Ramazan ayından sonra yollarda tez-tez uzun-uzadı toy karvanları görünərdi, restoranlarda toy sədası eşidilərdi. Ancaq bu il toy edənlərin sayı azalıb.
Açıqlanan statistik rəqəmlərə əsasən, Bakıdakı şadlıq saraylarında sifarişlərin sayı 67,4 faiz azalıb. Şadlıq evləri də toy sifarişlərinin azaldığını təsdiq edir.
“Xudafərin” şadlıq sarayı: “Əvvəllər orucluqdan sonra hər gün toy yazırdıq, indi heç o da olmadı, bu, Azərbaycanda olmayan haldır”
“Xudafərin” şadlıq sarayının əməkdaşı “Bakı-Xəbər”ə açıqlamasında “Əvvəllər orucluqdan sonra hər gün toy yazırdıq, indi heç o da olmadı. Qonaq sayı az olan toylar da şadlıq sarayı üçün elə də gəlirli deyil. 500 nəfərlik toylar indi maksimum 250 nəfərlə keçirilir. Bu, Azərbaycanda olmayan haldır”- deyə bildirdi.
"Simfoniya" şadlıq sarayı: “Qonaqların sayı çox olan, böyük tutumlu toylar da yoxa çıxıb”
"Simfoniya" şadlıq sarayından bildirildi ki, əvvəllər daha çox toy edərdilər: “Yəqin ki, indi gənclərin işsizliklə bağlı problemləri də toyların azalmasına təsir edir. Qonaqların sayı çox olan, böyük tutumlu toylar da yoxa çıxıb. Çünki müştəri düşünür ki, lazımi pulu sala bilməyəcək qonağı çağırıb ziyana düşməkdənsə daha az adamla toy etsin. Ay ərzində 2-3 toy yazılır”.
Kamran Məmmədli: “Vəziyyət bu şəkildə davam edərsə, şadlıq evlərinin aqibəti sual altında olacaq”
İqtisadçı Kamran Məmmədli “Bakı-Xəbər”ə açıqlamasında qeyd etdi ki, bu məsələnin həm iqtisadi, həm də sosial tərəfi var: “İqtisadi tərəf aydındır. Azərbaycanda şadlıq evlərinin, restoranlarının sayı həddən artıq çoxdur. Təsəvvür edin ki, bu şəbəkə şəhəri tamamilə bürüyüb. O dərəcədə buna ehtiyac yoxdur. Təbii ki, bu gec-tez belə azalmalı idi. Son vaxtlar sahibkarlar daha çox bu sahəyə üstünlük verirlər. Bunun da fərqli səbəbləri var. Vəsaitləri istehsal sahələrinə qoymaq bəzən effekt vermir. Amma xidmət sektoru elədir ki, orada az sərfiyyatla, risqsiz gəlir əldə etmək mümkündür. Məsələn, restoran işlədənlər hər il istehsalla məşğul olmur, əkin əkmir, sadəcə, xidmət göstərərək pul qazanırlar. Bir müddət bu xidmət sektoruna həddən artıq maraq oyandı və şəbəkə böyüdü. Hazırda bir çox toylar təxirə salınıb. Bundan əlavə, imkansızlıqdan toyu çadırlarda edənlər də var. Bütün bu məsələlər toy biznesinə öz təsirini göstərir. İqtisadi tərəflərinə nəzər salanda, bazarda gəlirlər, pul və tələbat azaldığından, tək şadlıq evləri deyil, artıq evlərini, avtomobillərini satışa çıxaranlar da var. Bunu da alan olmayacaq. Çünki tələb o qədər deyil. Üstəlik, hazırkı restoranların, şadlıq evlərinin göstərdikləri xidmətlər əhalinin imkanları səviyyəsində deyil. Adam restoran açıb, xərc çəkib, təbii ki, xərcini çıxarmaq üçün qiymətləri yüksək qoymalıdır. Bu da disbalans yaradır. Toy etmək istəyənlərin çoxu bununla razılaşmır. Rəqabət belə getdikcə, başqası daha sərfəli və uyğun qiymətlər təklifi ilə çıxış edir. Qiymətlər artıq o səviyyədədir ki, bunlar rentabelli olmur. Maya dəyərini bir kənara qoyaq. Təsəvvür edin ki, bir günlük toy üçün şadlıq evində ən azı 1000 manatlıq elektrik enerjisi sərf olunur. Başqa vergilər, sosial xərclər-filan da bura daxildir ki, ödəmək çətindir. Ona görə də təkliflərin sayı artacaq, amma alan olmayacaq”.
Ekspert hesab edir ki, vəziyyət bu şəkildə davam edərsə, toyların sayı artmasa şadlıq evlərinin aqibəti sual altında olacaq. Onlar ya bağlanmalı olacaq, ya da başqa sahə üzrə fəaliyyətlərini davam etməlidir.
Günel CƏLİLOVA
