Bəhruz Quliyev: “Paşinyan da Sarkisyanın yolunu gedərsə, onu da analoji çöküş gözləyir”
“Bizim ardıcıl, məqsədyönlü siyasətimiz kriminal xunta rejiminin çökməsində öz rolunu oynamışdır”. Bunu Prezident İlham Əliyev Milli Olimpiya Komitəsində 2018-ci ilin idman yekunlarına həsr olunan mərasimdə çıxışı zamanı deyib.
Ölkə başçısının sözlərinə görə, 2018-ci ildə bir çox təhlükəli proseslər gedib və demək olar ki, beynəlxalq vəziyyət daha da gərginləşib: “Qanlı toqquşmalar, müharibələr, etiraz aksiyaları və digər hadisələr, demək olar ki, 2018-ci ilin mənzərəsini əks etdirir.
Azərbaycanda isə sabitlik, təhlükəsizlik təmin edilmişdir. Azərbaycan öz yolu ilə uğurla gedir və qarşıda duran bütün vəzifələri icra edir.
Bildiyiniz kimi, bu il Ermənistanda çox ciddi dəyişikliklər baş vermişdir. İyirmi il ərzində hakimiyyəti qanunsuz olaraq zəbt etmiş kriminal xunta rejimi çökdü və bizim dediyimizi indi erməni xalqı deyir. Kriminal, rüşvətxor rejim 20 il ərzində öz xalqını istismar edirdi və bu rejimin acı sonu məntiqə tam uyğundur. Onu da deməliyəm ki, bizim ardıcıl, məqsədyönlü siyasətimiz kriminal xunta rejiminin çökməsində öz rolunu oynamışdır. Çünki bizim siyasətimiz dəyişməz olaraq qalır”.
Həqiqətən də Azərbaycanın apardığı məqsədyönlü siyasət nəticəsində Ermənistandakı kriminal rejim çöküb. Nəzərə almaq lazımdır ki, 2016-cı ildə baş verən uğurlu aprel döyüşlərindən sonra hakimiyyətdəki rejim sürətlə zəifləməyə başladı. O vaxt Ermənistan müdafiə naziri olan Ohanyan vəzifəsini itirdi. Məlum oldu ki, Ermənistan ordusunda böyük miqyasda korrupsiya faktları var. Daha sonra bir sıra yüksək səviyyəli hərbi rəhbərlər vəzifələrindən uzaqlaşdırıldı və barələrində cinayət işi açıldı. Bununla paralel baş verən hadisələr Ermənistandakı siyasi proseslərə də öz təsirini göstərdi və rejim həm daxili, həm də xarici dayaqlarını sürətlə itirməyə başladı. Nəticədə Serj Sarkisyanın baş nazir olmaq cəhdi alınmadı və ondan sonra baş verənlər də məlumdur.
Maraqlıdır, bəs ekspertlər Azərbaycanın sözügedən məsələdə rolunu necə dəyərləndirirlər?
Məsələyə münasibət bildirən “Səs” qəzetinin baş redaktoru, politoloq Bəhruz Quliyevin sözlərinə görə, Azərbaycanın apardığı uğurlu siyasət nəticəsində Ermənistan regiondakı bütün layihələrdən kənarda qaldı: “Azərbaycan özünü güclü regional dövlət kimi təsdiq etməklə yanaşı, eyni zamanda, bəlli bir zamanda Ermənistana öz hərbi gücünü də göstərib. Söhbət 2016-cı ilin aprelində Ermənistan qoşunlarına endirilən zərbədən gedir. Hansı ki, həmin döyüşlər zamanı bir sıra strateji yüksəkliklər işğaldan azad edildi. Çoxlu sayda düşmən əsgəri məhv edildi. Ən başlıcası isə, Azərbaycan Ermənistanı regional layihələrdən kənarda saxlamaqla, oradakı xunta rejiminə güclü iqtisadi zərbələr endirib. Bunun özü ən böyük təzyiq vasitələrindən biridir. Bütün bunlar həm də siyasi baxımdan Sarkisyan rejimini beynəlxalq müstəvidə hörmətdən saldı. Dünya dövlətləri gördülər ki, Ermənistanda hakimiyyətdə olan xunta rejimi necə odiozdur. Hesab edirəm ki, bütün bunlar bir-birilə sıx bağlı olduğundan, rejimin çökməsində mühüm rol oynayıb. Bütün bunlar həm də Azərbaycanın bir güc mexanizmi kimi qiymətləndirilməlidir. Ona görə ki, güclü dövlətin siyasəti, sözü daha ötkəm olur. Azərbaycan da bu illər ərzində özünün gücü və apardığı düzgün siyasətlə bunu təsdiq edib. Regionda aparıcı güclü dövlət kimi qəbul olunur. İqtisadi və digər beynəlxalq reytinq cədvəllərində yaxşı mövqedə qərarlaşıb. Bütün bunların hər biri işğalçı tərəfə zərbədir. Ona görə də cənab Prezident qeyd edir ki, Azərbaycanın apardığı siyasət Ermənistanı təcrid vəziyyətinə salıb. Bəli, bu gün Ermənistan bütün layihələrdən kənarda qalıbsa, bu, Azərbaycanın uğurudur. Paşinyan da Sarkisyanın yolunu gedərsə, onu da analoji çöküş gözləyir”.
Vidadi ORDAHALLI
