu isə kifayət qədər yüksək qiymətdir.
Bu səbəbdən də insanlar gündəlik kirayə verilən evlərə üz tutmağa məcbur olur. Araşdırmalar zamanı məlum olub ki, son zamanlar kirayə mənzillərə təlabat artıb. Gündəlik kirayə mənzillərə tək xarici ölkələrdən gələn turistlər deyil, eyni zamanda, müəyyən bir iş üçün paytaxta gələn yerli vətəndaşlar da üz tutur. Məlumata görə, gündəlik kirayə mənzillərə əsasən əxlaqsızlıqla məşğul olanlar müraciət edir. Çünki otellərdə qalmaq üçün şəxsiyyət vəsiqəsi tələb olunduğundan, bəzi şəxslər bu cür evlərə üstünlük verir. Qeyd etdiyimiz kimi, bu evlərin qiyməti heç də ucuz deyil. Belə ki, bir günlük kirayə evlərin qiyməti 20-60 manat arasında dəyişir. Apardığımız araşdırma zamanı məlum oldu ki, gündəlik kirayə evlərə tələbat yüksəkdir. Maklerlər bildirir ki, bir günlük kirayə evlər ay ərzində cəmi 3-5 gün boş olur.
Maraqlıdır, bu cür evlərdə təhlükəsizlik necə təmin olunur və gündəlik kirayə evlərin nə kimi risqləri var?
Fatimə Hacıbəyli: “Əxlaqsızlıq yuvası kimi istifadə edilən şəxsi evlərdə insan alveri qurbanlarının da cinsi istismar olunması istisna deyil”
“Vəfa” Sosial İctimai Birliyinin sədri Fatimə Hacıbəyli “Bakı-Xəbər”ə açıqlamasında qeyd etdi ki, mətbuatda, internetdə günlük, saatlıq, həftəlik ev kirayəsi ilə bağlı elanlara son vaxtlar tez-tez rast gəlinir. Bu onu göstərir ki, bu cür evlərə tələbat var: “Ailəsinin, yaxud özünün Bakıda yaşaması üçün ev kirayələyən şəxs, təbii ki, uzun müddətlik ev kirayə edir. Çox nadir hallarda Bakıya iş üçün bir-iki günlük gələn şəxslər olur ki, onlar da çox vaxt qohum-əqrabanın evində qonaq qalır, yaxud otellərdə yer sifariş edirlər. Bir neçə saata, bir-iki günlük ev kirayələyənlərin çoxunun məqsədi orada əxlaqsızlıq yuvası təşkil etmək olur. Qiymətlərdən də görünür ki, bir saatlıq, yaxud da bir-iki günlük ev kirayələyənlər bunun üçün heç də az məbləğ ödəmirlər. Belə kirayə evlərin bir günlük haqqı 20-50 manat təşkil edir. Həmin evləri kirayə götürənlərin məqsədi çox vaxt əxlaqsızlıq yuvası saxlamaq olduğundan və onlar bundan çox gəlir əldə etdiklərindən həmin evlərə bu qədər məbləğ ödəməyə də razı olurlar”.
Həmsöhbətimiz hesab edir ki, əxlaqsızlıq yuvası kimi istifadə edilən şəxsi evlərdə insan alveri qurbanlarının da cinsi istismar olunması istisna deyil: "Belə evlərə, ola bilər ki, müştərinin istəyinə uyğun olaraq, onun sifarişi əsasında insan alveri qurbanları olan cinsi istismar edilən qadınlar aparılsın. Yaxud da şəxslər ancaq evin pulunu ödəsin, öz cinsi partnyorlarını o evlərə aparsınlar. Hər iki halda ev əxlaqsızlıq yuvası olduğundan, fahişəliyə cəlb etmə cinayət məsuliyyəti yaradır”.
Hüseyn Axundov: “Kirayə müqaviləsi varsa, evin sahibinin məsuliyyətə cəlb olunma ehtimalı az olacaq”
Hüquqşunas Hüseyn Axundov “Bakı-Xəbər”ə açıqlamasında qeyd etdi ki, günlük kirayə evlərə hər zaman tələbat olub: “Rayondan iş üçün gələn şəxs gecə qalmağa yeri olmadığı üçün həmin evlərdə qalır. Ancaq həmin evlərdən daha çox başqa məqsədlə istifadə olunur. Yəni otelə getmək istəməyən şəxs bu cür evlərə müraciət edir. Nəticədə əxlaqsızlıq yayılır və ev sahibləri də buna şərait yaradır. Bununla bağlı qanunvericilikdə müəyyən cəza də nəzərdə tutulub. Belə ki, həmin mənzildə əxlaqsızlığı kirayəçi təşkil edibsə və mənzil sahibinin bu işdən xəbəri yoxdursa, yəni əlbirliyi yoxdursa heç bir məsuliyyət daşımır. Kirayə müqaviləsi varsa, evin sahibinin məsuliyyətə cəlb olunma ehtimalı az olacaq”.
Niyazi Əliyev: “Gündəlik kirayə işində müəyyən təhlükələr var”
Daşınmaz əmlak sahəsi üzrə ekspert Niyazi Əliyev bizimlə söhbətində bildirdi ki, günlük kirayə mənzil bazarına tələbat son zamanlar artıb: “Bunun səbəbi müxtəlifdir. İnsanlar rahat və heç kimlə rastlaşmadan gündəlik yaşamaq üçün bu cür evlərə üstünlük verir. Onu da nəzərə almaq lazımdır ki, gündəlik kirayə mənzil bazarında vəziyyət hər zaman aktiv olaraq qalıb”.
Həmsöhbətimiz onu da əlavə etdi ki, gündəlik kirayə işində müəyyən təhlükələr və risqlər də var: “Hər şey qanuni formada olmalıdır. Vətəndaş evini gündəlik və ya aylıq kirayə verirsə, bütün risqi üzərindən atmaq üçün rəsmi notarial müqavilə bağlamalı və evdə qalanların şəxsiyyət vəsiqəsinin surətini götürməlidir. Kirayəverənlərin ucbatından evdə hər hansı problem, hadisə baş verməyibsə, onlar orada baş verən heç bir hadisəyə görə məsuliyyət daşımırlar”.
Günel CƏLİLOVA
