Məhəmməd Əsədullazadə: “Bunları yaxşı bilən Paşinyan oradakı Rusiya dayağı olan bu klanı mütləq devirməyə çalışacaq”
Ermənistanda dekabrın 9-da keçirilən növbədənkənar parlament seçkilərində Nikol Paşinyanın “Mənim addımım” bloku 70 faizdən çox səs qazanaraq qalib gəldi. Paşinyanın parlamentdə çoxsaylı yerə sahib olması imkan verəcək ki, maneəsiz-filansız bir sıra işləri həyata keçirsin. Bu o anlama gəlir ki, parlament hökumətə rəhbərlik etmək üçün inqilab yolu ilə hakimiyyətə gələn Paşinyana etimad göstərəcək.
Nəzərə almaq lazımdır ki, indiyə qədər Paşinyan zəif baş nazir idi. Ən başlıcası, ona görə ki, onun tərəfdarları parlamentdə üstünlüyə malik deyildi. Bu da ona manevr etməyə imkan vermirdi. Əslində, parlament seçkiləri gələn ilin may ayında keçirilməli idi. Ancaq proseslərin gedişi göstərirdi ki, o vaxta qədər onun nüfuzu indiki kimi olmayacaqdı. Digər tərəfdən, ona qarşı olan “Respublika” partiyası təmsilçilərinin parlamentdə çoxluğa sahib olması islahatların həyata keçirilməsinə böyük maneə idi. Baxmayaraq ki, hazırkı imkanlarla bundan sonra islahatların necə həyata keçiriləcəyi aydın deyil.
Bütün hallarda, son 20 ildə ilk dəfə olaraq “Qarabağ klanı" nəinki hökumətdən, hətta parlamentdən belə uzaqlaşdırıldı. Əvvəl bu klan yalnız hökumətdən uzaqlaşdırılmışdısa, bu dəfə parlamentdən də kənarda saxlandı. Beləcə, daha Ermənistanda “Qarabağ klanı” hakimiyyətə real təsir rıçaqlarına malik olmayacaq. Bütün bunlar Dağlıq Qarabağdakı separatçı quruma olan münasibətdə də özünü göstərəcək. Ən azından, əvvəlki hakimiyyətin göstərdiyi isti münasibət olmayacaq.
Maraqlıdır, bəs ekspertlər bütün bunları necə proqnozlaşdırırlar? Ermənistandakı hazırkı hakimiyyətin bundan sonra Dağlıq Qarabağdakı separatçı quruma münasibəti necə olacaq?
Məsələyə münasibət bildirən politoloq Məhəmməd Əsədullazadənin sözlərinə görə, Ermənistanda keçirilən parlamet seçkilərindən sonra “Qarabağ klanı”nın kənarda qalacağı gözlənilən idi: “Ermənistanda keçirilən növbədənkənar parlament seçkilərində “məxməri inqilab”ın legitimlik qazanması 20 illik “Qarabağ klanı”nın hakimiyyətinə son verdi. Hətta bu klanın Ermənistanın siyasi sistemindən təmizlənməsi prosesi gedəcək. Çünki “Qarabağ klanı” Ermənistanda işğalçı və hərbi xunta təsis etmişdi, ölkəni Rusiyanın forpostu edib. Nikol Paşinyanın əsas siyasi strategiyası ölkəsini “Qarabağ klanı”ndan təmizləmək, həmçinin, Dağlıq Qarabağ münaqişəsini həll etməkdir. Əgər bu prosesə başlamasa, ölkəsində siyasi və demokratik islahatlar həyata keçirə bilməyəcək. İndiki situasiyada Ermənistanda “Qarabağ klanı” dövlət sistemindən uzaqlaşdırıldı. İndi növbə işğal olunmuş ərazilərdə qondarma administrasiyanı dəyişmək olacaq. Seçki ərəfəsində Paşinyanla Bako Saakyan arasında ciddi siyasi ixtilaflar, söz atışmaları oldu. Nikol bir neçə aydan sonra Xankəndidə inqilab etdirib, öz adamlarını orada təyin edəcək. Hesab edirəm ki, bu proses qaçılmazdır. “Qarabağ klanı” hazırda yalnız Xankəndidə dayaqlarını saxlayır. Qeyd edim ki, 1998-ci ildə Xankəndidəki separatçılar tərəfindən Rusiya Ermənistanda hakimiyyəti dəyişdi. Eyni ssenari yenidən təkrar oluna bilər. Bunları yaxşı bilən Paşinyan oradakı Rusiya dayağı olan bu klanı mütləq devirməyə çalışacaq”.
Vidadi ORDAHALLI
