Məhəmməd Əsədullazadə: “Ermənilər növbəti dəfə əksinqilabla ayağa qalxa bilərlər”
Xəbər verildiyi kimi, dekabrın 9-da Ermənistanda keçirilmiş parlament seçkilərinin ümumi ilkin nəticələrinə görə, Nikol Paşinyan və onu dəstəkləyənlər qələbə qazanıblar. Ancaq Paşinyanın populist xarakterli vədlərinə rəğmən, səsvermə hüququ olan əhalinin cəmi 48,63 faizi seçkidə iştirak edib. Yəni bu, Ermənistan tarixində indiyə qədər ən az sayda seçicinin iştirak etdiyi seçkidir.
Ancaq müşahidələr göstərir ki, Paşinyan seçkiləri saxtalaşdırmaq üçün bir sıra vasitələrdən istifadə edib. Seçkinin əvvəlcədən istənilən nəticəni verməsi üçün bütün addımları atıb. Parlamentə keçən şəxslərin adları və açıqlanan seçicilərin sayı seçki oyununun diqqətçəkən məqamlarından idi. Sarkisyanın seçki fokusları nəticəsində seçici sayı süni artırılıb. Bunun üçün xaricə köçənləri, orada yaşayanları seçici kimi siyahıda saxlayıblar. Erməni mətbuatı belə, aparılan saxtakarlıqlardan heyrətə gəlib. Ölkə mətbuatının yazdığına görə, Ermənistanın əhalisi 2018-ci ilin iyul ayının 1-nə (yəni yeni hökumətin hesablamalarına görə) 2 mln. 969 min 800 nəfərdir. Ermənistan Mərkəzi Seçki Komissiyasının məlumatına görə, ölkədə guya 2 mln. 592 min 481 nəfər seçici var. Adi məntiqə görə, 2,9 mln. əhalisi olan ölkədə 2,6 mln. seçici, yaşı 18-dən aşağı cəmi 300 min nəfər ola bilməz. Belə çıxır ki, demək olar, ölkədə 18 yaşdan kiçik olan yoxdur. Bu bir daha ortadakı saxtakarlığı göstərir. Deməli, Paşinyan seçkilərə Sarkisyan dövrünün saxta siyahıları ilə gedib. 100 minlərlə "seçici" şişirtməsi var. Yeni parlamentin hətta cinayət əməlinə görə haqqında məhkəmə prosesi davam edən iki üzvü də var. Saxtakarlıq üzərində qurulan seçki ilə əlbəttə ki, Paşinyan öyünə bilməz.
Məsələyə münasibət bildirən politoloq Məhəmməd Əsədullazadənin sözlərinə görə, baş verənlər Paşinyanın saxtakar simasını ortaya qoyur: “Ermənistanda keçirilən növbədənkənar parlament seçkilərində demək olar ki, əhalinin yarıdan çoxu iştirak etmədi. Bu, Ermənistanın dövlət siyasətinə xalqın bir etiraz nümunəsi idi. Nikol Paşinyan qeyd etməsinə baxmayaraq, bu ölkədə miqrasiya kəskin vüsət alıb və gənclər ölkəni tərk edirlər. Bu gün ölkədə yaşlı və orta nəsil qalıb. Gənclər ümidsiz Ermənistanı tərk edərək dünyaya səpələnirlər. Hesab edirəm ki, Ermənistanın hazırkı demoqrafik durumu elə bir vəziyyətdədir ki, növbəti seçkilərdə 30 faiz əhali iştirak etməyəcək. Çünki ölkəni əhali tərk edir. Saxta seçkilər göstərdi ki, Paşinyanın islahatlar vədi, demokratiya ilə bağlı populizmi reallığı əks etdirmir. Müşahidələr göstərdi ki, Ermənistanın regionlarında əhali seçkiyə qatılmadı. Belə olan təqdirdə, Paşinyanın bu kimi açıqlamaları sadəcə özünə təsəlli və seçkilərdə şişirtmənin bir nümunəsidir. Demək olar ki, inqilab hökuməti qarşıda duran çox çətin problemləri həll edə bilməyəcək. Ermənilər növbəti dəfə əksinqilabla ayağa qalxa bilərlər. Bu seçki şousu, sadəcə, Paşinyanın legitimliyi üçün lazım idi. Bir də özünün məhdud hakimiyyətini formalaşdırmaq üçün. Bundan sonra heç də Ermənistanı müsbət nəticə gözləməyəcək. Çünki ölkənin əsas inkişafı işğalçılıq siyasətinə son qoymaqdan keçir. Paşinyan praqmatizmlə hərəkət edib, işğala son qoyub Azərbaycanla kompromisə gedərsə, iqtisadi blokada aradan götürüləcək. Nəticədə Ermənistanda müharibə xofu aradan qalxaraq, ölkəyə yeni sərmayə axını baş verə bilər. Bununla Paşinyan ölkəsinin inkişafına və demoqrafik vəziyyətin düzəlməsinə töhfə vermiş olar”.
Vidadi ORDAHALLI
