Qabil Hüseynli: “ATƏT-in Minsk Qrupunun həmsədri olan dövlətin proseslərə konstruktivlik gətirmək əvəzinə qızışdırıcı addımlar atması…”
1994-cü ildən bu günədək ATƏT-in Minsk Qrupu həmsədrləri münaqişənin həlli istiqamətində hansısa ciddi bir irəliləyişə nail ola bilməyiblər. Bu danılmaz faktdır.
Azərbaycan Prezidenti İlham Əliyev dəfələrlə çıxışlarında Dağlıq Qarabağ münaqişəsinin həlli istiqamətində ATƏT-in Minsk Qrupu həmsədrlərini ədalətlə, beynəlxalq prinsiplərə uyğun addımlar atmağa və fəal olmağa səsləsə də, ortada heç bir nəticə yoxdur. Həmsədr ölkələrdən biri də Fransadır. Təəssüf ki, Dağlıq Qarabağ münaqişəsilə bağlı neytral mövqe ortaya qoymağa borclu olan Fransa erməni lobbisinin güclü təsiri altında beynəlxalq hüquq normalarına zidd addımlar atmağa davam edir. Bir müddət əvvəl Makronun birbaşa təşəbbüsü ilə İrəvanda Frankofoniya tədbirinin keçirildiyinin şahidi olduq. Bunun ardınca separatçıların lideri Bako Saakyanın Fransaya səfəri reallaşdı. Həmin səfərdən öncə isə Fransa bələdiyyə üzvləri və sədrlərinin Dağlıq Qarabağa gəlmələri və “ikitərəfli müqavilələr” imzaladıqlarının şahidi olduq. Faktiki olaraq, Fransa bu məsələdə bitərəf olmadığını və bu ölkədəki erməni lobbisinin güclü təsiri ilə addımlar atdığını artıq dəfələrlə təsdiqləyib. Bununla yanaşı, Fransanın daxilində baş verən sosial narazılıqlar fonunda, həmin ölkə hakimiyyətinin dinc nümayişçilərlə davranış üsulu həmin ölkəni dünya miqyasında hörmətdən saldı. Artıq bütün dünya gördü ki, Fransa və onun Prezidenti Makron heç öz daxilində olan problemləri həll etmək iqtidarında deyil. Belə bir ölkənin dünya miqyasındakı konfliktlərin həllində orbitrlik etməsi də yolverilməzdir. Bütün bunları nəzərə aldıqda, Fransanın ATƏT-in Minsk Qrupu həmsədrliyindən çıxarılması nə dərəcədə məqsədəuyğun olar?
Politoloq Qabil Hüseynli qəzetimizə bildirdi ki, Fransa daim ermənipərəst siyasət yürüdür: “Bunu təsdiq edən bir neçə faktı qeyd etmək olar. Məsələn, Fransa Prezidenti Emmanuel Makron Frankofoniya sammitində iştirak üçün oktyabr ayında Ermənistana üçgünlük səfər etdi. Lakin o, tarazlığı qorumaq üçün Azərbaycana gəlmədi. Heç Azərbaycan rəhbərliyi də onun səfərinin reallaşmasına ciddi maraq göstərmədi. Bu, özlüyündə, ATƏT-in Minsk Qrupunun həmsədr ölkəsi olan Fransanın Dağlıq Qarabağ münaqişəsinin həlli istiqamətində ikili standart sərgiləməsindən xəbər verir.
Dəfələrlə rəsmi Paris işğalçı ölkəni açıq dəstəklədiyini nümayiş etdirib. Bunu sübut edən digər bir fakta nəzər sala bilərik. Bu yaxınlarda Fransanın şəhərlərinin merləri Azərbaycanın işğal olunmuş ərazilərinə qanunsuz səfərlər edərək işğal altında olan şəhərlərimizlə Fransanın şəhərləri arasında “qardaşlaşma” sazişləri imzaladılar. Fransa hökuməti tərəfindən bunların qarşısının alınması üçün heç bir tədbir görülmədi. Bu da son deyil. Qondarma rejimin rəhbəri kimi özünü təqdim edən Bako Saakyan davamlı olaraq Fransaya səfər edir. Fransa hökuməti tərəfindən bu kimi qanunsuz səfərlərin qarşısı alınmır. Əksinə, Paris işğalçıya qucaq açır.
Daha bir maraqlı məqamı diqqətə çatdıraq. Fransa açıq-aşkar ikili standartlara əsaslanan siyasət yürüdür. Baxmayaraq ki, Cənubi Osetiya, Abxaziya, Dnestryanı və Krımdan olan şəxslərin Fransanın ərazisinə daxil olmasına icazə verilmir”.
Politoloqun sözlərinə görə, artıq Fransa kimin tərəfində olduğunu aşkaranə şəkildə göstərir: “Bu isə Minsk Qrupunun mandatına ziddir. Bununla yanaşı, Fransa öz daxilində olan adi sosial problemi həll edə bilmir. Öz vətəndaşlarına qarşı olduqca qəddar davranış ortaya qoyur. Bütün dünyada hörmətdən düşən, obyektivlik imicini itirən bir ölkənin beynəlxalq səviyyədə orbitr rolunda iştirak etməsi heç də doğru deyil. Buna görə də, Fransanın Minsk Qrupunun həmsədrliyindən çıxarılması məqsədəuyğundur.
ATƏT-in Minsk Qrupunun həmsədri olan dövlətin proseslərə konstruktivlik gətirmək əvəzinə qızışdırıcı adddımlar atması nəinki pislənməlidir, hətta ciddi təhqiqat obyekti olmalıdır. Onsuz da bəllidir ki, uzun illər Fransa Minsk Qrupunda çox destruktiv rol oynayır. Danışıqlar prosesinin səmərəli aparılmasına maneə olur. Fransanın daxil olduğu Avropa Parlamenti ərazi bütövlüyümüzü tanıyır, NATO-da ərazi bütövlüyümüzə hörmət ifadə olunub. Amma Fransanın hörmətsizlik nümunəsi olan hərəkətlərə yol verməsi hər cür tənqidə və pislənməyə layiqdir. Azərbaycan bu istiqamətdə ciddi addımlar atmalıdır”.
Məhəmmədəli QƏRİBLİ
