Bakıda yüzə yaxın qəzalı vəziyyətdə olan bina yaxın vaxtlarda mərhələli şəkildə söküləcək. Bu barədə danışan Bakı Şəhər İcra Hakimiyyətinin başçısı Eldar Əzizov media nümayəndələrinə açıqlamasında bildirib ki, paytaxtda hər ikinci sakin SSRİ vaxtı tikilmiş, tipik çoxmənzilli binalarda yaşayır.
Ona görə də Bakıda köhnə binalar sökülüb əvəzində yeniləri inşa ediləcək. Söküntü sovet dövründə tikilmiş bütün yaşayış binalarına şamil olunacaq. Söküləcək binalar beşmərtəbəli və doqquzmərtəbəlidir.
Məlumdur ki, artıq paytaxtda qəzalı vəziyyətdə olan yataqxanaların sökülməsinə başlanılıb. Ancaq bu hal sürətli olmadığı üçün son zamanlar köhnə, istismar müddəti başa çatan yataqxanalarda partlayış və yanğın hadisələri qeydə alınır.
Xatırladaq ki, bu günlərdə Bakıda məcburi köçkünlərin məskunlaşdığı yataqxanada partlayış olub. Hadisə nəticəsində bir nəfər ölüb, iki nəfər ağır xəsarət alıb. Qeyd edək ki, məcburi köçkünlərin məskunlaşdığı yataqxanalarda yanğın, partlayış hadisələri tez-tez qeydə alınır. Bundan əvvəl də Nərimanov rayonunda üçmərtəbəli yataqxana binasında yanğın hadisəsi baş vermişdi. Bu binaların yaşayış üçün yararsız halda olması belə qəza hadisələrini qaçılmaz edir.
Onu da qeyd edək ki, belə qəzalı yataqxanalarda hələ də yaşayış davam edir. Baxmayaraq ki, yataqxanaların çoxu qəzalı binalar siyahısındadır.
Maraqlıdır, istismar müddətini başa vurmuş, şəhərin görkəminə xələl gətirən yataqxanaların sökülməsi niyə ləngiyir?
Elnur Fərzəliyev: “Bakıda yerləşən yataqxanaların əksəriyyəti o qədər qəzalı vəziyyətdədir ki, uça, dağıla bilər, ona görə də…”
Əmlak məsələləri üzrə eskpert Elnur Fərzəliyev bildirdi ki, yataqxanalar sovet dövründə inşa olunduğundan, çoxu istimar müddətini başa vurub. Bəziləri isə qəzalı vəziyyətdədir: “Bakı və digər rayonlarda sovet dövründən qalmış yataqxanalar var. Bunların bəziləri tələbə yataqxanaları, bəziləri isə zavod və müəssisələrin nəzdində olan yataqxanalardır. Tələbə yataqxanalarının böyük əksəriyyətində məcburi köçkünlər yaşayırdılar. İşğaldan azad olunmuş ərazilərdə yenidənqurma işləri aparılır. Yaxın gələcəkdə tələbə yataqxanalarında müvəqqəti məskunlaşan məcburi köçkünlər öz doğma yurd-yuvalarına köçürüləcək. Artıq bu proses başlayıb. Bir çox ərazilərdə artıq tələbə yataqxanaları boşaldılıb. Yataqxanaların hər biri müxtəlif qurumların balansındadır. Hər hansı dövlət balansında olan inzibati binanın sökülməsi üçün həmin qurumun rəyi olmalıdır. Bu gün məcburi köçkünlərin tərk etdiyi yataqxanaların çoxu qəzalı şəraitdədir. Bakıda yerləşən yataqxanaların əksəriyyəti o qədər qəzalı vəziyyətdədir ki, hər hansı partlayış və zəlzələ nəticəsində o binalar uça, dağıla bilər. Ona görə də ilk növbədə qəzalı yataqxanalar sökülməlidir”.
Elxan Əliyev: “Bakıda binaların bir çoxunun istismar müddəti bitib”
Sosial sahə üzrə ekspert Elxan Əliyev “Bakı-Xəbər”ə açıqlamasında qeyd etdi ki, Bakıda binaların bir çoxunun istismar müddəti bitib: “Sözügedən binalar təxmini 60 il əvvəl tikilib. Nəinki fövqəladə hal, zəlzələ, hətta bu binaların divarlarında evdə və yaxud qonşuda tikinti işləri görüldükdə belə çatlar əmələ gəlir, onların uçması kimi hallar baş verir. Bütün bunlar təhlükəli hesab olunur. Həmçinin, köhnə tikili binalarda həyətyanı meydançaların, yanğın təhlükəsizliyinə dair qurğuların, ehtiyat çıxışlarının olmaması problem yaradan məsələlərdir”.
Günel CƏLİLOVA
