Aydın Mizrəzadə: “Sanki onlar bu cəmiyyətdə yaşamırlar, sanki Qarabağ ağrısını hiss etmirlər…”
Bir neçə gün əvvəl özünü cəmiyyətə psixoloq kimi tanıdan Nərmin Şahmarzadə adlı bir xanımın sosial şəbəkələr vasitəsilə yaydığı bir fikir ciddi müzakirələrə, hətta mübahisələrə səbəb oldu. Sözügedən xanım yazdığı statusda Azərbaycanın Milli Qəhrəmanı adına layiq görülmüş Mübariz İbrahimovu təhqir edib.
Onun bu xüsusda yaydığı fikirlər cəmiyyət tərəfindən sərt təpki ilə qarşılanıb. Hətta bəzi tanınmış şəxslər bu fikirlərə görə Nərmin Şahmarzadəni məhkəməyə verəcəklərini bəyan ediblər. Maraqlıdır ki, həmin xanım etdiyi səhvə görə üzrxahlıq etmək əvəzinə, verdiyi müsahibələrdə ölkədəki milli ruhun aşağı salınmasına yönəlik fikirlərini israrla müdaifiə edib. N.Şahmarzadənin ilk yazdığı fikir aşağıdakılardan ibarət olub:
"Azərbaycan kişisi deyəndə nümunə kimi Mübariz İbrahimovun adını çəkdi bir dostum, amma mən belə hesab etmirəm. Döyüş zamanı olsa, özünü və vətəni müdafiə deyərək insanı öldürməyə hardasa qəhrəmanlıq demək olar. Çünki dəyər hesab etdiyin insanlıq, mərhəmət hissini digər dəyər hesab etdiyin şeyə qurban verirsən, o öldürdüyün adama düşmən desən də, vicdanın sızlayar yəqin ki, buna görə dəyər hesab etdiyin şeyi qorumaq üçün digər dəyərindən imtina etməyinə bəlkə də qəhrəmanlıq demək olar.
Amma döyüş olmadan, vətəni, yaxınlarını, öz canını itirmək təhlükən olmadan birini öldürürsənsə, bu, qəddarlıqdır, mənə görə. Bəlkə də öldürdüyü erməni əsgəri bütün proseslərdən sonra doğulmuş, zərrə günahı olmayan, sərhəddə qalarkən qorxu keçirən, evə qayıtmaq üçün gün sayan biri idi. Bəlkə də yatarkən ailəsinə qovuşması üçün bir günün daha bitdiyini təsəvvür eləməmişdi. Amma kimsə onu etmədiyi bir şeyə görə günahlandırıb öldürür. Həmçinin, Mübariz sağ qalıb geri qayıtsaydı, hərbi cinayət işi açılacaqdı çox güman. Çünki əmr almadan sərhədi keçmişdi. Əslində, qəhrəman dediyimiz şəxs dövlətə siyasi olaraq təhlükə yaratmışdı. Bu yazı kimisə təhqir və ya gözdən salmaq məqsədilə yazılmayıb, sadəcə, hər şeyi kor-koranə qəbul etmək asana qaçmaqdır".
N.Şahmarzadə sonrakı fikirlərini bir az da “korrektə” edib və deyib ki, 19-20 yaşlı erməni əsgərinin səngərdə öldürülməsi onu çox narahat edir. Maraqlıdır ki, N.Şahmarzadə belə fikirdə olmasını guya kosmopolit həyat tərzi ilə izah edib. Burada bir fikrə diqqət etmək lazımdır ki, N.Şahmarzadə erməni xalqını yox, işğal olunmuş ərazilərdə döyüşməyə gələn erməni əsgərinin öldürülməsinə acıyır, onlara yas saxlayır. Aparılan araşdırmalardan sonra məlum olub ki, həmin xanımın ekspert qismində televiziyalarda qatıldığı verilişlərdə psixoloq kimi təqdimatına baxmayaraq, onun hələ ali təhsil diploma da yoxdur. O hazırda ali məktəbin 3-cü kursunda təhsil alır.
Maraqlıdır ki, N.Şahmarzadəni müdafiə edən və onunla həmfikir olan fərdlər də tapılır. Əsasən Avropaya sığınan mühacirlər və onlarla eyni əqidədə olan bəzi yerli “fəallar” Nərminin səsləndirdiyi fikirləri azad fikrin ifadəsi kimi qələmə verirlər.
N.Şahmarzadənin mövqeyi barədə ekspertlər nə düşünürlər?
Millət vəkili Aydın Mirzəzadənin sözlərinə görə, N.Şahmarzadə adlı bir azərbaycanlı qızın igid qəhrəmanımız Mübariz İbrahimov haqqında səsləndirdiyi fikirlərlə tanış oldum və dərin təəssüf hissi keçirdm: “Onun yazısını ürək ağrısı ilə oxudum və bu status ətrafında gedən müzakirələri diqqətlə izləyirəm. Təəssüf ki, Nərmin nümunəsi birinci dəfə deyil. Yada yazıçı Əkrəm Əylislinin xalqımıza ləkə atan kitabını, Avropa ölkələrinə köçmək üçün Ermənistandan siyasi sığınacaq istəyən bir azərbaycanlı ailəsini, bu yaxınlarda məktəbdə uşaqlara erməni rəqsini öyrədən müəllimi yada salaq. Onlar azdır, barmaqla sayılan qədərdirlər, ancaq onlar var. Sanki onlar bu cəmiyyətdə yaşamırlar, sanki Qarabağ ağrısını hiss etmirlər, torpağı işğal edilən ölkənin vətəndaşları deyillər.
Onlar Mübariz İbrahimovun ərazimizi işğal etmiş düşmən əsgərlərini öldürdüyünü başa düşmürlər. Daha doğrusu, şüurlu surətdə başa düşməkdən imtina edirlər. Və fikirlərini əsaslandırmaq üçün söylədikləri də erməni millətçi ideoloqlarının söylədikləri ilə üst-üstə düşür. Sanki nərminlər hardasa bu məsələlərlə bağlı bir kurs keçiblər.
Diqqət edirsinizsə, milli düşüncəmizə qarşı hücuma keçənlərin hamısının hardasa bir erməni dostu ortaya çıxır və bildirirlər ki, onlar üçün əsas insanlıqdır”.
Millət vəkili hesab edir ki, Ermənistanda son zamanlar işğal edilmiş torpaqlarımızı geri qaytarmaq səsləri eşidilir: “Ancaq Nərmindən fərqli olaraq, Ermənistanda hələ heç kəs öz əsgərinə “ azərbaycanlıya güllə atma, onun bacısı, anası var “ deyən yoxdur. “Döyüşmə, silahı at və pasifist ol” şüarları da səslənmir.
Ötən il Füzuli rayonunda yaşyarımlıq Zəhra Quliyeva Ermənistan tərəfindən atəşlə öldürüləndə nə N.Şahmarzadənin, nə də onun erməni dostlarının səsi çıxdı.
Bu məsələdə diqqətimi çəkən isə Nərminin provokasiyalı və düşmənə dəstək olan çağırışına cəmiyyətin kütləvi və kəskin reaksiyası oldu. Bu, xalqın səsi idi, milli mənliyin müdafiəsinə hər bir kəsin qalxması idi. Mənliyini və dəyərlərini qoruyan xalq düşmən cəhdlərinə ilk növbədə özü cavab verəcək”.
Məhəmmədəli QƏRİBLİ
