Dünyada turizm hər bir ölkə üçün ən dinamik inkişaf edən sahələrdən biri sayılır. Azərbaycanda da turizm sahəsi yeni mərhələyə qədəm qoyub. Son dövrlər ölkəmizdə keçirilən beynəlxalq səviyyəli oyunlar turist axınında əhəmiyyətli rol oynayır.
Avropa, Asiya və Afrika ölkələrindən minlərlə turist gəlir. Turist axınının bu qədər genişlənməsi ölkəmiz üçün iqtisadi baxımdan çox vacibdir. Turistlərin bu qədər çox axın etməsi qeyri-neft sektorunun inkişafına birbaşa təsir göstərir.
Dövlət Statistika Komitəsinin məlumatına görə, xaricilərin Azərbaycan hotellərində gecələmələrinin sayı 79.7 faiz artaraq 309 minə çatıb. Məlumat üçün qeyd edək ki, bu rəqəmin 80 faizi Bakının payına düşür. Yəni Azərbaycanda gecələyən hər 100 xaricinin cəmi 20-si rayonlara üstünlük verib.
Onu da bildirək ki, Azərbaycana gələn xaricilərin 8,9 faizi Qusarda, 3,5 faizi Naftalanda, 3,2 faizi Qəbələdə, 1,8 faizi Qubada, 0,4 faizi Naxçıvan Muxtar Respublikasında, 0,3 faizi Şabranda, 1,8 faizi isə digər şəhər və rayonlardakı mehmanxanalara üstünlük verib.
Bu isə ondan xəbər verir ki, hələ də regionlarla müqayisədə Bakı xaricilər üçün daha cəlbedici olaraq qalmaqdadır.
“Turizm imkanları baxımından regionlar hələlik paytaxtla rəqabət apara bilmir”
Turizm sahəsi üzrə ekspert Elçin Rüstəm “Bakı-Xəbər”ə açıqlamasında qeyd etdi ki, Azərbaycana gələn turistlərin hələ də böyük qismi Bakı şəhərinə üstünlük verir. Turizm imkanları baxımından regionlar hələlik paytaxtla rəqabət apara bilmirlər: “Hesab edirəm ki, turistlərin rayonlara marağının artırılması üçün sistemli tədbirlərin genişlənməsinə, stimullaşdırıcı kampaniyaların təşkilinə ehtiyac var”.
Ekspertin sözlərinə görə, turistlərin ən çox səfər etdiyi bölgələr Quba, Qusar, Qəbələ, İsmayıllı və Şamaxıdır. Digər bölgələrə turist axınını çoxaltmaq üçün nəqliyyatın rolu böyükdür: "Təbii ki, turizm infrastrukturu üç - dörd bölgədən ibarət olmalı deyil. Qərb zonası var - Şəmkir, Qazax, Gəncə, bundan başqa, Qarabağ zonası. Bunlar da digər bölgələrimiz kimi münbit şəraitə malikdir. Həmçinin şimal-şərq, şimal-qərb, cənub zonası, daha doğrusu, Şamaxıdan tutmuş Zaqatalayadək, Şabrandan tutmuş Quba, Qusaradək, aşağıda Lənkəran, Masallı, Lerik zonaları şərait baxımından yaxşıdır, əlverişlidir. Bölgələrə turist axınını artırmaq üçün ilk növbədə nəqliyyat sistemini inkişaf etdirmək lazımdır. Məsələn, sürət qatarları Gəncə, Şəmkir, Qazax zonasına yaxşı işləyərsə, turistlər də oralara gedib çıxa bilər. İndi qatar turizmi də artıq fəaliyyətə başlayıb. Düşünürəm ki, turist axınına bunun da öz təsiri olacaq. Yəni bu bölgələri əlçatan etmək lazımdır. Gələn turistlər üçün maraqlı ekskursiya marşrutları hazırlamaq, onların diqqətini çəkmək lazımdır. Bunu biz etməliyik ki, turistdə maraq yaransın və növbəti dəfə bir də ora getsin. Yəni bu məsələdə biz də maraqlı olmalıyıq. Turistləri bir az da biz yönləndirməliyik. Belə olan təqdirdə, bütün bölgələrə turist səfərləri baş tutacaq”.
Həmsöhbətimiz onu da əlavə etdi ki, turistlərin Bakıya maraq göstərməsinin səbəblərindən biri də paytaxtda keçirilən oyunlar və yarışlardır.
Günel CƏLİLOVA
