Narkomaniya indi müasir dünyanın ən qlobal problemi sayılır. Bu bəlaya meyllilik son illər bizim respublikada da artmağa doğru gedir. Məhz buna görə narkomaniyaya qarşı mübarizədə təkcə hüquq-mühafizə orqanların deyil, ondan yaxa qurtarmaq üçün cəmiyyətin bütün üzvlərinin birlikdə iştirakı olduqca vacibdir.
Yuxarıdakı fikirlər bu günlər Yardımlı rayon Mərkəzi kitabxanada təşkil olunmuş "Gənclərimizi zərərli vərdişlərdən qoruyaq" adlı maarifləndirmə tədbirində çıxış edən natiqlər tərəfindən söylənildi. Aktual bir problemə toxunan tədbir Yardımlı rayon İcra Hakimiyyəti, Gənclər və İdman idarəsi, rayon Polis Şöbəsi və Mərkəzi kitabxananın birgə təşkilatçılığı sayəsində baş tutmuşdu. Tədbir yetkinlik yaşına çatmayanlar və gənclər arasında narkomanlığın yayılmasının, yetkinlik yaşına çatmayanlar tərəfindən törədilən cinayətlərin, həmçinin onların təzyiqlərə, məişət zorakılığına məruz qalma, cinsi və əmək istismarına təhrik etmə, erkən nikaha cəlb olunma hallarının qarşısının alınması məqsədini daşıyırdı.
Tədbir Rayon Polis Şöbəsinin əməkdaşı Tural Quliyevin çıxışı ilə başlandı. O, dedi: - Azərbaycan Respublikası Prezidentinin 2019-cu il 22 iyul tarixli 1334 nömrəli Sərəncamı əsasında təsdiq edilmiş “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2019–2024-cü illər üçün Dövlət Proqramı” nın icrası ilə əlaqədar rayon ərazisində yerləşən ümumtəhsil müəssisələrində yeniyetmə və gənclər arasında mütəmadi olaraq maarifləndirmə tədbirləri aparılır. Narkotik vasitələr və onların fəsadları, insan sağlamlığına vurduğu zərərlər haqqında geniş məlumatlar verilir. Qaldı ki, rayonda hələ də bu zərərli vərdişə qarşı gənclərdə meyllik hiss olunur. Narkotik vasitələrin qanunsuz dövriyyəsinə qarşı mübarizə sahəsində polis şöbəsinin əməkdaşları tərəfindən qətiyyətli tədbirlər bundan sonra da lazım səviyyədə aparılacaq.
Yardımlı rayon İcra Hakimiyyətinin İctimai-siyasi və humanitar məsələlər şöbəsinin baş məsləhətçisi Firəddin Mirzəyev azyaşlıları erkən nikaha cəlb etmə hallarının qarşısını almaq üçün valideynlərə erkən nikahların yol açdığı fəsadlardan söhbət açdı. Gənclər və İdman İdarəsinin rəisi Şəhriyar Şabiyev belə tədbirin müntəzəm təşkilində məqsədin gənclərin cəmiyyətin, dövlətin maraqlarına uyğun olaraq Azərbaycan xalqının dəyərlərinə, dövlətə və dövlətçiliyə sədaqət, vətənpərvərlik və azərbaycançılıq ruhunda tərbiyə olunmasını, bütün zərərli vərdişlərdən uzaq durmağı təmin etmək, onlarda sağlam həyat tərzini və fəal vətəndaş mövqeyini formalaşdırmaq olduğunu bildirdi.
Yardımlı Peşə məktəbinin müəllim-şagird kollektivin, kitabxana əməkdaşların, həmçinin valideynlərin qatıldığı tədbirdə maarifləndirici materiallar paylandı, görüş iştirakçılarını düşündürən suallara Polis Şöbəsinin əməkdaşı Tural Quliyev tərəfindən ətraflı cavab verildi.
Zəfər ORUCOĞLU Azərbaycan Jurnalistlər Birliyinin üzvü
