Bu günlərdə Dövlət Statistika Komitəsi sərnişinlərə xidmət edən nəqliyyat növlərinin yanvar-mart ayları üzrə statistikasını açıqlayıb. Məlumata əsasən, Azərbaycanda nəqliyyatçılar 423,7 milyon sərnişinə xidmət göstəriblər.
Sərnişinlərin 87,1 faizi avtomobil nəqliyyatı, 12,4 faizi metro, qalan hissəsi isə digər nəqliyyat növləri ilə daşınıb. Nəqliyyat sektorunda daşımaların həcmində xüsusi çəkisi ən böyük olan avtomobil nəqliyyatı ilə 369,0 milyon sərnişin daşınıb və əvvəlki ilin eyni dövrü ilə müqayisədə müvafiq olaraq 3,0 faiz və 23,8 faiz artım qeydə alınıb. Sərnişinlərin 95,5 faizi avtobus, 4,5 faizi isə minik taksilərinin xidmətlərindən istifadə edib.
Qeyd edək ki, 2022-ci ildə sərnişinlərin 94,0 faizi avtobus, 6,0 faizi isə minik taksilərinin xidmətlərindən istifadə edib. Bu ilin göstəricilərinə əsasən, taksidən istifadə edən sərnişinlərin sayı azalıb.
Maraqlı məqam ondan ibarətdir ki, hər addımbaşı taksilərlə qarşılaşdığımız halda, bu azalmanın səbəbi nədir?
“Bəzi taksi fəaliyyəti ilə məşğul olan şəbəkələr var ki, qanunsuz olaraq çalışırlar, ilk növbədə taksilərin statistikası fərqlənmə nişanı ilə aparılmalıdır”
Nəqliyyat eksperti Ərşad Hüseynov “Bakı-Xəbər”ə şərhində bildirdi ki, açıqlanan statistika həqiqəti əks etdirmir: “Ötən illə müqayisədə avtobuslardan istifadə edənlərlə taksidən istifadə edənlərin nisbəti dəyişib. Bunun da səbəbi odur ki, əvvəlki illərdə pandemiya ilə bağlı ictimai nəqliyyatdan istifadəyə dair müəyyən məhdudiyyətlər var idi. Ancaq taksidən istifadə edənlərin sayı azalmayıb. 2022 və bu il ərzində həm taksi, həm də avtobusdan istifadə edənlərin sayı artıb. Taksidən istifadə edən sərnişinlərin sayı isə ildən-ilə daha da artır. Açıqlanan rəqəmlər düzgün deyil. Onu da nəzərə almaq lazımdır ki, bəzi taksi fəaliyyəti ilə məşğul olan şəbəkələr var ki, qanunsuz olaraq çalışırlar. İlk növbədə taksilərin statistikası fərqlənmə nişanı ilə aparmalıdır. Amma müşahidələr onu göstərir ki, fərqlənmə nişansız taksi kimi çalışanlar çoxdur. Bunları nəzərə alaraq deyə bilərəm ki, bu statistik rəqəm reallığa uyğun deyil. Çünki bu hallarda taksilərin dəqiq statistikasını aparmaq mümkün deyil”.
Günel CƏLİLOVA
