Dini Qurumlarla İş üzrə Dövlət Komitəsi(DQİDK) İslam dininə aid ibadət yerlərində (məscidlər) vakant vəzifələrin tutulması üçün müsahibə elan edir. Müsabiqəyə 19 məscid təqdim edilib.
Bunlar Səbail rayonu İçərişəhər "Cümə" məscidi (imam müavini), Binəqədi rayonu "Heydər" məscidi (qadın dini ayinlərin icraçısı), Nərimanov rayonu "Cümə" məscidi (imam müavini), Nəsimi rayonu "Hacı Əjdərbəy" məscidi (qadın dini ayinlərin icraçısı), Nəsimi rayonu "Məşədi Dadaş" məscidi (imam müavini), Yasamal rayonu "Təzəpir" məscidi (qadın dini ayinlərin icraçısı), Qaradağ rayonu Lökbatan qəsəbəsi "Rəsulullah" məscidi (imam müavini), Qaradağ rayonu Qobustan qəsəbəsi "Şamlı" məscidi (imam müavini), Şəmkir şəhəri "Cümə" məscidi (imam), Şəmkir şəhəri Çinarlı qəsəbəsi "Hacı Xədicə" məscidi (imam müavini), Şirvan şəhəri "Zeynalabidin" məscidi (imam), Bərdə şəhəri "Cümə" məscidi (qadın dini ayinlərin icraçısı), Lənkəran şəhəri Böyük Bazar "Cümə" məscidi (qadın dini ayinlərin icraçısı), Astara rayonu Kijəbə qəsəbəsi "Lovayın" məscidi (imam müavini), Quba rayonu Zərdabi qəsəbə məscidi (imam müavini), Xaçmaz şəhəri "Təzə şəhər" məscidi ( imam müavini), İmişli şəhəri "Cümə" məscidi (imam), Gəncə şəhəri "Şah Abbas" məscidi (qadın dini ayinlərin icraçısı), Gədəbəy rayonu Yeni yaşayış massivi "İlyas Həsənoğlu" məscidir (imam müavini).
Müsabiqə necə, hansı prosedurla həyata keçirilir? Şəffaflıq necə təmin olunur?
“Bu, dini kadrların saf-çürük olunması və təyinatdan sonra nəzarətdə saxlanılması yolunda öz effektini tezliklə verəcək”
Milli Cəbhə Partiyasının (MCP) sədr müavini, tanınmış ilahiyyatçı Tural İrfan “Bakı-Xəbər”ə şərhində bildirdi ki, bu istiqamətdə görülən işlər müsabiqənin şəffalığına şübhə yeri qoymur: “Əvvəlki dövrlərdə bu sahə ilə məşğul olan qurumların, təşkilatların iş üsuluna nəzər salsaq və analiz etsək belə qənaətə gələ bilərik ki, bu gün Dini Qurumlarla İş üzrə Dövlət Komitəsinin keçirdiyi müsabiqələrdə tətbiq edilən üsullar ən peşəkar, ən mükəmməl üsullardır. Mən qurumun təqdim etdiyi müsabiqə şərtləri ilə tanışam və orada çox mühüm məsələlər nəzərə alınıb. Orada iddiaçıların bilikləri, dünya görüşləri, dövlətçiliyimiz, qanunlarımız haqda bilgiləri yoxlanacaq, test ediləcək. Burada eyni zamanda “Qurani-Kərim”in düzgün şəkildə oxunması və başqa məsələlər də imtahanda soruşulacaq. Həmçinin də bu vəzifələri tutmaq istəyən şəxslərin özlərinin də əlaqədar qurumlar tərəfindən araşdırılması müsbət haldır ki, onların kimliyi bizə məlum olsun. Bütün bunlarla yanaşı burada bir boşluq var, bu da ondan ibarətdir ki, Dini Komitə mövcud olan kadrların içindən yaxşısını və yararlısını seçməyə məcburdur. Yəni olanların içindən yaxşısını seçir. Amma olmayan yerdə Komitənin təyin etdiyi adamlar yaxşıdır. İllər boyu ki, dini ibadət yerlərinə təyinatlar Dini Komitənin səlahiyyətində olmayıb, o zamanlar QMİ İrana, dünyanın başqa ölkələrinə dini təhsil almaq adı ilə getmək istəyən hər kəsin əlinə kağız verib oxumağa göndərib. Baxmayıb ki, bu vəhabidir, o biri İrançıdır, kim