Son illərdə Bakının dünyanın gözəl şəhərlərindən birinə, yaşıl parklar və bağlar məkanına çevrilməsi istiqamətində müxtəlif layihələr həyata keçirilir. Prezident İlham Əliyevin təşəbbüsü və tapşırığı ilə həyata keçirilən abadlıq-quruculuq işləri nəticəsində paytaxtımızın gündən-günə gözəlləşdiyi hər kəsə məlumdur. Amma bəzən bu tədbirlərə kölgə salanlar da olur. Müxtəlif şəxslər tərəfindən ağaclar, yaşıllıqlar qanunsuz şəkildə məhv edilərək yerində iaşə və digər xidmət obyektləri tikilir və ya parklanma yerləri salınaraq qeyri-qanuni şəkildə gəlir əldə edilir.
Belə hal Xətai rayonu Məhəmməd Hadi küçəsində qeydə alınıb. Həmin küçədəki marketlə üzbəüz ərazi mart ayının sonunda hasara alınıb. Qeyd edək ki, hasara alınan ərazidə xeyli sayda iri ağac olub. Lakin aparılan tikinti işləri zamanı həmin ağaclar məhv edilib. Bu günlərdə rayon ərazisində yaşayan sakinlər sosial şəbəkədə yazaraq qeyd ediblər ki, rayon ərazisində olan yaşıllıq məhv edilib.
“İllərdir mövcud olan bu problemi həll etmək üçün ortaya kompleks yanaşma qoyulmalıdır”
Ekoloq Flora Hacıyeva “Bakı-Xəbər”ə açıqlamasında qeyd etdi ki, illərdir mövcud olan bu problemi həll etmək üçün ortaya kompleks yanaşma qoyulmalıdır: “İndiyə qədər bu problemin köklü həlli ilə bağlı ciddi səy göstərilməyib. Problem ondadır ki, yaşıllıqların məhv edilməsinin arxasında müəyyən dairələr dayanır. Bunun nəticəsidir ki, hansısa cərimə sanksiyalarından sonra yenə öz bildiklərini edirlər. Çətini ağacları kəsməkdir, ondan sonra qanunsuz tikinti işləri aparmaq elə də çətin deyil. Hansısa məmurlar bunu qabaqcadan, təbii ki, qeyri-rəsmi olaraq sahibkarlarla razılaşdırır. Buna uyğun olaraq da yaşıllıqlar məhv edilir. Cərimə olunsalar da, bir müddət sonra öz işlərini görürlər. Bu mənada, ictimai nəzarət gücləndirilməlidir. Belə hallar baş verəndə dərhal müvafiq qurumlara məlumat verilməlidir. İkincisi, kəsilən ağacın yerində ağac əkilməli və onun orada qalmasına nəzarət edilməlidir. Bəzən formal olaraq kəsilən ağacın yerinə ting əkilir, sonra o ting oradan xəlvətcə götürülür. Ona görə də Ekologiya və Təbii Sərvətlər Nazirliyi buna nəzarəti artırmalıdır. Qurum yeni bir ağacın əkilməsini dərhal icra etməlidir. Yoxsa yalnız cərimə etməklə problem həllini tapmayacaq”.
Ekspert onu da əlavə etdi ki, ağacların kəsilməsi cinayətdir və bunu Azərbaycan qanunvericiliyi də tanıyır. Belə ki, Cinayət Məcəlləsinin 259-cu maddəsi məhz “Qanunsuz ağac kəsmə” adlanır. Maddəyə görə, meşələrdə və ya xüsusi mühafizə olunan təbiət ərazilərində ağacların, kolların və ya digər yaşıllıqların, eləcə də meşə fonduna daxil olmayan ağacların, kolların və ya digər yaşıllıqların qanunsuz kəsilməsi (götürülməsi) xeyli miqdarda ziyan vurduqda beş min manatdan yeddi min manatadək miqdarda cərimə və ya iki ilədək müddətə islah işləri və ya iki ilədək müddətə azadlığın məhdudlaşdırılması və ya üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə və ya edilməməklə iki ilədək müddətə azadlıqdan məhrumetmə ilə cəzalandırılır.
Günel CƏLİLOVA
