Parklar və xüsusilə də oradakı attraksionlar uşaqlar üçün nə qədər cəlbedici olsa da, təhlükəli yanları da az deyil. Onların vaxtlı-vaxtında texniki baxışdan keçməməsi, nəzarət altında olmaması faciəvi halların yaşanmasına da gətirib çıxara bilir.
Məlumdur ki, havaların isinməsi ilə parklarda, istirahət məkanlarında attraksionlara təlabat çoxalır. Ancaq narahatedici məsələ attraksionların təhlükəsizliyidir. Paytaxt ərazisində olan parkların əksəriyyətində köhnə attraksionlar mövcuddur. Həmin attraksionların çirkli olması bir yana, işləməsi üçün quraşdırılan elektrik avadanlıqlarının açıq şəraitdə, uşaqların əli çatan yerlərdə qoyulması olduqca təhlükəlidir.
“Parklardakı attraksionların işləməsi üçün istifadə olunan elektik avadanlıqları həm uşaqların əli çatan yerdə olur, həm də üstü açıq olur”
Sosial sahə üzrə ekspert Elxan Əliyev “Bakı-Xəbər”ə açıqlamasında qeyd etdi ki, parklarda xidmət göstərən attraksionlar özəl şirkətlərə məxsusdur. Bunun hökumət tərəfindən təyin olunan standart qiyməti yoxdur: “Təhlükəsizlik baxımından, attraksionlar hər gün yoxlanmalı, onlara xüsusi nəzarət edilməlidir. Hər bir attraksionun konkret rəhbərliyi var. Rəhbərliyin də ən vacib vəzifələrindən biri həmin attraksionların təhlükəsizliyinin təmin edilməsidir. Bunun üçün konkret olaraq attraksionlarda təhlükəsizlik məsələlərinə nəzarət edən mütəxəssislər var. Onlar məhz həmin attraksionun işlək vəziyyətdə olarkən hansı təhlükələr yarada biləcəyi və həmin təhlükələrin qarşısını necə almaq kimi məsələlər üzərində işlər aparırlar. Bu və ya digər formada attraksionların təhlükəsizlik məsələlərini təmin edirlər. Bu, ideal mənada belədir. Konkret olaraq yay aylarında attraksionlardan daha çox istifadə olunur. Amma məsələ ondan ibarətdir ki, gündə bunlardan istifadə edən minlərlə insanın heç də hamısı o attraksionlardan təhlükəsizlik istifadə qaydaları haqda məlumatlı olmur. Belə məqamda öhdəlik rəhbərliyin üzərinə düşür. Onlar təhlükəsizlik məsələlərini bir neçə aydan bir yox, hər gün nəzarətdə saxlamalıdırlar. Bu texnikadır. İstənilən vəziyyətdə sıradan çıxa bilər. Elə bir vəziyyət yarana bilər ki, insanların bu qurğudan istifadəni düzgün həyata keçirməməsi nəticəsində həmin texnika, qurğu sıradan çıxa bilər. Nəticə etibarilə bunu hər gün nəzarətdə saxlamaq lazımdır. Hər gün yoxlanışlar keçirilməli, bütün qurğular sınaqdan keçirilməlidir. Yalnız bundan sonra insanların ixtiyarına verilməlidir. Bu birinci elementdir. Ikinci element isə insanların həmin qurğulardan necə gəldi istifadə etməsidir. İnsanlar kortəbii şəkildə pullarını verməklə atraksiondan istifadə edirlər. Amma orda hansısa xoşagəlməz hadisə baş verəndə vəziyyət arzuolunmaz müstəvidə inkişaf edir. Beləliklə, bir tərəfdən təhlükəsizlik tədbirləri gücləndirilməli, digər tərəfdən insanlar maarifləndirilməlidir”.
Həmsöhbətimizin sözlərinə görə, uşaqların sevincinə səbəb olan attraksionlarda təhlükəsizlik qaydalarına tam şəkildə əməl olunmur. Həmin qurğuların işləməsi üçün istifadə olunan elektik avadanlıqları həm uşaqların əli çatan yerdə, həm də üstü açıq olur. Həmin attraksiona nəzarət edən şəxsi uşağın sağlığı deyil, iki-üç dəqiqə alacağı 2 manat düşündürür. Halbuki, elektrik naqilinin üstünü qapatmaq və ya uşağın görə bilmədiyi yerdə saxlamaq elə də çətin iş deyil.
Ekspert onu da əlavə etdi ki, bu gün parklarda olan attraksionların qiyməti valideynlərin haqlı narazılığına səbəb olur. Attraksionlardan istifadə edən vətəndaşlar xidmət qarşılığında qəbz alır. Qəbz əsasında da, heç şübhəsiz ki, gəlirin müəyyən miqdarı vergiyə ödənilir. Qiymət narazılığına gəldikdə isə, xidmətlər özəl sektora aid olduğu üçün dövlət standart təyin etmir.
Günel CƏLİLOVA
