Naxçıvanda Əlahiddə Ordunun gücləndirilməsi hərbi-taktiki, strateji əhəmiyyətli proses kimi...

Daşdəmir Əliyev: “Naxçıvan İrəvana daha yaxındır və demək olar ki, Ermənistanı hərbi yolla tam şəkildə susdura bilər”
Azərbaycan Prezidenti, Silahlı Qüvvələrin Ali Baş Komandanı İlham Əliyevin tapşırığına əsasən, Naxçıvan Qarnizonu qoşunlarının xüsusi təyinatlı birləşmə və hissələrinin birgə taktiki-xüsusi təlimində iştirak etmək üçün Naxçıvan Muxtar Respublikasına səfər edən müdafiə naziri, general-polkovnik Zakir Həsənov işğaldan azad edilmiş ərazilərdə olub.
Bu barədə Müdafiə Nazirliyinin Mətbuat xidməti məlumat yayıb. Müdafiə naziri Günnüt kəndi və ətraf ərazilərdə yerləşən mövqelərdə, Qızılqaya yüksəkliyində yaradılmış etibarlı müdafiə sistemi, görülmüş mühəndis işləri və yeni mövqelərdə qısa zamanda inşa olunan əsgəri-məişət kompleksləri ilə tanış olub. Bölmələrin yerləşdiyi ərazinin relyefinə və iqlim şəraitinə uyğun inşa olunan binalar keyfiyyətli mebel dəstləri və digər lazımi avadanlıqlarla, daimi işıq və istilik sistemi ilə təchiz edilib. General-polkovnik Z.Həsənov ön xəttə əsgər və zabitlərlə görüşüb, xidmətin təşkili ilə maraqlanıb, xidmətdə fərqlənən bir qrup hərbi qulluqçuya qiymətli hədiyyələr təqdim edib.
Bundan bir gün əvvəl, oktyabrın 30-da Naxçıvan Qarnizonu qoşunlarının xüsusi təyinatlı birləşmə və hissələrinin birgə taktiki-xüsusi təlimi keçirilib. Naxçıvan Muxtar Respublikası Ali Məclisinin sədri Vasif Talıbov və Azərbaycan Respublikasının müdafiə naziri, general-polkovnik Zakir Həsənov hərbi təlimi izləyiblər.
Naxçıvan MR-də ordu quruculuğunun gücləndirilməsinin nə kimi hərbi-taktiki və strateji əhəmiyyəti var?
Hərbi ekspert Daşdəmir Əliyev “Bakı-Xəbər”ə açıqlamasında bildirdi ki, Naxçıvanda aparılan ordu quruculuğunun möhkəmləndirilməsinin bir sıra istiqamətlər üzrə bizə qazandırdığı üstünlükləri artıq hiss edirik: “Əgər əvvəl ermənilər öz havadarlarına arxalanaraq, tez-tez Naxçıvan istiqamətində həmlələr etməyə cəhd göstərirdilərsə, həmin yerlərdə bizim gördüyümüz işlər artıq onları yalnız müdafiə olunmaq barədə düşünməyə vadar edib. Naxçıvanın Azərbaycanla birbaşa əlaqəsi kəsildiyindən, həmin ərazilərimizin müdafiə qüdrətini artırmaq bizim üçün olduqca vacib əhəmiyyət kəsb edirdi. Əvvəl oradakı ordu birləşməmiz ordu korpusu səviyyəsində idi. Korpusun səlahiyyətləri hücum və müdafiənin təşkili ilə bağlı qərarların verilməsi baxımından yetərli deyildi. Bu baxımdan da Naxçıvanda Əlahiddə Ümumqoşun Ordusu yaradıldı. Hazırda Ümumqoşun Ordusuna rəhbərlik edən şəxs həm də ştat üzrə müdafiə nazirinin müavini sayılır. Onun statusu çox operativ qərarların verilməsi üçün yetərlidir. Keçirilən hərbi-taktiki təlimlərdən də görürük ki, oradakı ordu birləşmələri arasında yaxşı koordinasiya qurulub. Məsələnin böyük strateji tərəfi də var. Naxçıvanda bu işlərin görülməsinin əhəmiyyəti həm də ondan ibarətdir ki, artıq düşmən Naxçıvan istiqamətindən ciddi ehtiyat etməyə başlayıb. Ermənilər uzun illərdir Naxçıvanın guya onların torpağı olması ilə bağlı xülya yayırlar. Naxçıvanda müdafiə qüdrətimizin gücləndirilməsi həm də onların ərazi iddialarını puç etmək baxımından əhəmiyyətlidir. Atıq biz sosial mediada paylaşılan xəbərlərdən görürük ki, ermənilərin Naxçıvanla həmsərhəd olan kəndləri sürətlə boşalmağa başlayıb. Bu məlumatların doğruluğunu hətta erməni mediası da təsdiq edir. Bu da onu deməyə əsas verir ki, Azərbaycan Naxçıvan istiqamətində ordu quruculuğunu möhkəmlətməklə, həm də özü üçün geniş təhlükəsizlik bufer zonası yaratmış olur. Ermənistan artıq Naxçıvanda Azərbaycanın daha güclü texnikaya malik ordu təlimlərini gördükcə təşvişə düşür. Çünki Naxçıvan İrəvana daha yaxındır və demək olar ki, Ermənistanı hərbi yolla tam şəkildə susdura bilər. Yəni hazırda işğaldan azad edilmiş torpaqlarda möhkəmlənməklə, həm Laçın dəhlizi, həm də İrəvanı məhz Naxçıvan vasitəsilə nəzarətdə saxlamaq olar ki, bu da böyük hərbi-strateji üstünlük sayılır”.
Məhəmmədəli QƏRİBLİ