Prezident İlham Əliyev “Bakı şəhərinin inzibati ərazisində avtomobil nəqliyyatı sahəsində idarəetmənin təkmilləşdirilməsi ilə bağlı əlavə tədbirlər haqqında” fərman imzalayıb.
Fərmana əsasən, Bakı şəhərinin inzibati ərazisində yol hərəkətinin təşkilində iştirak edilməsi, ümumi istifadədə olan nəqliyyat vasitələri ilə müntəzəm sərnişindaşıma və taksi minik avtomobilləri ilə sərnişindaşıma sahəsində tənzimləmənin və nəzarətin həyata keçirilməsi Azərbaycan Respublikasının Rəqəmsal İnkişaf və Nəqliyyat Nazirliyinə həvalə edilib.
Rəqəmsal İnkişaf və Nəqliyyat Nazirliyinin tabeliyindəki Azərbaycan Yerüstü Nəqliyyat Agentliyi Bakı Şəhər İcra Hakimiyyəti başçısının tabeliyindəki “Bakı Nəqliyyat Agentliyi” publik hüquqi şəxsin ona qoşulması formasında yenidən təşkil ediləcək.
Bakı Şəhər İcra Hakimiyyəti başçısının tabeliyindəki “Bakı Nəqliyyat Agentliyi” publik hüquqi şəxsin balansındakı əmlak Agentliyin balansına verilib.
Yəni sadə dildə izah etsək, BNA özünü doğrultmadığı üçün ləğv edilib.
Yaxın 3 ayda BNA ləğv ediləcək və onun səlahiyyətlərini, özü də bir qədər dəyişikliklərə məruz qalan səlahiyyətlərini bundan sonra həmin altqurumlardan biri həyata keçirəcək.
Lakin bu hələ son deyil, çünki Nəqliyyatı Əlaqələndirmə Şurası yaradılır. Bu Şura ölkəmizdə mobillik, yol-nəqliyyat infrastrukturu və yol hərəkəti təhlükəsizliyi sahəsində təkmilləşdirmə işləri, yəni islahatla məşğul olmalıdır.
Məlumdur ki, Bakı Nəqliyyat Agentliyi ancaq vətəndaşları soymaq, cərimələr tətbiq etmək və problem yaratmaqla məşğul idi. Bir sözlə, bu qurum öz funksiyasını normal şəkildə həyata keçirə bilmirdi. İrad bildirib tənqid edəndə isə sağlam tənqidi qəbul etmir, şikayətçilərə qarşı hörmətsiz münasibət sərgiləyirdilər. Bəlli olur ki, Vüsal Kərimli və onun komandası daha çox pul qazanmaq üçün ictimai nəqliyyatın fəaliyyətini cərimə yazma prosesi ilə iflic edirdi. Çox maraqlıdır ki, Vüsal Kərimli hələ də onunla bağlı səslənən korrupsiya ittihamlarına münasibət bildirməyib. Belə çıxır ki, yazdığı saxta cərimələr və onlardan toplanan vəsaitlərin hesabatını vermədən gedir?
Məsələni bir qədər sadə dildə izah edək. Gənc kadr kimi Vüsal Kərimli ona göstərilən etimadı doğrultmadığı üçün dövlətin çox ümid bəslədiyi BNA adlı layihəsi tam iflasa uğradı. Bu qurumun yarıtmaz fəaliyyəti barədə qəzet olaraq daim yazmışıq. Sevindirici haldır ki, özünü doğrultmayan qurumlarla bağlı ictimailəşən mövzular sonda həllini tapır. Ölkə başçısı yerli telekanallara verdiyi müsahibədə dedi ki, əsas məlumatları mediadan alır və əksər hallarda həmin məlumatlar öz həllini tapır. Prezident həmin çıxışında vəzifəyə təyin edilən gənc kadrlarla bağlı da narazılığını ifadə etmişdi. Vüsal Kərimlinin timsalında görürük ki, doğrudan da belə imiş. BNA uzun illər ərzində özünü yalnız vətəndaşları yersiz cərimə edən qurum kimi tanıda bildi.
