Məlum olduğu kimi, Sumqayıtda Hacı Zeynalabdin qəsəbəsində yerləşən 19 nömrəli məktəbin idman zalında 7 yaşlı Fərid Bakarovun idman məşqçisi Mehman Xəlilov tərəfindən kobud davranış nəticəsində ölməsi ilə bağlı görüntülər yayılıb.
Video sosial şəbəkələrdə müzakirələrə səbəb olub, izləyicilər tərəfindən kəskin tənqid edilib. Hər kəs məşqçiyə ən ağır cəzanın - ömürlük həbsin verilməsini tələb edir. Eyni zamanda bildirilib ki, M.Xəlilov həmin məktəbdə müəllim kimi çalışmayıb, orada uşaqlarla məşğul olması doğru deyil. Qeyd edək ki, Mehman Xəlilov hadisədən sonra saxlanılıb. Məhkəmə Mehman Xəlilov barəsində istintaq müddəti üçün 4 ay müddətinə həbs-qətimkan tədbiri seçib. Hazırda onun barəsində Cinayət Məcəlləsinin126.3-cü (Qəsdən sağlamlığa ağır zərər vurma - ehtiyatsızlıqdan zərərçəkmiş şəxsin ölümünə səbəb olduqda) maddəsi ilə açılmış işin istintaqı davam etdirilir.
Sumqayıt məktəbinin idman zalında məşqçinin 7 yaşlı Fəridə qarşı törətdiyi vəhşiliyi, amansızlığı yəqin hər biriniz izlədiniz. Görüntülərdən açıq-aşkar aydın olur ki, Mehman Xəlilov təkcə Fəridlə yox, məşqdə iştirak edən digər azyaşlı uşaqlarla da xüsusi qəddarlıqla davranıb. Onları saçından, başından, qulağından tutaraq ayağa, havaya qaldırır. Bu məsələyə xüsusi yanaşmanın göstərilməsi mühümdür. Gənclər və İdman Nazirliyi, Olimpiya Komitəsi və Federasiyalar təcili müzakirələrə başlamalı, regionlarda fəaliyyət göstərən idman müəllimləri ilə rüblük profilaktik söhbətlər etməli, onlar üçün xüsusi davranış qaydaları hazırlayaraq təşviq etməlidir. Eyni zamanda, bütün idman zallarında kameralar quraşdırılmalıdır.
Tanınmış idman mütəxəssisi Kənan Məstəliyev “Bakı-Xəbər”ə açıqlamasında bildirdi ki, ortaya çıxan görüntülər çox dəhşətlidir: “Amma idman cameəsi üçün yeni, təəccüblü durum deyil. Bir çox dırnaqarası mütəxəssislər özlərini sübut etmək üçün qısa, yanlış, qadağan olunmuş yollarla nəticəyə daha tez çatmağa cəhd edirlər. Bu metodun haralara gətirib-çıxardığını, təəssüf ki, bir daha gördük. Nəzarət mexanizmi olmadıqca, bu proses belə də davam edəcək.
Azərbaycanda idman hələ də Sovet məktəbinin mexanizmləri, həmin məktəbin yetirmələrinin inkişafa, uyğunlaşmağa, yeniliklərə meylli olmayan davranış və "bilik-bacarıqları" üzərində dayanır. Bu şəxslər valideynin "əti sənin, sümüyü mənim" tələbini əsas götürüb istədiyi kimi davranır, zor gücü ilə müxtəlif regional həvəskar yarışlarda medal qazanıb bunu böyük iş kimi göstərirlər. Halbuki, uşaq idmanı xüsusi, həssas, çox incə prosesdi. Burada nəticə həmişə ikinci planda olmalı, məşq və yarış prosesi əyləncə, bayram xarakteri daşımalıdı. Uşaq idmana sevinə-sevinə gəlməli, yorğun da olsa sevinə-sevinə də getməlidi. Döyülmüş, əzgin, halsız, bitgin halda yox. Zala gələn 50 uşağın 50-nin də dünya və Olimpiya çempionu olması mümkün deyil, buna çalışmaq da səhvdi. O yaşda idman ilk növbədə gələcəyin fiziki və mənəvi sağlam vətəndaşını yetişdirməyə xidmət etməlidi, qabağına çıxan hər kəsi udub nəyisə sübut etməyə yox. 7 yaşlı uşaq kimə, nəyi sübut edəcək?
Videosunu izlədiyimiz sambo məşqçisi bütün idman və davranış qaydalarını cinyətkarcasına pozub. Və təəssüf ki, belələri az deyil. Bir dəfə hansısa beynəlxalq yarışda medal qazanıb, ayağını hava limanına basan kimi "Vətənimiz, bayrağımız üçün vuruşdum, şərəfini qorudum" və s. bu kimi pafoslu açıqlamalar verib eqosunu yüksəldənlər kifayət qədərdi. Bir şeyi yadda saxlamaq lazımdı ki, hər idmançıdan yaxşı məşqçi olmur. Bunu bütün idman növlərində dəfələrlə görmüşük, aksiom kimidi. Belə hadisələrin qarşısının alınmasının çox sadə yolu var. Lisenziyası olmayan şəxslər məşq keçmək hüququna malik olmamalı, valideynlər də bu sənədi olmayan adamlara öz uşaqlarını etibar etməməlidilər. Belə olan halda federasiyalar da, digər məsul qurumlar da işinə daha məsuliyyətli yanaşacaq, "hər yoldan keçənə" məşqçilik şansı yaratmayacaq. Çünki bir hadisə olanda lisenziya verən tərəf də cavabdehlik daşıyacaq”.
Məhəmmədəli QƏRİBLİ
