Artıq neçə illərdir ki, Azəraycan vətəndaşları bir çox istehlak məhsullarını onlayn şəkildə xarici ölkələrdən, xüsusən də Türkiyədən sifariş edirlər. Sifarişlərə daha çox geyim məhsulları daxildir ki, insanlar qiymət fərqi, çeşid çoxluğu və s. səbəbdən məhsulları xaricdən almağa üstünlük verirlər.
Bu prosesin nəticəsi olaraq Azərbaycanda son 5-6 ildə karqo şirkətləri yaranmağa başlayıb. İlkin araşdırmamıza görə, hazırda yerli bazarda bu xidməti həyata keçirən 200-ə yaxın karqo şirkəti mövcuddur. Bu şirkətlərin əsas işi vətəndaşların xarici ölkələrdən sifariş etdiyi məhsulu öz xarici anbarlarına qəbul edib, onların ölkəyə gətirilməsi və müştərilərə çatdırılmasıdır.
Qeyd etdiyimiz karqo şirkətlərinin sayı ölkədə yetərincədir. Ancaq son zamanlar bu sahədə vəziyyət dəyişib. Belə ki, karqo şirkətlərinin sayı azalır. Karqo şirkətləri bir-birinin ardınca fəaliyyətlərini dayandırırlar. Bu da, təbii ki, vətəndaşların seçim imkanının azalmasına təsir göstərir.
Maraqlıdır, karqo şirkətləri niyə bağlanır və bu hal vətəndaşların seçim imkanına necə təsir edəcək?
“Yaxın müddət ərzində kiçik karqo şirkətləri bağlanaraq bazardan çıxacaq, orta səviyyəli şirkətlər isə ya birləşəcək, ya da…”
Sosial sahə üzrə ekspert Elxan Əliyev “Bakı-Xəbər”ə açıqlamasında qeyd etdi ki, pandemiya dönəmində çoxlu sayda karqo şirkəti yarandı və bu sahə inkişaf dövrünü yaşadı: “Pandemiya bitəndən sonra bu sahədə vəziyyət fərqli istiqamətdə dəyişdi. Belə ki, karqo şirkətlərinin sayı hədsiz dərəcədə çoxaldı. Danılmaz faktdır ki, şirkət sayı çox olarsa narazılıqlar da artacaq. Belə olduğu halda istehlakçılar həmin şirkətlərlə əməkdaşlığı dayandırır. Bu da karqo şirkətlərinin sayının azalmasına təsir edir. Məlumat üçün deyim ki, bu sahədə çoxsaylı problemlərə görə artıq "Trendyol" Azərbaycana birbaşa çatdırılma edəcək. “Trendyol” və “PAŞA Holdinq” Azərbaycanda e-ticarət xidmətlərinin göstərilməsi üçün birgə şirkətin yaradılması barədə razılığa gəliblər. Təbii ki, bu qərarla onlarla yerli, kiçik karqo şirkətlərimiz üçün rəqabət çox çətinləşəcək. Məlumdur ki, “Trendyol”nun satış rəqəmləri və həcmi də digər internet mağazaları ilə nisbətdə Azərbaycanda daha yüksəkdir. Alınan məhsulun 75-80 faizi bu platformadan sifariş edildiyi üçün “Trendyol” münasib qiymətə ölkəmizə məhsullarını göndərəcək. Bundan sonra Türkiyənin bütün internet mağazaları malı Azərbaycana uyğun qiymətə göndərəcəklər. Nəticədə müştərilər məhsulları birbaşa əldə etmək imkanına malik olacaqlar. Azərbaycanda olan daşıyıcı şirkətlər isə məhsulu birbaşa aldığımız üçün fəaliyyət göstərə bilməyəcəklər”.
Ekspert onu da əlavə etdi ki, hazırda bazarda 200-dən çox karqo şirkəti var. Yaxın müddət ərzində kiçik karqo şirkətləri bağlanaraq bazardan çıxacaq, orta səviyyəli şirkətlər isə ya birləşəcək, ya da fəaliyyət istiqamətlərini dəyişəcək.
Günel CƏLİLOVA
