Ramil Hüseynov: “Bu o vaxta qədər davam etdiriləcək ki...”
“Nə vaxta qədər ki, bizim torpaqlarımız işğal altındadır, biz bütün imkanlardan istifadə edib Ermənistanı təcrid vəziyyətində saxlayacağıq”. Bunu Prezident İlham Əliyev Milli Olimpiya Komitəsində 2018-ci ilin idman yekunlarına həsr olunan mərasimdə çıxışı zamanı bildirib.
Dövlət başçısı deyib ki, Azərbaycanın təşəbbüsü ilə reallaşan qlobal enerji, nəqliyyat layihələri Ermənistandan yan keçir: "Bizim siyasətimiz nəticəsində Ermənistanda demoqrafik böhran yaşanır, insanlar ölkəni kütləvi surətdə tərk edir, iqtisadi inkişaf üçün heç bir əsas yoxdur, xarici sərmayə qoyulmur, onların beynəlxalq bazarlara çıxışı çox çətinləşib. Beynəlxalq müstəvidə sübut edə bilmişik ki, Ermənistan-Azərbaycan Dağlıq Qarabağ münaqişəsində haqlı tərəf bizik. Yəni bütün bu və başqa amillər, əlbəttə, bizim hərbi qüdrətimiz Ermənistanı bu ağır vəziyyətə salmışdır”.
Ölkə başçısının fikrincə, işğal edilmiş torpaqlarımızın bir hissəsinin iki il bundan əvvəl işğalçılardan azad edilməsi, o torpaqlarda Azərbaycan Bayrağının qaldırılması kriminal rejimə çox böyük zərbə olub: “O vaxtdan bu günə qədər o ölkənin güclü olmayan dayaqları daha da laxlayaraq sıradan çıxıb. Yəni bu, bizim qonşuluğumuzda baş vermiş hadisələrdir”.
O da məlumdur ki, müasir siyasət çox dinamikdir. Hadisələr sürətlə dəyişir. Belə olan halda, maraqlar da yenilənə bilər. Siyasi lider çevik və praqmatik fəaliyyəti ilə bu kimi məqamlarda vəziyyəti öz xeyrinə dəyişə bilər. Əgər siyasi kurs müasir tələblərə cavab vermirsə və ədalət prinsipinə dayanmırsa, fiasko qaçılmazdır. Prezidenti İlham Əliyev çevik və praqmatik siyasətçi nümunəsidirsə, Nikol Paşinyan bunun tam əksidir. Azərbaycanın dövlət başçısı dünyada xüsusi hörmət və diqqətlə qarşılanır. Onunla çox yaxın müzakirələr aparılır. Paşinyan isə bütün bunlardan məhrumdur.
Bütün bu deyilənlərin fonunda, Prezident İlham Əliyevin “Ermənistanı sonadək təcrid vəziyyətində saxlayacağıq” fikri işğalçı dövlətə dəstək verən, onun arxasında dayanan qüvvələrə necə mesajdır?
Məsələyə münasibət bildirən VİP-in sədr müavini Ramil Hüseynovun sözlərinə görə, bu o deməkdir ki, Azərbaycan heç vaxt işğal faktoru ilə barışmayacaq: “Ermənistanın arxasında hansı qüvvənin dayanmasından asılı olmayaraq, Azərbaycan işğalla barışmayacaq və bu dövlətin təcrid vəziyyətində saxlanması davam edəcək. İşğalçı ölkədə hakimiyyətin dəyişməsi Azərbaycanın bu yöndə apardığı siyasətə təsir etməyəcək. Bu o vaxta qədər davam etdiriləcək ki, Ermənistan işğala son qoysun və Azərbaycanın ərazi bütövlüyünü tanısın. Nə qədər ki, bu baş verməyib, Ermənistanın təcrid vəziyyətində saxlanması davam etdiriləcək. Nəzərə almaq lazımdır ki, enerji sahəsində aparılan siyasət bir sıra beynəlxalq layihələrdə ölkənin fəal iştirakını təmin edib. İndi Azərbaycan Qərbin enerji təhlükəsizliyində mühüm rol oynayan dövlətlərdən biridir. Eyni zamanda, ölkə Rusiya, Çin və İran kimi böyük dövlətlərlə də sıx əməkdaşlıq edir. Azərbaycan “Şərq-Qərb” dəhlizi ilə yanaşı, “Şimal-Cənub” və “Cənub-Qərb” dəhlizlərinin də keçdiyi məkandır. Butün bunlar, əlbəttə ki, Azərbaycanın regiondakı roluna öz müsbət təsirini göstərir. Belə olan halda, təbii ki, Azərbaycan ərazilərinin işğal altında saxlanması davam edə bilməz. Eyni zamanda, belə gerçəklikdə Ermənistanın təcrid vəziyyətində saxlanması tamamilə məntiqəuyğundur”.
Vidadi ORDAHALLI
