Məlum olduğu kimi, Prezident İlham Əliyev “1941–1945-ci illərdə İkinci Dünya müharibəsində iştirak etmiş şəxslərə, həlak olmuş və ya sonralar vəfat etmiş döyüşçülərin dul arvadlarına, arxa cəbhədə fədakar əməyinə görə orden və medallarla təltif edilmiş şəxslərə birdəfəlik maddi yardım verilməsi haqqında” Sərəncam imzalayıb.
Sərəncama əsasən, İkinci Dünya müharibəsində Qələbənin 78-ci ildönümü ilə əlaqədar həmin müharibənin iştirakçısı olmuş 57 nəfərin hər birinə 1500 manat məbləğində birdəfəlik yardım ödəniləcək.
İkinci Dünya müharibəsində həlak olmuş və ya sonralar vəfat etmiş döyüşçülərin dul arvadlarına, həmin dövrdə arxa cəbhədə fədakar əməyinə görə orden və medallarla təltif edilmiş şəxslərə isə 750 manat məbləğində birdəfəlik yardım veriləcək.
Maraqlıdır, təxminən nə qədər şəxs sözügedən yardım alacaq?
“Təxmini hesablamalara görə, məlum sərəncam 3700 şəxsi əhatə edəcək”
Milli Məclisin İqtisadi siyasət, sənaye və sahibkarlıq komitəsinin üzvü Aydın Hüseynov “Bakı-Xəbər”ə açıqlamasında qeyd etdi ki, dövlət başçısının imzaladığı müvafiq sərəncama əsasən, 1941–1945-ci illərdə İkinci Dünya müharibəsində iştirak etmiş şəxslərə 1 500 manat, həlak olmuş və ya sonralar vəfat etmiş döyüşçülərin dul arvadlarına, həmin dövrdə arxa cəbhədə fədakar əməyinə görə orden və medallarla təltif edilmiş şəxslərə, həmçinin, Leninqrad şəhərinin müdafiəsinə görə müvafiq medal və döş nişanı ilə təltif edilmiş şəxslərə, habelə Leninqrad şəhərinin mühasirəsi iştirakçılarına 750 manat məbləğində birdəfəlik maddi yardım verilməsi nəzərdə tutulub. Bu məqsədlə Prezidentin Ehtiyat Fondundan 2,9 milyon manat məbləğində vəsait ayrılıb: “Bu sərəncam ölkəmizdə yürüdülən sosial siyasətin mühüm təzahürlərindən biri kimi dəyərləndirilməlidir. İkinci Dünya müharibəsi iştirakçılarının davamlı olaraq sosial müdafiəsi gücləndirilməkdədir. Həmin həssas təbəqə AXCP-Müsavat hakimiyyəti dövründə tamamilə unudulmuş, dövlət qayğısından məhrum olmuşdu. Ümummilli liderimiz Heydər Əliyev 1993-cü ilin iyun ayında respublikamıza rəhbərliyə qayıtdıqdan sonra ölkəmizdə sosial müdafiə tədbirləri gücləndirilməklə, İkinci Dünya müharibəsi iştirakçılarının da dövlət qayğısı ilə əhatə olunmasına, 9 May - Qələbə gününün yenidən dövlət bayramı kimi qeyd olunmasına başlanılıb. Ulu öndər 1941-1945-ci illər İkinci Dünya müharibəsi iştirakçılarını cəmiyyətimizdə ən hörmətli insanlar kimi dəyərləndirərək, onların sosial müdafiəsinin gücləndirilməsi istiqamətində fəal dövlət siyasətinin formalaşmasını təmin edib”.
Millət vəkili qeyd etdi ki, İkinci Dünya müharibəsi iştirakçılarına və ailə üzvlərinə göstərilən bu böyük diqqət və qayğı Prezident İlham Əliyev tərəfindən uğurla davam etdirilir. Hər il 9 May - Qələbə günü münasibətilə Bakıda təntənəli mərasim keçirilir və cənab Prezident və birinci xanım Mehriban Əliyeva mərasimdə iştirak edərək, veteranlarla görüşür, onları təbrik edirlər. Dövlət başçısının müvafiq sərəncamı ilə İkinci Dünya müharibəsi əlillərinə və digər iştirakçılarına Azərbaycan Respublikası Prezidentinin aylıq təqaüdləri təyin olunaraq ödənilir və ötən dövrdə bu təqaüdlərin məbləği mütəmadi olaraq artırılıb. Həyata keçirilən sosial paketlər zamanı onların təqaüdləri davamlı olaraq artırılıb, sonuncu dəfə 2023-cü ilin yanvar ayından bu şəxslərin təqaüdləri növbəti dəfə 30 faizə yaxın artırılıb.
A.Hüseynovun sözlərinə görə, Prezidentin aylıq təqaüdü ilə yanaşı, İkinci Dünya müharibəsi veteranları əmək pensiyası ilə təmin edilirlər və onlara pensiya təyin olunarkən pensiyalarına qanunvericilikdə nəzərdə tutulmuş qaydada əlavələr hesablanıb. Hazırda onların orta aylıq pensiya məbləği 500 manata yaxındır. Bu şəxslər, həmçinin, dövlətin ən yüksək sosial təminatları ilə əhatə olunublar. İndiyə qədər 100-dən artıq İkinci Dünya müharibəsi əlili mənzillə, bu təbəqədən olan 1200-ə yaxın şəxs minik avtomobili ilə təmin olunub. İkinci Dünya müharibəsi iştirakçılarının bərpa müalicəsi, sanator-kurort yollayışları ilə təminatı və s. sahələrdə də müvafiq işlər görülür, ehtiyac duyduqları hallarda onlara evlərində sosial xidmətlər də göstərilir.
Millət vəkili onu da əlavə etdi ki, 1941-1945-ci il müharibəsində iştirak edən şəxslərin sayı getdikcə azalır. Təxmini hesablamalara görə, məlum sərəncam 3700 şəxsi əhatə edəcək.
Günel CƏLİLOVA
