Məhəmməd Əsədullazadə: “İki ölkə arasında bundan sonra siyasi proseslərdə ciddi qırılmalar davam edəcək”
Məlum olduğu kimi, Rusiya Prezidenti Vladimir Putin Ermənistanda keçirilən növbədənkənar seçkilərlə bağlı Nikol Paşinyanı təbrik etməyib. Rəsmi Moskvanın bununla bağlı ilk reaksiyası məlum olub. Məsələyə münasibəti ölkə başçısı Putin deyil, Rusiya Xarici İşlər Nazirliyinin rəsmi nümayəndəsi Mariya Zaxarova bildirib.
Erməni mətbuatının yaydığı məlumata görə, xanım siyasətçi qeyd edib ki, rəsmi Moskva Ermənistanın yeni parlamenti və yeni hökuməti ilə konstruktiv dialoq aparmağa hazırdır: “Məqsədimiz iki ölkə arasında, Avrasiya İqtisadi İttifaqı, KTMT və MDB çərçivəsində qarşılıqlı əlaqələri daha da möhkəmləndirməkdir”.
Qeyd edir ki, rəsmi İrəvan parlament seçkiləri ilə bağlı Vladimir Putinin təbrik məktubunu gözləyir. Hələlik isə təbrik yerinə xanım siyasətçidən quru reaksiya gəlib. Görünür, Moskva Ermənistandakı seçkilərin niyə və necə keçirilməsindən yaxşı xəbərdardır. Belə olmasaydı, ilk təbrik seçki bitən günü Kremldən gələrdi. Gəlməyibsə, deməli, gözləməyə dəyməz. Görünən odur ki, hər nə qədər seçkiöncəsi Paşinyan açıqlamasında “Rusiya ilə münasibətlərimiz prioritet məsələdir” desə də, yenə də Putinin etibarını qazana bilmir. Baxmayaraq ki, Paşinyan buna bənzər digər siyasi reveranslar da edib. Ələlxüsus da Paşinyanın bloku qalib gəlsə də, Putin onu təbrik etməyib. Prosesin bu cür davam etməsi Paşinyanı narahat etməyə bilməz.
“Joğovurd” qəzətinin yazdığına görə, Rusiya-Ermənistan münasibətlərindəki gərginlik qazın qiymətinin qalxmasına da təsir göstərəcək. Belə ki, dekabrın 31-də qazın qiyməti ilə bağlı müqavilənin müddəti başa çatır. Yeni müqaviləni imzalamaqda isə Rusiya tərəfi tələsmir. Hətta qazın qiymətini artırmağı belə düşündüyünə dair erməni mətbuatında məlumatlar dərc olunur. Putinin Paşinyanı təbrik etməməsi bu yöndə narahatlıqları daha da artırır.
Maraqlıdır, ekspertlər Putinin hələ də Paşinyanı təbrik etməməsini nə ilə izah edirlər?
Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə kontekstdən yanaşdı: “Ermənistanda keçirilən parlament seçkilərində Nikol Paşinyanın qalib gəlməsi birbaşa anti-Rusiya siyasətinin bu ölkədə rəsmiləşdirilməsi deməkdir. Bu, Qərbin Ermənistanda siyasətini gücləndirmək, regionda Rusiyanın mövqelərini zəiflətmək barədə birbaşa Paşinyana verdiyi təlimatdır. Hesab edirəm ki, Paşinyanın qələbə çalması Rusiyanın regionda mövqelərini zəiflədəcək. Eyni zamanda, Kremlin Ermənistanda əsas dayağı olan “Qarabağ klanı”nın sıradan çıxarılmasına gətirib çıxaracaq. Qeyd edim ki, Putinin dostu, eks-prezident Robert Köçəryanın həbs edilməsi Rusiya dövlət başçısını ciddi şəkildə narahat edib. Hesab edirəm ki, Putinin Paşinyanı təbrik etməməsi əsasən Köçəryanın həbsi və ölkədə aparılan anti-Rusiya siyasəti ilə bağlıdır. Rusiya ilə Ermənistan arasında bundan sonra siyasi proseslərdə ciddi qırılmalar davam edəcək. Rusiya öz forpostunda keçirilən seçkilərə, bir növ, əyaləti kimi yanaşma göstərdi. Bu da Paşinyana Kremlin mesajıdır. Bununla mesaj verirlər ki, vəziyyətin belə davam etməsi Paşinyana baha başa gələ bilər. Ola bilsin ki, proseslərin gedişindən asılı olaraq Putin Paşinyana qarşı digər təsir rıçaqlarını da işə salsın. Hər halda, qarşıdakı aylarda bir sıra məsələlərə aydınlıq gətiriləcəyi gözlənir”.
Vidadi ORDAHALLI
