Sosial şəbəkələrdə Mingəçevir şəhəri, Təbiət, riyaziyyat, humanitar təmayüllü liseydə şagirdlərin oyun kartları ilə qumar oynaması ilə bağlı videogörüntülər yayılıb. Görüntülərdə yuxarı sinif şagirdlərinin dərs saatlarında sinif otağında qumar oynadıqları əks olunub.
Məlum hadisə ilə bağlı Mingəçevir şəhəri Təbiət, riyaziyyat, humanitar təmayüllü liseyin direktoru Aidə İsmayılova “Bakı-Xəbər”ə açıqlamasında qeyd etdi ki, hadisə dərs vaxtı olmayıb:
Mingəçevir şəhəri, Təbiət, riyaziyyat, humanitar təmayüllü lisey - Aidə İsmayılova: “Sonuncu dərs bitəndə uşaqlar, sadəcə video çəkmək üçün, maraq xətrinə 5-10 dəqiqəlik belə bir addım atıblar”
“Onlar 11-ci sinif şagirdləridir. Sonuncu dərs bitəndə uşaqlar, sadəcə video çəkmək üçün, maraq xətrinə 5-10 dəqiqəlik belə bir addım atıblar. Aprelin 13-ü baş verib və çəkdikləri videonu uşaqlardan biri “Instagram” səhifəsində paylaşıb. Beləliklə, yayılıb. Amma videonu görəndə uşaqlar özləri də mat qaldılar. Belə ciddi qınağa səbəb olacağını düşünməyiblər. Onların cəmi iki ayı qalıb, qəbul imtahanına hazırlaşırlar. Çox güman ki, stresdən qısa müddətlik belə bir əyləncə ilə fikir dağıtmaq istəyiblər. And içdilər ki, heç 10 dəqiqə çəkmədi. Tənəffüsdə videonu çəkib, evə gediblər. Polis araşdırması aparıldı, uşaqların dedikləri təsdiqləndi. Məlum hadisə ilə bağlı valideynlər liseyə çağırılıblar, onlarla söhbət aparılıb. Onu da deyim ki, uşaqların qəbula hazırlaşdıqlarını nəzərə alaraq, töhmət və ya ciddi tədbir görülmədi. Belə bir məqamda onları daha da stresə, üzüntüyə sala bilmərik. Məsələni çox böyütməyə ehtiyac yoxdur”.
Kamran Əsədov: “Hazırda məktəblər çox təhlükəli bir məkana çevrilib, bu da həmin əraziyə nəzarət edən şəxslərin öz vəzifələrini yerinə yetirməməsi ilə bağlıdır”
Təhsil eksperti Kamran Əsədov “Bakı-Xəbər”ə açıqlamasında qeyd etdi ki, son üç il ərzində məktəblərə nəzarət, təlim-tədris prosesi, şagirdlərlə davranış prosesi çox ciddi şəkildə geriyə doğru gedib: “Məktəblərə nəzarət demək olar yox səviyyəsindədir. Hər gün şagirdlərin iştirakı ilə məktəblərdə xoşagəlməz hallar yaşanır. Bu hal isə onu göstərir ki, Elm və Təhsil Nazirliyi, regional təhsil idarələri məktəblərə nəzarət edə bilmir və təhsil müəssisələrinə təsir imkanı yoxdur. Şagirdlər məktəblərdə özlərini o qədər rahat hiss edirlər ki, tədris müəssisəsində qumar oynayır və bunu çəkib, ictimailəşdirirlər. Nəinki məktəb, məktəbə yaxın ərazidə belə qumar, mərc oyunlarına qanunla icazə verilmir. Çox təəssüf ki, məktəb direktorları, regional təhsil idarələri təhsil müəssisələrində hər hansı bir monitorinq aparmır. Bu qurumlar məktəblərə nəzarət etmək əvəzinə təhsil mərkəzindən necə qazanc əldə etmək barədə düşünürlər”.
Həmsöhbətimizin sözlərinə görə, qaydalara əsasən, məktəbdə qumar oynayan şagirdlərə ciddi şəkildə töhmət verilməlidir. Eyni zamanda, məktəbin direktoru, regional təhsil mərkəzinin nümayəndələri, Elm və Təhsil Nazirliyinin həmin bölgə üzrə kuratorları öz vəzifələrindən azad edilməlidir. Hazırda məktəblər çox təhlükəli bir məkana çevrilib. Bu da həmin əraziyə nəzarət edən şəxslərin öz vəzifələrini yerinə yetirməməsi ilə bağlıdır.
Ekspert hesab edir ki, məktəblər təhsil verən məkana deyil, kriminal aləmə çevrilib. Uşaqlar məktəbə ancaq qayda pozmaq üçün gəlir: “Yaranmış problemləri həll etmək üçün təhsil mühitini geri qaytarmaq lazımdır”
Günel CƏLİLOVA
