Bakı sakinlərinə MTK tərəfindən 2017-ci ildə sökülən evlərinin qarşılığında mənzillə təmin olunacaqları deyilsə də, bu yerinə yetirilməyib. Hadisə paytaxtın Səbail rayonu, Bayıl qəsəbəsi, Xanlar küçəsində baş verib. Mahal MTK sakinlərə verdiyi vədi yerinə yetirməkdən boyun qaçırır.
Sakinlər iddia edirlər ki, MTK 6 il sonra bildirib ki, onlar bu binada yaşayışla təmin olunmayacaqlar və bu il ərzində sökülən evləri qarşılığında vətəndaşlara pul veriləcək. Bu qərar isə vətəndaşların narazılığına səbəb olub.
“…mütləq şəkildə vətəndaşa ya həmin ərazidə ev verilməli, ya da həmin ərazidə ev ala biləcək qədər məbləğ ödənməlidir”
Mövzu ilə bağlı fikir bildirən daşınmaz əmlak məsələləri üzrə ekspert Elnur Fərzəliyev qeyd etdi ki, vətəndaşların evləri sökülüb köçürülürsə, mütləq şəkildə ərazi üzrə qiymətləndirmə aparılmalıdır. Həmin ərazidə olan qiymətlərə uyğun vətəndaşa pul verilməli və yaxud evin ölçüsü çox kiçikdisə, onun otaq sayına uyğun ala biləcəyi digər binalardakı mənzillərin qiymətinə uyğun kompensasiya ödənilməlidir: “Məlumdur ki, artıq uzun illərdir paytaxtın müxtəlif yerlərində söküntü işləri aparılır. 2016-cı ildən başlayaraq Nazirlər Kabinetinin 86 nömrəli sərəncamı ilə istismar müddətini bitirmiş çoxmənzilli yaşayış binalarının söküntüsünə başlanıb. Ondan əvvəlki və sonrakı illərdə artıq şəhərin mərkəz ərazilərində fərdi yaşayış evlərindən ibarət olan köhnə yaşayış massivləri sökülərək yeni tikilən binalarla əvəzlənir. Onu da deyim ki, son 10 ilin statistikasına baxsaq görərik ki, qiymətlər artan xətt üzrə gedir. Lakin vətəndaşların aldığı kompensasiyalarda elə də ciddi bir dəyişiklik yoxdur. Bəllidir ki, mərkəzi ərazilərdə yerləşən fərdi həyət evlərinin bəzilərində otaq sayı az, ölçüsü kiçik olur. Lakin insanlar burada öz həyatını qurub. Məsələn, bir vətəndaşın mənzili üç otaqdan ibarət, ümumi sahə təxminən 45-50 kvadratdır, lakin mərkəzə yaxın ərazilərdə yerləşir. Bu evə görə həmin vətəndaşa ödənilmiş kompensasiya ilə o ərazidə yeni evi ala bilmir. Ona görə də şəhər kənarından ev almağa məcbur olur.
Təbii ki, bir vətəndaş uzun illər bir ünvanda yaşayırsa, artıq öz infrastrukturunu, işini, ailəsinin, uşaqlarının təhsilini, məktəbini yaşadığı yerə uyğun hesablayaraq qurub. Bu gün həmin vətəndaşın evi sökülüb, köçürülmə işləri aparılırsa, mütləq şəkildə vətəndaşa ya həmin ərazidə ev verilməli, ya da həmin ərazidə ev ala biləcək qədər məbləğ ödənməlidir. Bundan əvvəlki problemlərə baxsaq görərik ki, "Sovetski"də də bu cür problemlər yaşanıb. Hələ də orada evləri sökülənlərin bir hissəsi narazı kütləyə çevrilib, aldıqları kompensasiyadan razı deyillər. Nəzərə alsaq ki, həmin evlər çoxdan tikilmişdi, paytaxtın ümumi görüntüsünə estetik xələl gətirirdi. Qəzalı ərazi sayılır, sökülməli və köçürülməlidir. Çünki mərkəz hissədə bu cür massivlərin olması inkişaf etmiş Bakının gözəlliyinə xələl gətirir. Amma burada vətəndaşın mülkiyyəti varsa, toxunulmazdır. Bu əmlaklar sökülürsə, o zaman vətəndaşların hüquqları tam qorunmalıdır”.
Günel CƏLİLOVA
