Məlum olduğu kimi, bu ilin yayında ölkə üzrə bütün Azərbaycan dili və ədəbiyyatı, ibtidai sinif müəllimləri sertifikatlaşdırmaya cəlb olunacaq. 2023-cü ildə ibtidai sinif üzrə təhsilverənlərin sertifikatlaşdırılması prosesində 2803 müəllim təkrar iştirak edəcək.
Müəllimlərin narahatlığından sui-istifadə etməyə çalışanlar da az deyil. Bəzi repetitorlar, hazırlıq kursları sertifikasiya həyəcanı yaşayan müəllimlərə qiymət oxuyur, müxtəlif dillə onları tora salırlar. Və belələrinə aldanan təhsil işçiləri də az deyil. Həmin kurslara gedən təhsil işçilərinin nəticəsi isə gözlənilən olmur.
“Müəllimlərin sertifikasiya imtahanına hazırlaşmaq üçün kurslara müraciət etməsinin müxtəlif səbəbləri var”
Təhsil eksperti Nizami Hüseynov “Bakı-Xəbər”ə açıqlamasında qeyd etdi ki, müəllimlərin işə qəbulu üzrə hazırlıq kursları mövcud olmamalıdır: “Pedaqoji sahədə kadr hazırlayan bütün ali təhsil müəssisələri Nazirlər Kabinetinin təsdiq etdiyi kreditlər əsasında fənləri tədris edir. Bu fənlərin tədrisi müvafiq proqramla həyata keçirilir. Ümumiyyətlə, özünə güvənən pedaqoqun hansısa kursa və ya repetitor yanına getməsi düzgün deyil. Bəzi müəllimlər özlərinə yetərincə güvənmədiyi üçün həmin kurslara müraciət edir. Müəllimlərin sertifikasiya imtahanına hazırlaşmaq üçün kurslara müraciət etməsinin müxtəlif səbəbləri var. Birincisi odur ki, həmin müəllim yüksək nəticə göstərərək maaşını 35 faizlik artım ilə almaq istəyir. Ən pis ehtimal da odur ki, müəllim öz bilik, savad və bacarığının imtahandan keçməyə qadir olmadığını bildiyi üçün həmin kurslara müraciət edir. Müəllimlərimiz başa düşməlidir ki, sertifikasiya imtahanı onun hazırkı peşəkarlıq səviyyəsini və tutduğu vəzifəyə uyğun olub-olmadığını yoxlayan bir prosesdir. Yəni sertifikasiya hansısa bir uğur əldə etmək, yaxud dərəcə almaq üçün keçirilən imtahan deyil”.
Ekspert hesab edir ki, sertifikasiya imtahanının keçirilməsində əsas məqsəd savadlı müəllimlərin artmasına nail olmaqdır: “Müəllimlərin fərdi, yaxud əlavə kurslara gedərək imtahanlara hazırlaşması pis vəziyyət deyil”.
Günel CƏLİLOVA
