Azər Həsrət: “Beynəlxalq qurumların çağırışları işimizə yarıyan deyil”
Azərbaycanın cəbhə xəttindən uzaq şəhərlərinin bombalanması əmrinin Ermənistan rəhbərliyi tərəfindən verilməsi təsdiqlənib. Bu, Ermənistanın Azərbaycana qarşı hərbi təcavüzü nəticəsində sülh və insanlıq əleyhinə cinayətlər, müharibə cinayətləri və digər çoxsaylı cinayətlər törətməkdə təqsirləndirilən Ermənistan Respublikasının vətəndaşlarının cinayət işləri üzrə açıq məhkəmə prosesində deyilib.
Təqsirləndirilən şəxs Arayik Harutyunyan onun tapşırığı ilə Gəncə şəhərinə zərbələr endirildiyini etiraf edib: “Qondarma rejimin “ordusu” Ermənistan Respublikası silahlı qüvvələrinin silahlı birləşməsidir. Müstəqil hərəkət etmək səlahiyyəti olmayıb. Həmin birləşmənin bizə tabe olmaq, bizim təlimatları həyata keçirmək hüququ yox idi”.
Təqsirləndirilən şəxslər Azərbaycan ərazilərinə necə zərbələr endirildiyini etiraf edib. Maraqlıdır, bundan sonra beynəlxalq təşkilatlar məlum hadisəyə necə reaksiya verəcək?
“Cəbhə xəttindən uzaq yaşayış məntəqələri deyil, Azərbaycana dəymiş ziyanla bağlı Ermənistan dövləti təzminat ödəməlidir”
Siyasi şərhçi Azər Həsrət “Bakı-Xəbər”ə şərhində bildirdi ki, cəbhə xəttindən uzaq yaşayış məntəqələri deyil, Azərbaycana dəymiş ziyanla bağlı Ermənistan dövləti təzminat ödəməlidir: “Bu məsələ gündəmdədir. Azərbaycan hökuməti ilkin hesablamaları da aparıb, təqribi rəqəmlərdə elan edilib. Təxminən 300 milyard dollar Azərbaycan dövlətinə ziyan dəyib. Təbii ki, işğalçı dövlət bu zərəri ödəməlidir. Düzü, Ermənistanın bu qədər ziyan ödəmək imkanı yoxdur, ona görə də alternativlər haqqında müzakirə açmaq olar. Biz də bunu Qərbi Zəngəzurla əlaqələndirmək istərdik. Şərqi Zəngəzur Azərbaycanın nəzarətindədir, tarixən Azərbaycan torpağı olan Qərbi Zəngəzur da bizimdir, hazırda Ermənistanın sərhədləri daxilindədir. Hesab edirəm ki, Ermənistan Qərbi Zəngəzuru Azərbaycana güzəştə gedərsə, o təzminatı ödəmiş olar”.
Həmsöhbətimiz hesab edir ki, beynəlxalq qurumların çağırışları işimizə yarıyan deyil: “Torpaqlarımız işğal altında olan zaman beynəlxalq qurumlarla bağlı bizim acı təcrübəmiz var. Onlar heç bir işə yaramayan, nəticəsi olmayan qərarlar qəbul edib. Hesab edirəm ki, təzminatla bağlı beynəlxalq qurumlar elə də ciddi iş görməyəcək. Ancaq Azərbaycan dövləti hər bir işi beynəlxalq hüquq müstəvisində həll etdiyi üçün bunu da eyni qaydada edəcək”.
Günel CƏLİLOVA