müraciət edib “yox” deyilməyib. QMİ bunları edib. O qədər çirkabın, siyasiləşmiş şiəliyə və başqa məhzəblərə qulluq edən adamların içindən saf, vətənpərvər, millətinə, dövlətinə bağlı, savadlı adam tapıb çıxarmaq və onu vəzifəyə təyin etmək böyük hünər tələb edir. Dini Komitə də bunu çox yaxşı bilir, görür. Mən indiyə qədər Dini Komitənin təyin etdiyi şəxslər arasında mənfi obraza malik olan birisini görməmişəm. Dini Komitə bu məsələyə ciddi önəm verir. Mənim din sahəsində kifayət qədər fəaliyyətim olub, QMİ-də, Bakı İslam Universitetində işləmişəm, bir neçə il də məktəblərdə tədrislə məşğul olmuşam, bu kadrların çoxu ilə də tanışlığım var, aralarında tələbələrim də var. Elə bu günlərdə “Məşədi Dadaş” məscidinə təyin edilən Əli Şərbətov da müəllim yoldaşım olub, çox milli ruhlu adamdır. Təxminən 10 ildir ki, onu görmürəm, hər bir halda dəyişmiş olmaz. Liviyada oxuyub, savadlı insandır, Bakı İslam Universitetini də bitirib, orada bir yerdə müəllim işləmişik. Hesab edirəm ki, elə o cür məhzəbçilik nifaqından uzaq adamlar təyin olunsa daha gözəl olar. Hələ ki, Dini Komitənin bu sahədə gördüyü işlərdən razıyam. Çünki onlardan bundan artığını tələb etmək olmaz. Uzun illər bu sahədə İrançılığın təbliğatı gedib, yararsız kadrlar meydanda olub. Dini Komitə 30 ildən sonra şəffaf, saf işlər görür, mövcud kadrları saf-çürük edir, imtahan keçirir, bu böyük işdir. Əvvəllər belə idi ki, 3-4 min pulu aparıb QMİ-də bir Əlirza müəllim vardı ona verirdilər, axund olmaq istəyən adamlar da mütləq İranda, Qumda təhsil alanlar olmalı idi. Mən o axundları tanıyıram. Ya QMİ sədrinə Ocaqnejati zəng vurub deyirdi, ya da bu işlə kadrlar şöbəsi məşğul olurdu. Çünki İrana bağlı adamların pulu da olurdu. Onlara dolayı yolla pul verirdilər, onlar pul verib axund düzəldirdilər. İrana da bu lazım idi. Bu səbəbdən o axundlar İrançılar idi, bəziləri də həbs olunub. Onların hamısının təyinatını QMİ vermişdi. QMİ-də imtahan yox idi, yalnız İrançılıq əsasında təyinat olurdu. Mən şəxsən adam tanıyıram ki, çox ziyalıdır, savadlıdır, İrana əks olduğu və İranı təqlid etmədiyi üçün QMİ heç bir məsciddə ona iş vermədi. Özünə dedilər ki, sən İrançı deyilsən. Təsəvvür edin ki, bütün bunlardan sonra o sərhəddləri aşmaq, o zəncirləri qırmaq, müsabiqə elan etmək, normal, şəffaf imtahan keçirmək, orada insanları hər tərəfli yoxlamaq, araşdırmaq, təyin etmək Dini Komitə ilə yanaşı dövlətimizin böyük uğurudur” - deyə T.İrfan qeyd etdi.
T.İrfan hesab edir ki, imtahan prosesinin bu şəkildə keçirilməsi və təyinatların bu cür olması dövlət siyasətinin uğurudur. O, “bu dini kadrların saf-çürük olunması və təyinatdan sonra nəzarətdə saxlanılması yolunda öz effektini tezliklə verəcək. Bizim İlahiyyat İnstitutumuz, orada oxuyan milli kadrlarımız var. Öz kadrlarımız formalaşır və bundan sonra heç xaricdə oxuyanlara ehtiyac qalmayacaq. Xaricdə oxuyanların da hamısını qaralamaq olmaz, onların arasında da vətənpərvər olanlar, dövlət maraqlarına xidmət edənlər var” - deyə bildirdi.
İradə SARIYEVA