Əsas problemlərdən biri də odur ki, nəqliyyat çatışmazlığını, dayanacaq məsələsini həll edə bilmədi. Marşurut avtobuslarının intervalında xeyli problem var. Sərnişinlər vaxtlı-vaxtında avtobusdan rahat istifadə edə bilmir. BNA avtobusların çatışmazlığı, yolların işıqlandırılması, yol nişanlarının olmaması, terminal aparatlarının işləməməsi kimi problemləri kənara qoyub, ideal formada olan taksi məsələsinə toxunurdu. Bu gün ictimaiyyət BNA-nın fəaliyyətindən narazıdır.
Bakı Nəqliyyat Agentliyi Azərbaycanın son illərdə təsis olunan ən yarıtmaz qurumlarından birincisi kimi yadda qaldı desək, qəti yanılmarıq. Ona görə birincisidir ki, bu agentlikdə ən aşağı palatadan ən yüksək instansiyaya qədər heç kim işini yerinə yetirmək istəmirdi. İstər Ziya Məmmədovun qoçularına oxşayan müfəttişlərin dayanma-durma cəriməsini oğrun-oğrun, xəlvətcə, nahaq yazması olsun, istər bugünə qədər dayanacaqlarda intervalı göstərən monitorların işləməməsi, ödəmə aparatlarının heç də bütün dayanacaqlarda olmaması, istərsə də ictimai nəqliyyatda bərbad xidmət, parklanma problemində biabırçı vəziyyət olsun...
Sosial şəbəkə və mətbuatda yazılanlardan görünür ki, bir çox hallarda bu cərimələr qanunsuz yazılırdı. Eyni zamanda aydın olunur ki, BNA-nın əməkdaşları Ziya Məmmədovun nəqliyyat qoçularının əməllərini təkrarlamaqla məşğul olurdular. Qurumun əməkdaşlarının avtomobil sahibləri ilə kobud danışması, bəzi hallarda onlara fiziki zor tətbiq etməsi barədə faktlar var və bu barədə zaman-zaman yazılıb.
BNA həm də iri məbləğli büdcə vəsaitlərini “udan” qurum kimi tanınır. Qurumun həyata keçirdiyi tenderlərə həmişə şübhə ilə yanaşılıb. Məsələn, götürək yolların rənglənməsini. Mediada yazılanlara görə, BNA 3 il ərzində Bakı yollarının rəngləməsinə 22 milyon manata yaxın pul xərcləyib. Qurumun bununla bağlı elan etdiyi tenderlərin qalibi isə “Yol Xətt” MMC olub. Yol nişanlarının alınması ilə bağlı rəqəmləri eşidəndə isə adamın təəccübdən dili kilidlənir.
BNA-dan tək vətəndaşlar və sürücülər yox, iş adamları da zərər görməkdədir. 2017-ci ildə Bakı şəhərinin inzibati ərazisində piyada səkiləri və eynisəviyyəli piyada keçidlərində pandusların təşkili işləri üçün tender keçirilib.
Tenderin qalibi Elçin Mustafayevin faktiki sahibi olduğu “Econ” şirkəti olub. Həmin işlər görülüb. Dövlət büdcəsindən 2 milyondan artıq vəsait bu məqsədə sərf olunub, amma iş icraçısı Ricat Arif oğlu Şeyxəliyevin pulu verilməyib.
BNA İdarə Heyəti sədrinin müavini Elçin Mustafayevin adı bu işdə milyonluq korrupsiyada hallanır. İş icraçısı deyib ki, Elçin Mustafayev müxtəlif şəxslərin arxasında gizlənməklə onun pulunu ödəməkdən yayınır.
Həmçinin, bu illər ərzində BNA İdarə Heyətinin sədri Vüsal Kərimli NİİM-in fəaliyyətinin stimullaşdırılması üçün heç bir addım atmayıb. Həmin qurumun dayanacaqlarda quraşdırılmış monitorlar, naviqatorlarla bağlı hər hansı işlək mexanizmi yoxdur. Həmin monitorlar indiyə qədər işləmir və dövlətin bu cihazların alınmasına ayırdığı maliyyə havaya sovrulub. BNA isə ilk vaxtlardan gur-gur guruldayırdı ki, dayanacaqlar intellektual idarəetmə sistemini yenidən quracaq. Amma bunun söz olaraq qaldığı göz qabağındadır. Bir sözlə, bu qurumun artıq sabiq olan rəhbərliyi ilə bağlı hüquqi araşdırmalar aparılmasının zamanı tam yetişib.
Məhəmmədəli QƏRİBLİ
