Məlum olduğu kimi, Bakıda yeni bir taksi şirkəti fəaliyyətə başlayıb. Ukraynanın taksi şirkəti "Uklon" Azərbaycanın yerli şirkəti "Umico" ilə əməkdaşlıq edəcək.
“Uklon Azərbaycan” MMC 2023-cü ilin fevralında 100 min ABŞ dolları nizamnamə kapitalı ilə yaradılıb və Azərbaycanda çıxış edəcək 5-ci xarici kapitallı taksi şirkətidir.
Bəs, taksi bazarında yeni şirkətin iştirakı qiymətlərə təsir edəcəkmi?
Ərşad Hüseynov: “Gələcəkdə ölkəmizdə bir neçə taksi şirkəti birləşə və ya öz paylarını götürüb kənara çəkilə bilər”
Nəqliyyat eksperti Ərşad Hüseynov “Bakı-Xəbər”ə açıqlamasında qeyd etdi ki, ölkədə taksi xidmətlərində qiymət ucuzdur: “Bu gün taksi xidmətləri ilə bağlı bazarda çox ciddi rəqabət var. Yenisinin də əlavə edilməsi bu rəqabəti bir az da artıracaq. Hazırda onlayn avtomobil sifarişi qiyməti kifayət qədər ucuzdur. Onların gəliri, demək olar ki, heç maya dəyərini də qarşılamır. Buna görə də daşınma xərclərinin daha da azalacağını gözləmək olmaz. Gələcəkdə ölkəmizdə bir neçə taksi şirkəti birləşə və ya öz paylarını götürüb kənara çəkilə bilər. Çünki taksi xidmətlərinin birləşməsi dedikdə, hər hansı bir istehsal prosesi nəzərdə tutulmur. Burada çox şey virtualdır. Buna görə də hər bir taksi şirkəti öz payının mövcud hissəsini digərinə sata bilər.
O da bəllidir ki, taksi xidmətlərində xaos tüğyan etməkdədir və hazırda bu xidmət nəqliyyat daşınmaları nöqteyi-nəzərindən hüquqi baxımdan normal tənzimlənməyən xidmət sahəsidir”.
Osman Gündüz: “Rəqabətin güclü olduğu bu bazara yeni şirkətin daxil olması xidmətin keyfiyyətinə müsbət təsir göstərəcək, bu baxımdan atılan addımı müsbət dəyərləndirmək olar”
İKT sahəsi üzrə ekspert Osman Gündüz bildirdi ki, Azərbaycanda taksi xidməti ilə məşğul olan xarici şirkətlərin sayı artıb: “Ukraynanın taksi şirkəti “Uklon Umico” da Azərbaycanda fəaliyyətə başlayıb. “Umico” “PAŞA Holdinq” investisiyalı şirkətdir. Belə görünür ki, “PAŞA Holdinq” çatdırılma, e-ticarət, taksi xidməti və s. funksionallıqlara sahib olan “Umico”nu daha nəhəng bir platformaya çevirmək niyyətindədir. Beləliklə, Azərbaycanda fəaliyyət göstərən xarici investisiyalı taksi şirkətlərin sayı 5-ə çatıb:
1. Uber (Bu brendin MDB-də sahibi “Yandex”dir. Belə ki, xeyli müddətdir Amerikanın qlobal taksi şirkəti olan “Uber” Azərbaycanda öz payını Rusiyanın “Yandex” şirkətinə satıb);
2. Bolt (Estoniya)
3. Yango (Rusiya, Yandex)
4. Maxim (Ukrayna)
5. Uklon Azərbaycan (Umico, PAŞA Holdinq)”.
Ekspert onu da əlavə etdi ki, taksi xidmətinin keyfiyyəti ilə bağlı zaman-zaman çoxlu narazılıqlar qeydə alınır: “Belə bir şəraitdə “Uklon”un “Umico” ilə əməkdaşlıq çərçivəsində yerli şirkət olaraq bazara daxil olması çox maraqlıdır. Düşünmək olar ki, rəqabətin güclü olduğu bu bazara yeni şirkətin daxil olması xidmətin keyfiyyətinə müsbət təsir göstərəcək, bu baxımdan atılan addımı müsbət dəyərləndirmək olar. Lakin burada digər yerli taksi şirkətlərinin, vergi ödəyiciləri olan taksi sürücülərinin rəqabətə davamlılığı ilə bağlı risqlər də qaçılmaz ola bilər”.
Günel CƏLİLOVA
