Son illər ev almaq istəyən vətəndaşların aldadılması az qala adi hala çevrilib. Məlumat üçün qeyd edək ki, cinayət qanunveriliyində belə əməlin adı dələduzluq adlandırılır və belə əməlləri törədənlər üçün ağır cinayət məsuliyyəti nəzərdə tutulub.
Son illərdə Bakıda tikinti işləri ilə məşğul olan xeyli sayda şirkət (daha doğrusu, şirkət rəhbərləri) dələduzluqla məşğul olmaqla gəlirlərini artırmaqda, paralel olaraq vətəndaşlara külli miqdarda ziyan vurmaqda davam edir. Təəssüf ki, həmin tikinti şirkətləri vətəndaşlara şirnikləndirici vədlər verərək, arxalarında yüksək çinli dövlət məmurlarının dayandığını iddia edərək, nəticədə insanları daha rahat şəkildə aldadırlar.
Milli Məclisin ötən iclasında millət vəkili Rüfət Quliyev çıxış edərək bildirib ki, “Bakı İnşaat” MMC insanları aldadır, insanların pulların alırlar, amma mənzili tikib vermirlər, aldadırlar, ləngidirlər: "İnsanların pulunu alıb 4-5 aydır ki, yubadırlar. Köməkçim dəfələrlə həmin şirkətin rəhbəri ilə əlaqə saxlamaq istəsə də, zənglərə cavab verilmir, söhbətdən qaçırlar. Belə şirkətlərə qarşı müvafiq tədbirlər görülməlidir".
Səslənən ittihamlarla bağlı “Bakı İnşaat” MMC ilə əlaqə saxladıq. Şirkətdən "Bakı-Xəbər"ə bunlar bildirildi: "Rəhbərlik "Bakı İnşaat” MMC-ni yeni alıb. Biz bu şirkəti bir aydır almışıq. Xoşagəlməz hallar bizdən əvvəlki rəhbərliyin dövründə olub".
“Bakı İnşaat” MMC: "Xoşagəlməz hallar bizdən əvvəlki rəhbərliyin dövründə olub"
Daşınmaz əmlak məsələləri üzrə ekspert Nüsrət Ibrahimli "Bakı - Xəbər"ə açıqlamasında qeyd etdi ki, MTK-ların bu yola əl atmasının bir neçə səbəbi var, bundan isə insanlar əziyyət çəkir. “MTK-lar vətəndaşları müxtəlif səbəblərdən aldadırlar. Bunların çoxu bunu bilə-bilə edir. Niyə belə edirlər? MTK-ların ortada maliyyə problemləri olur, ya tikintini davam etdirə bilmirlər, ya külli miqdarda vergi borcları olur. Bu halda fikirləşirlər ki, mənzilləri təkrar satışa çıxarıb sataq, borcları bağlayaq, növbəti layihəni həyata keçirəndə ikinci, üçüncü dəfə satılanları mənzillə təmin edək. Yəni bəziləri pula görə edir. Bəzən isə bu problem işçilərin səhlənkarlığından, haqq-hesabı düzgün apara bilməməsindən qaynaqlanır. Səhvən də belə şeylər ola bilir, amma MTK-lar daha çox bu qanunsuzluğa, insanları aldatmaq yoluna maliyyə problemlərinə görə əl atırlar. Maliyyə problemi ilə qarşılaşanda həmin tikinti şirkətləri, yaxud investor belə bir qara varianta əl atır. İnsanlar çalışmalıdır ki, bu kimi tikinti şirkətlərinin toruna düşməsinlər. Ona görə də, vətəndaşlar çıxarışı olmayan binalardan mənzil almaqdan çəkinməlidirlər. Çıxarışı olmayan binalardan mənzil məsələsində hər zaman risq var. Yalnız o binalardan mənzil almaq məsləhətdir ki, onların Dövlət Reyestr Xidmətindən çıxarışları var. Bu risqlərdən yayınmaq lazımdır. Aldadılan vətəndaşların məhkəməyə müraciət etməkdən başqa yolu yoxdur, odur ki, vətəndaşlar məhkəmə qaydasında bu məsələnin həllinə nail olmalıdır”.
Ekspert onu da əlavə etdi ki, bu kimi problemlərin yaranmasına səbəb tikilən binalarda satılan mənzillərin hər hansısa bir dövlət orqanında reyestrinin aparılmamasıdır: “Möhür, imza, müqavilə və s. hər biri MTK rəhbərində olduğuna görə, bu adam istəsə bir mənzili sahiblərindən xəbərsiz 10 adama da sata bilər. Bu isə yalnız bina tikilib təhvil verildikdən sonra, yəni adamlar evinə gəlib sahiblik edəndə bəlli olar. Yəni problem ondadır ki, bunun Azərbaycanda reyestri aparılmır və vahid bazası yoxdur".
Leyla QARAXANLI
