İkinci Qarabağ müharibəsində qanı bahasına xalqına qələbə sevincini yaşadan igidlərdən biri də Famil Habil oğlu Əlizadədir.
Müharibənin ilk günlərində cəbhəyə könüllü yollanıb. Füzuli rayonunun alınmasında düşmənə qan uddurub, onlarla canlı qüvvəsini, neçə-neçə hərbi texnikasını məhv edib. Yuxarı Əbdürrəhmanlı kəndinin azadlığı naminə xüsusi şücaət göstərib. Döyüşlərin birində yaralansa da, müharibədən qalmır. Oktyabrın 21-də son nəfəsinə qədər erməni dığalarla mübarizə aparıb vuruşa-vuruşa şərəfli şəhidlik zirvəsinə ucalıb. Milyonların ürəyində özünə məkan quran igid Vətən sevdalısı ölümündən sonra dövlət tərəfindən III dərəcəli “Vətənə xidmətə görə” ordeninə, “Cəsur döyüşçü”, “Vətən uğrunda”, Füzulinin və Xocavəndin azadlığına görə medallara layiq olub .
Adında bütöv bir xalqın qəhrəmanlıq simvolunu yaşadan Famil Vətən yolunda şəhid olanda yaşı 21 idi. Masallı camaat örnək ömür sahibli oğlu ilə fəxr edir. Ərkivan qəsəbəsində yaşadığı küçə ölməz qəhrəmanın adını daşıyır. Xatirəsinə digər işlər də görülür. Adəti üzrə keçən illərdə olduğu kimi, yenə də doğma qəsəbədə qəhrəmanın doğum günü qeyd edilib. Mərasımdə onun doğmaları şəhid ailələri, müharibə veteranları, qəsəbə sakinləri, ictimaiyyət nümayəndələri məzarına baş çəkib, sevdalanıb əbədi sinəsinə baş qoyduğu torpağa təzə güllərdən çələng hörüblər.
Cəsur döyüşçünün məzarı önündə çıxışlarda yağı düşmənin bağrını yararaq qəhrəmanlıq tarixi yazan Familin həyat və döyüş yolundan böyük iftixarla söz açılıb. Oda bildirilib ki, üç rəngli qələbə bayrağımızı əzəli, əbədi yurd yerimiz Qarabağ torpaqlarında ucaldan igid Vətən oğulları ölməz. Şəhidlər bizim ürək ağrimiz, həm də iftixar, qürur yerimizdır. Müstəqil Azərbaycan dövləti var olduqca onlar qəlblərdə əbədi yaşayacaq.
Dövlətimiz tərəfindən şəhid ailələrinə göstərilən diqqət və qayğıya görə minnətdarlıq edən şəhidin atası Habil Rəhimov deyib ki, şəhid qanı axmayan torpaqdan Vətən olmaz. Oğlum də məhz belə bir müqəddəs yolda öz canını fəda etdi. İndi xalqım Familin adını özünə əziz bilir. Oğlum şərfli bir həyat yaşamaqla Vətəninə, millətinə baş ucalığı gətirdi...
Mərasim Ərkivan qəsəbə 3 saylı tam orta məktəb şagirdlərinin ifasında Vətənə, şəhidlərə, Famil Əlizadəyə həsr edilən şerlərlə tamamlanıb.
Zəfər ORUCOĞLU Azərbaycan Jurnalistlər Birliyinin üzvü
