Məlum olduğu kimi, 15-ə yaxın məscidə qadın dini ayin icraçısı təyin edilib. Bunu Dini Qurumlarla İş üzrə Dövlət Komitəsinin sədri Mübariz Qurbanlı açıqlayıb. Onun sözlərinə görə, qadın dini ayin icraçılarının təyinatı davam edəcək və sayı artacaq.
Qeyd edək ki, məsələ ictimaiyyətdə ciddi müzakirələrə səbəb olub. Qadınların belə bir funksiya yerinə yetirmələri sərt şəkildə tənqid edilib.
Maraqlıdır, niyə qadının dini xadim, imam və ya müctəhid olması mümkün deyil?
“Qadınların da axund kimi təyin olunması olduqca vacibdir, bu qayda bütün məscidləri əhatə edəcək”
İlahiyyatçı Tural İrfan “Bakı-Xəbər”ə açıqlamasında qeyd etdi ki, məscidlərə qadın dini ayin icraçılarının təyin olunması müsbətdir: “Əvvəllər belə bir qayda yox idi. Kimi istəyirdilər, onu da dini ayin icraçısı təyin edirdilər. Çünki axundlara belə bir səlahiyyət verilmişdi. Həmin şəxslərin arasında İran meylli, xurafatçılar olurdu. Həmçinin, o axundların əksəriyyətinin təhsili belə olmurdu. Ancaq axundların yeni qayda ilə təyin olunması, sistemə salınması olduqca mühüm addımdır. Qadınların da axund kimi təyin olunması olduqca vacibdir. Bu qayda bütün məscidləri əhatə edəcək. Ölkəmizdə savadlı, təhsili xanımlarımız, ilahiyyatçı xanımlar yetərincədir. Həmin xanımlar zamanla digər məscidlərə təyin olunacaqlar”.
Həmsöhbətimiz onu da əlavə etdi ki, son zamanlar bəzi xarici qüvvələr bəylərlə yanaşı, qadınlara da təsir göstərir: “Ölkədə kifayət qədər irançı dəstələrin təsirinə düşən qadınlar var. Həmin qadınlar yas yerində, müxtəlif məclislərdə toplaşıb dövlət əleyhinə çıxışlar edir, müəyyən siyasi şüarlar səsləndirirlər. Əsasən də şəhid analarının həssas durumundan istifadə edib, onlara dini rəvayətlər danışaraq hipnoz edib, İrana meylləndirirlər. Bu kimi faktların qarşısının alınması üçün qadın dini ayin icraçılarının olması lazımdır. Hesab edirəm ki, məscidlərə qadın dini ayın icraçılarının təyin edilməsinə qarşı çıxanların heç bir əsası yoxdur. Buna qarşı çıxanların, demək olar ki, hamısı savadsız, cahil şəxslərdir. Nəzərə almaq lazımdır ki, dini ayin icraçısı elə din xadimi deməkdir”.
Həmsöhbətimiz onu da əlavə etdi ki, qadınların din sahəsində inkişafı orta səviyyədə belə deyil. İslam dininə görə, qadın hər bir yüksək məqama kişi ilə bərabər çata bilər. Sadəcə, qadına peyğəmbərlik verilməməsi, imam olmamasının səbəbi ondan ibarətdir ki, uca yaradan xanımın üzərinə bu cür böyük məsuliyyət qoymaq istəmir: “İbadətlərdə, ayinlərin icrasında kişi din xadimləri öndə olmalı, məsuliyyət və yükü onlar götürməlidirlər. Ancaq bununla yanaşı dini rütbə baxımından qadın o rütbəyə çata bilər. Tutaq ki, qadın müctəhid də ola bilər. Ancaq onu təqlid etmək olmaz.
Çünki təqlid edilən şəxs onu təqlid edənlərə bağlı olmalıdır, onların hər mövzuda olan suallarına cavab verməlidir və bütün zamanlarda fasiləsiz olaraq həyatı davam etməlidir. Xəstəlik, adət halları, doğum fasiləsi kimi məsələlər müctəhidin işinə xələl gətirən amildir”.
Günel CƏLİLOVA
