Türkiyədə baş vermis, minlərlə insanın ölümünə, yüz minlərlə insanın evsiz qalmasına səbəb olmuş 7.7 ballıq zəlzələdə minlərlə yaşayış binasının dağılması bir çox Bakı sakinində də narahatlıq və suallar yaradıb. Yaşanan dəhşətli zəlzələdən sonra Bakı sakinlərinin yaşadıqları binanın necə tikilməsi ilə bağlı narahatlığı yenidən artmağa başlayıb.
Bakıda 17 mərtəbəli binanın sakinləri də təhlükəli vəziyyətdən narahatdır.
Belə ki, Xətai rayonu, Həsən Salmani küçəsi 17 ünvanında “Sahil” MTK-nın tikdiyi bina layihədə 17 mərtəbəli nəzərdə tutulsa da, binaya 1 mərtəbə də əlavə olunub. Sakinlər sosial şəbəkələrdə qeyd edir ki, binaya qanunsuz olaraq 18-ci mərtəbə tikilib. Məlumata görə, 17 mərtəbəli binanın 18-ci mərtəbəsində mansard salınıb və qanunsuz olaraq satılıb.
Maraqlıdır, layihə 17 mərtəbəli olduğu halda əlavə mərtəbənin tikintisi nə dərəcədə düzgündür? Belə olan halda həmin binanın bünövrəsi, dayaqları zəifləmir?
Xətai RIH: "İcra Hakimiyyətinin bu gün tikinti ilə bağlı sərəncam vermək hüququ yoxdur"
Məsələ ilə bağlı Xətai Rayon İcra Hakimiyyətindən bildirildi ki, bu cür icazələrin hər biri Bakı şəhər Arxitektura Komitəsi tərəfindən verilir. İcra Hakimiyyətinin bu gün tikinti ilə bağlı sərəncam vermək hüququ yoxdur. Bütün bu işlər sözügedən qurum tərəfindən həyata keçirilir.
Zaur Qasımov: "Binalar tikilərkən müəyyən norma daxilində tikilir, sonradan artırmalar isə əlavə yükdür, bu hal.."
Təhlükəsizlik sahəsi üzrə ekspert Zaur Qasımov "Bakı-Xəbər" ə açıqlamasında bildirdi ki, belə bir tikintinin aparılması yolverilməzdir: "Layihədə nəzərdə tutulsa belə, artıq istismara verilmiş, yaşayış gedən binada tikinti aparmaq olmaz. Binada yaşayış varsa, bu zaman tikintinin orada yaşayanlar üçün nə dərəcədə təhlükə yaradıb-yaratmayacağı da qiymətləndirilməlidir. Bu hal binaya giriş-çıxış zamanı da müəyyən təhlükə yarana bilər. Küləkli hava şəraitində bu xüsusilə təhlükəli ola bilər".
Ekspert onu da əlavə etdi ki, binalar tikilərkən müəyyən norma daxilində tikilir. Sonradan artırmalar isə əlavə yükdür. Bu hal həm ümumi görünüşə xələl gətirir, həm də binanın təhlükəsizliyi sual altında qalır. Yaşayış binasına əlavə dəyişiklik edilərsə, bunun üçün müvafiq qurumların rəyi olmalıdır. Onu da deyim ki, binaya edilən artırma aşağı mərtəbələrdədirsə, binaların konstruksiyasına zərər vermir. Lakin yuxarı mərtəbələrdəki qanunsuz əlavələr binaya ağırlıq salır, bünövrəsini zədələyir. Zəlzələ olan kimi həmin tikililər aşacaq, çünki heç bir memar rəyi nəzərə alınmayıb, konstruktorla işlənilməyib. Binalar tikilərkən müəyyən norma daxilində tikilir. Sonradan artırmalar isə əlavə yükdür".
Günel CƏLİLOVA
