Qəbiristanlıq bütün insanların bir ucu ölümlü dünyada son dayanacağıdır. Ona görə də təsadüfi deyil ki, ulu babalarımız qəbir evinə son mənzil deyiblər, yəni hər kəsin son evi bu dar qəfəsdir. Amma elə adamlar var ki, onlara 5 kvadratlıq məzar evi qismət olmur.
Bu gün Azərbaycanın paytaxtı Bakı da daxil olmaqla, ölkəmizin bütün iri şəhərlərində qəbir yeri məsələsi ciddi problemə çevrilib. Bakıda isə bu özünü daha kəskin şəkildə göstərir. Şəhərin mərkəzində mövcud olan iri qəbiristanlıqların böyük əksəriyyətində ciddi yer məhdudiyyəti var. Belə bir hal Bülbülə qəbiristanlığında da yaşanır. Bu günlərdə sosial şəbəkələrdə Bülbülə qəbiristanlığında vurulduğu iddia edilən qeyri-adi elanın fotosu paylaşılıb. Müzakirələrə səbəb olan elanda qeyd edilib ki, Bülbülə kənd qəbiristanlığında yeri olmayan kənar şəxslərin dəfn olunmasına kənd əhalisi icazə vermir. Kənd sakinləri adından belə bir elanın yayılmasını tənqid edən sosial şəbəkə istifadəçiləri isə dini cəhətdən bu addımın düzgün olmadığını bildiriblər.
“20-30 il bundan qabaq vəfat edən şəxsin qəbrini açıb yaxınını orda dəfn edənlər də var”
Mövzu ilə bağlı Bülbülə kənd bələdiyyəsinin sədri Natiq Həsənovla əlaqə saxladıq. N.Həsənov “Bakı-Xəbər”ə açıqlamasında qeyd etdi ki, Bülbülə qəbiristanlığı qədim, köhnə qəbiristanlıqdır. Hazırda qəbiristanlıqda yer yoxdur: “Yer olmadığı üçün dəfnlə bağlı problem yaşanır. Hər ailənin özünün əvvəldən alınan, müəyyən sərhəd qoyulmuş qəbir yerləri var. Bülbülə kənd qəbiristanlığında ancaq qeydiyyatı olan və əvvəldən yer ayrılmış sakinlər basdırılır. Kənar şəxslərin orada basdırılması üçün yer yoxdur. Kənar ərazidən gələn şəxs kiminsə əvvəldən aldığı yerdə dəfn edə bilməz. Bu düzgün deyil”.
Bələdiyyə sədrinin sözlərinə görə, Bülbülə kiçik kənddir. Qəbiristanlıqda kimsə qəbir yeri alır, ətrafına sədd çəkirsə, orada təxminən üç-dörd qəbir yeri olur: “Təəccübli olsa da onu da deyim ki, 20-30 il bundan qabaq vəfat edən şəxsin qəbrini açıb yaxınını orada dəfn edənlər də var. Məsələn, ata illər öncə ölüb, basdırıblar, onun övladını da üzərinə dəfn edirlər. Din də bunu qəbul edir. Qeyd edim ki, əksər qəbiristanlıqlarda belə ənənələr olur”.
N.Həsənov onu da əlavə etdi ki, kənd qəbiristanlığının ərazisinin böyüməsi üçün Bakı Şəhər İcra Hakimiyyətinə və Rayon İcra Hakimiyyətinə müraciət edilib, onların cavabı gözlənilir.
Günel CƏLİLOVA
