Qafqaz Müsəlmanları İdarəsi (QMİ) Ramazan bayramında fitrə zəkatının məbləğini açıqlayıb. Qazılar Şurasının Fətvasına görə, adambaşına 10-15 manat fitrə zəkatının verilməsi tövsiyə olunur: “Fitrə canın sədəqəsidir və imkanı olan müsəlmanın ailəsinin hər bir üzvü üçün fitrə zəkatı çıxarması, imkansızlara, ehtiyacı olan ailələrə verməsi vacibdir. Bu, hər bir ailəyə bayram ovqatı yaşamağa imkan yaradır".
Fitrə zəkatının məbləğinin adambaşına 10-15 manatdan müəyyən olunması müəyyən suallara yol açıb. Fitrə zəkatını bu məbləğdə vermək hər kəsə şamil olunurmu? 10-15 manatdan aşağı fitrə zəkatı çıxmaq olarmı?
“Fitrə ilə bağlı ortaq məbləğ açıqlamaq düzgün deyil, bu, şəriətə, dinə, insanların sosial vəziyyətinə də ziddir”
İlahiyyatçı Tural İrfan deyir ki, bu il fitrə 3 kiloqram dənli bitkilərin qiyməti dəyərində müəyyən edilib: “Yəni ailə üzvünün hər birinin adından 3 kiloqram buğda və yaxud digər dənli bitkinin dəyərində fitrə ayrılıb bayramdan əvvəl imkansız insanlara verilməlidir. Ən əsası, bu fitrə elə tərzdə verilməlidir ki, qarşı tərəf bundan inciməsin, bunu bir bayram payı kimi qəbul etsin. Fitrə-zəkat bayramdan ona görə qabaq verilməlidir ki, bayram günü bütün imkansızların da evində qazan qaynasın, ac insan qalmasın. 3 kiloqram dənli bitki dəyəri fitrənin minimum həddidir. İmkanı olan kəslər daha çox fitrə verə bilər. Məsələn, Türkiyədə çox görmüşük ki, imkanlı adamlar bir yük maşınını un kisələri ilə doldurub, imkansız ailələrə paylayır. Bizdə də bu ənənəni formalaşdırsaq yaxşı olardı. Doğrudur, bəzi adamlar bayram günü uşaq evlərinə, ahılların və ruhi xəstələrin qaldığı pansionatlara yardım aparırlar. Bu da yaxşı əməldir. Amma imkanlı adamın 10-15 manat fitrə verməsi yaxşı deyil. İmkanlı adamlar bu günlər daha çox səxavətli olmalıdırlar. Əslində bu, Orucluğun bəlli fəlsəfəsidir”.
Həmsöhbətimizin sözlərinə görə, fitrə ilə bağlı ortaq məbləğ açıqlamaq düzgün deyil: “Bu, şəriətə, dinə, insanların sosial vəziyyətinə də ziddir. Məsələn, elan edirlər ki, bu ilki fitrə adambaşına 15 manatdır. Bu, qətiyyən düzgün deyil. Adam var onun heç 3 manata imkanı çatmır, sən necə onun boynuna qoya bilərsən ki, 15 manat verməlisən? Adamların əksəriyyəti oruc tutur, amma onlara fitrə vermək düşmür. Çünki onun da meyarı, ölçüsü var. Fitrəni yalnız maddi imkanı yol verən insanlar ödəməlidir. Adam var oruc tutur, lakin fitrə onun özünə düşür. Hərə öz yediyi qidalardan adambaşına 3 kq verməlidir. Dində belə deyil ki, hökmən 15 manatı verməlisən, yoxsa ibadətin qəbul olmayacaq. İmkanı çatan verə bilər, imkanı çatmayan da verməsin”.
Günel CƏLİLOVA
