Azərbaycanda illərdir gündəmə dönə-dönə qayıdan mövzulardan biri də “Dəniz və hasar” problemidir. İllərdir ki, Abşeron yarımadasının Xəzər sahili boyunca 5-6 metr hündürlükdə, bir neçə kilometrlik hasarlar çəkilib və proses bu gün də davam edir.
Bakının Sabunçu rayonu, Nardaran qəsəbəsi ərazisində çimərlik ərazisinin hasarlandığı haqqında məlumat yayılıb. Sosial şəbəkədə yayılan görüntülərə əsasən də çimərliyin hasarlandığı görünür. Sakinlər iddia edirlər ki, həmin ərazidə dənizin suyunun çəkilməsindən sonra qanunsuz hasarlama işləri aparılır.
Aytəkin Kamranqızı: “Dənizin çimərliklər sahəsinin hasarlanması hər bir Azərbaycan vətəndaşının konstitusion hüquqlarının pozulması anlamına gəlir”
Məsələ ilə bağlı sosioloq Aytəkin Kamranqızı “Bakı-Xəbər”ə açıqlamasında qeyd etdi ki, bu olduqca aktual bir mövzudur: “Bilirsiniz ki, dəniz ölkənin təbii sərvəti sayılır. Bu sərvət üzərində heç kəs mülkiyyət hüququna sahib ola bilməz. Dəniz bütün Azərbaycan vətəndaşlarına məxsusdur və hamının ondan istifadə etmək kimi hüququ var. Dənizin çimərliklər sahəsinin hasarlanması hər bir Azərbaycan vətəndaşının konstitusion hüquqlarının pozulması anlamına gəlir. Mərhum Prezident Heydər Əliyev tərəfindən qəbul edilmiş bir qərar da var ki, hətta dənizin 100 metrlik məsafəsində belə tikintilərin aparılmasına icazə verilmir. O qərar hələ də qüvvədədir. Görünən budur ki, bu qanunun icrasına lazımınca fikir verilməyib. Nəticədə biz bütün Xəzəryanı ərazilərin zəbt edildiyinin şahidi olduq. Təbiidir ki, nəzarət bütün istiqamətlər üzrə baş verməlidir. Bir yerdə hasarları söküb, digər ərazidə saxlayacaqlarsa, yenə də obyektivlik itəcək. Əhalidə belə bir rəy yaranacaq ki, bu konkret şəxslərə qarşı yönələn aksiyadır, problemin ümumi həlli üçün deyil. Yəni yarımçıq tədbir olacaq. Ortaya möhkəm siyasi iradə qoyulmalıdır ki, proses tam olaraq həyata keçirilsin və bu da xalq tərəfindən böyük etimadla qarşılansın. Bu problem illərdir xalqımız tərəfindən narazılıqla qarşılanıb. Hökümət bu problemi həll etməklə öz reytinqini də qaldırmış olar”.
Sabunçu RİH: “Həmin ərazidə heç bir hasarlama işləri aparılmır, sadəcə, qəsəbənin…”
Məsələ ilə əlaqədar Sabunçu Rayon İcra Hakimiyyətindən “Bakı-Xəbər”ə bildirildi ki, şəhid ailələrinin üzvləri, qazilər və Vətən müharibəsi iştirakçıları tərəfindən yay mövsümündə ticarətlə məşğul olmaq üçün müvəqqəti olaraq taxtadan köşklər hazırlanır: “Həmin köşklər mövsüm bitdikdə oradan götürüləcək. Görüntülərdə əks olunan daşlar qumun altında olacaq və taxtaların bərkidilməsi üçündür. Bu hasar deyil, yolu düzəldirlər. Heç bir təməl betonlama işləri aparılmayıb. Köşklər Bakı Şəhər İcra Hakimiyyətinin strukturu olan Bakı Şəhər Ticarət və Xidmət Departamentinin nəzarətində fəaliyyət göstərəcək”.
Leyla QARAXANLI
