Daşdəmir Əliyev: “Azərbaycan həm NATO, həm Rusiya, həm də digər ölkələrlə çox yaxşı dostluq münasibətlərinə malikdir”
Bakıda NATO Müttəfiq Qüvvələrinin Avropadakı baş komandanı Körtis Skaparrotti ilə Rusiya Silahlı Qüvvələrinin Baş Qərargah rəisi, ordu generalı Valeri Gerasimov arasında görüş keçirilib. Prezident tərəfindən Bakıda qəbul edilən K.Skaparrotti Rusiya Federasiyası Silahlı Qüvvələrinin Baş Qərargah rəisi ilə görüşə evsahibliyinə görə dövlət başçısına minnətdarlığını bildirib. K.Skaparrotti Bakının NATO-Rusiya formatında görüşün keçirilməsi üçün tam münasib məkan olduğunu, Azərbaycanın növbəti dəfə belə bir tədbirə evsahibliyi etməsinin əhəmiyyətini vurğulayıb.
Qeyd edək ki, bundan əvvəl də Azərbaycan belə formatda keçirilən görüşlərə evsahibliyi edib. 2017-ci il sentyabrın 7-də NATO Hərbi Komitəsinin rəhbəri Petr Pavel və Rusiya Silahlı Qüvvələrinin Baş Qərargah rəisi V.Gerasimov Bakıda görüş keçiriblər. Həmin ilin 18 fevralında ABŞ və Rusiya Baş Qərargah rəislərinin görüşü olub.
Göründüyü kimi, Azərbaycan məhz dünyanın hərbi güc balansının tənzimlənməsində mühüm tərəflərin danışıqlarının keçirildiyi etibarlı ölkəyə çevrilib. Həmin formatda keçirilən görüşlərin məhz Bakıda baş tutmasını nə ilə izah edə bilərik?
Hərbi ekspert Daşdəmir Əliyev hesab edir ki, bunun bir çox obyektiv səbəbləri var: “Sübut olunur ki, Azərbaycan dünyanın problemlərinin müzakirə edilməsi üçün təhlükəsiz dialoq platformasına çevrilib. NATO-nun yüksək rəsmiləri ilə V.Gerasimov arasında görüşün bir neçə dəfə məhz Bakıda keçirilməsi buna bariz nümunədir. NATO, ABŞ və Rusiya generallarının Bakıda görüşmələrinin əsas səbəbləri Azərbaycan Prezidentinin beynəlxalq nüfuzu, beynəlxalq hüququn prinsip və təhlükəsizlik mexanizmlərinin qorunmasının tərəfdarı kimi çıxış etməsi və bu müstəvidə mütəmadi olaraq çox önəmli mesajlar verməsi, ölkəmizin hərbi bloklara qoşulmaması, ayrı-ayrı güc mərkəzlərinə münasibətdə öz neytrallığını qoruyub saxlaması, etibarlı tərəfdaş olması, ölkəmizdəki təhlükəsizlik və sabitlik amilidir. Artıq "nə üçün Bakı" sualına heç kim cavab axtarmır. Çünki Azərbaycan beynəlxalq münasibətlər sistemində öz layiqli yerini tutmaq üçün çox çətin mərhələlərdən, kataklizmlərdən keçib. Regional miqyaslı təsirlərdən dünya miqyaslı, kütləvi tədbirlərin təşkilinədək çox önəmli mərhələləri uğurla adlayıb. Bakı bütün kriteriyalarına görə dünyanın iki nəhəng güc mərkəzinin hərbi rəhbərlərinin bir araya gəlməsi, nəinki konkret regionun, bütövlükdə, dünyanın problemlərinin müzakirə edilməsi üçün əlverişli, təhlükəsiz dialoq platformasına çevrilib”.
Ekspertin sözlərinə görə, Azərbaycan həm NATO, həm Rusiya, həm də digər ölkələrlə çox yaxşı dostluq münasibətlərinə malikdir: “Azərbaycan həm öz maraqlarını qoruyur, həm də digər ölkələrlə apardığı siyasətdə beynəlxalq stabilliyə kömək edən amillərə dəstək verir. Ümumən götürdükdə isə Azərbaycan artıq nüfuzlu bir məkan kimi qəbul edilir. Bunu həmin ölkələrin rəsmiləri ilə yanaşı, ekspertləri də xüsusi vurğulayırlar. Düşünürəm ki, Bakıda baş tutan bu görüş sonuncu olmayacaq. Bundan sonra da Azərbaycanda vaxtaşırı ciddi tədbirlərin həyata keçirildiyinin şahidi olacağıq”.
Məhəmmədəli QƏRİBLİ
